ភ្នំពេញ៖ ដូចដែលប្រិយមិត្តបានស្គាល់ច្បាស់ហើយ អ្នកលក់ឡេសាច់សខ្ចី និងជាបុគ្គលចិត្តធម៌មួយរូបនៅក្នុងសង្គម អ្នកស្រី អ៊ាន សៀវម៉ី បានកំពុងមានប្រជាប្រិយភាពជាខ្លាំង នៅលើបណ្តាញសង្គម ។ ជាពិសេស កាលពីពេលកន្លងទៅនេះ តារាហ្វេសប៊ុកដែលជាអ្នកជំនួញអនឡាញដ៏ជោគជ័យ អ្នកស្រី សៀវម៉ី បានធ្វើឲ្យគ្រប់គ្នាផ្ទុះការចាប់អារម្មណ៍ ដែលបានប្រារព្ធពិធីបុកភូមិគ្រឹះថ្មី ហើយចំថ្ងៃខួបកំណើតខ្លួនឯង (9.9.2020) ដែលគេប៉ាន់ស្មានចំណាយអស់ខ្ទង់សែនដុល្លារ។
ពិតមែនហើយ អ្នកស្រី អ៊ាន សៀវម៉ី ត្រូវបានអ្នកប្រើប្រាស់បណ្តាញសង្គមទូទៅ លាន់មាត់សរសើរថាមានរូបសម្រស់ស្អាតប្រៀបដូចទេពធីតាអ៊ីចឹង។ ពិសេសនោះ គឺអ្នកស្រីជាមនុស្សម្នាក់ចូលចិត្តតុបតែងខ្លួនស្អាតជានិច្ច ដោយលម្អជាមួយគ្រឿងអលង្កាដ៏គួរឲ្យទាក់ទាញ ដែលអ្នកស្រីធ្លាប់បាននិយាយថា ខំប្រឹងរកស៊ីក៏ព្រោះតែចង់បានភាពស្រស់ស្អាតនេះផងដែរ។
ដោយឡែក ថ្មីៗនេះ អ្នកលក់ឡេសាច់សខ្ចីដ៏មានប្រជាប្រិយភាព និងជាបុគ្គលចិត្តធម៌មួយរូបនៅក្នុងសង្គម អ្នកស្រី អ៊ាន សៀវម៉ី បានធ្វើឲ្យគ្រប់គ្នានៅលើបណ្តាញសង្គម ផ្ទុះការភ្ញាក់ផ្អើល ខណៈឃើញអ្នកស្រីឡាយនិយាយទាំងមិនសប្បាយចិត្ត ព្រោះសោកស្តាយជាខ្លាំង ក្រោយចូលគេងប៉ះចំបន្ទប់ផ្ទះសំណាក់មួយកន្លែងនៅកែប មហាគគ្រិករកលេខដាក់គ្មាន ដែលមិនសមនឹងតម្លៃ និងសេចក្តីថ្លៃថ្នូររបស់អ្នកស្រីសោះឡើយ។
ក្នុងនោះ អ្នកស្រីបានរៀបរាប់ឲ្យបងប្អូនបានដឹងទាំងហួសចិត្តថា៖ «នៅកំពត យប់មិញ អត់កុហក់ទេ ទីកន្លែងណាក៏មានវត្ថុស័ក្តិសិទ្ធិដែរ ហើយរីសតនេះ ខ្ញុំនិយាយការពិតមែន ទេសភាពស្អាត អាងហែលទឹកឡូយ ខ្ញុំមិនប្រូម៉ូតឲ្យគាត់ទេ កន្លែងល្អខ្ញុំថាល្អ តែកន្លែងមិនល្អខ្ញុំនិយាយទុកអ៊ីចឹង ខ្ញុំអត់មានខ្លាចទេ ព្រោះខ្ញុំដេក១យប់ ១០០ដុល្លារជាង តែបន្ទប់ប៉ុនរន្ធកណ្តុរ ហើយម៉ែសុទ្ធតែដី»។ អ្នកស្រីបន្តថា «ប៉ុនខ្ញុំដែរ ខំដើរចាយលុយ លេងមកដើរសប្បាយមកប៉ះបន្ទប់អ៊ីចឹងអី អត់មានអាងហែលទឹកអីផង ខ្យល់ព្យុះរត់ចង់បាក់ក តែខ្ញុំអត់បញ្ចេញឈ្មោះទេ តែហ្នឹងនៅកំពតយប់មិញ បន្ទប់ដូចរន្ធកណ្តុរ កម្រាលពូកដូចក្រណាត់ជូតរនាប…»។
អ្នកស្រីបន្តថា «មាត់ខ្ញុំវាផុយ ឃើញម៉េចថាអ៊ីចឹងៗ ហើយបានគេស្អប់ខ្ញុំ តែខ្ញុំអត់ចេះផ្អែមទេ អ្វីល្អខ្ញុំថាល្អ អ្វីអត់ល្អខ្ញុំថាអត់ល្អហើយ…»៕ ដោយ៖ លឹម ហុង