ភ្នំពេញ៖ករណីជនសង្ស័យម្នាក់ ករណីប្រើហិង្សាវាយដំលើនារីជាអតីតសង្សារ បណ្ដាលឱ្យនាងរងរបួសជាំហើមពេញមុខ និងគុំត្រចៀកស្ដាំ លោកឧត្តមសេនីយ៍ ទី ចំរើនកុសល បានសំណូមពរដល់សមត្ថកិច្ច កុំដោះលែង ឬមានសម្របឲ្យសោះ ត្រូវបញ្ជូនជននេះទៅតុលាការ។
លោកឧត្តមសេនីយ៍ ទី ចំរើនកុសល បានសរសេរលើហ្វេសប៊ុកផ្លូវការនៅថ្ងៃទី២១ ខែកញ្ញាឆ្នាំ២០២០ នេះថា” សំណូមពរដល់សមត្ថកិច្ច កុំដោះលែង ឬមានសម្របឲ្យសោះ ត្រូវបញ្ជូនជននេះទៅតុលាការដើម្បីចំណាត់ការតាមផ្លូវច្បាប់។ អាកប្បកិរិយាជននេះ គឺគ្រោះថ្នាក់បំផុត ដែលមិនគួលើកលែង”។
កម្លាំងសមត្ថកិច្ចប៉ុស្តិ៍នគរបាលភ្នំពេញថ្មី នាព្រឹកថ្ងៃទី២០ ខែកញ្ញា ឆ្នាំ២០២០នេះ បានឃាត់ខ្លួនជនសង្ស័យម្នាក់ ករណីប្រើហិង្សាវាយដំលើនារីជាអតីតសង្សារ បណ្ដាលឱ្យនាងរងរបួសជាំហើមពេញមុខ និងគុំត្រចៀកស្ដាំ។
ហេតុការណ៍នេះបានកើតឡើងនៅក្នុងបន្ទប់ជួលលេខ ៤០១ ជាន់ទី៤ ផ្លូ១៩៧៦ ភូមិពោងពាយ សង្កាត់ភ្នំពេញថ្មី ខណ្ឌសែនសុខ នាវេលាម៉ោង ១និង៣០ នាទីយប់រំលងអធ្រាត្រថ្ងៃទី២០ ខែកញ្ញា។
បុរសជាជនសង្ស័យមានឈ្មោះ ប៉ា សុវណ្ណារិទ្ធ អាយុ២០ឆ្នាំ ស្នាក់នៅផ្ទះលេខ ៥៦៣ ផ្លូវលំ ភូមិព្រៃជីសាក់ សង្កាត់ចោមចៅ១ ខណ្ឌពោធិ៍សែនជ័យ។ ចំណែកជនរងគ្រោះមានឈ្មោះ នួន គឹមឡាង អាយុ២៥ឆ្នាំ ស្នាក់នៅបន្ទប់កើតហេតុខាងលើ។
បច្ចុប្បន្នជនសង្ស័យកំពុងឃាត់ខ្លួននៅអធិការដ្ឋាននគរបាលខណ្ឌសែនសុខ ដើម្បីអនុវត្តតាមនីតិវិធីច្បាប់៕ ដោយ៖កូឡាប