កំពង់ស្ពឺ ÷ស្នងការនគរបាលខេត្តកំពង់ស្ពឺ បានឲ្យដឹងថា កាលពីថ្ងៃទី២០ ខែកញ្ញា ឆ្នាំ២០២០ កម្លាំងអធិការនគរបាលស្រុកបសេដ្ឋ អនុវត្តដីកាបង្គាប់ឲ្យនាំខ្លួន ជនត្រូវចោទ៤នាក់ពាក់ព័ន្ធករណីទន្ទ្រានយកដីរដ្ឋ កាប់ព្រៃឈើបំផ្លិចបំផ្លាញបង្គោលព្រំដីព្រៃសហគមន៍។
ជនត្រូវចោទ៤នាក់៖ ១.ឈ្មោះសៀង ណាក់ ភេទប្រុសអាយុ ៤៣ ឆ្នាំ ភូមិត្រពាំងពើក ឃុំកាត់ភ្លុក ស្រុកបសេដ្ឋ ។ ២.ឈ្មោះ ម៉ាក់ ឯម ភេទប្រុសអាយុ៦៧ឆ្នាំ ភូមិត្រពាំងពើក ឃុំកាត់ភ្លុក ស្រុកបសេដ្ឋ ។ ៣.ឈ្មោះ យួន ណម ភេទប្រុស អាយុ៤១ ឆ្នាំ ភូមិត្រពាំងពើក ឃុំកាត់ភ្លុក ស្រុកបសេដ្ឋ ។ ៤.ឈ្មោះ សួន សុខុម ភេទប្រុស អាយុ៣៧ ឆ្នាំ ភូមិត្រពាំងពើកឃុំកាត់ភ្លុកស្រុកបសេដ្ឋ។
យោងតាមការបញ្ជាក់ពីលោកវរសេនីយ៍ឯក ហេង សំរេច នាយការិយាល័យ បានឱ្យដឹងថា កម្លាំងនគរបាលបានអនុវត្ដតាមដីកាបង្គាប់ឲ្យនាំខ្លួនលេខៈ ១៥២៨៦ ,១៥២៨៨ ,១៥២៨៩ ,១៥២៩០ របស់លោក ងួន វុទ្ធី ចៅក្រមស៉ើបសួរ នៃសាលាដំបូងខេត្តកំពង់ស្ពឺ ពីបទៈកាប់រានព្រៃ ហ៊ុមព័ទ្ធកាន់កាប់ដីព្រៃឈឺ ដកបំផ្លាញបង្គោលព្រំប្រទល់ព្រៃឈើ និងដកបំផ្លាញកូនឈើ ប្រព្រឹត្តទៅនៅភូមិដូង ឃុំជាំសង្កែ ស្រុកភ្នំស្រួច ខេត្តកំពង់ស្ពឺ កាលពីអំឡុងឆ្នាំ ១៩៨៨ ,១៩៩៣ ,១៩៩៧,១៩៩៩ ។
បច្ចុប្បន្នជនត្រូវចោទទាំង៤នាក់ត្រូវបានបញ្ជូន មកការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្ដកំពង់ស្ពឺ ចាត់ការនីតិវិធីបន្ដ៕ដោយ៖កូឡាប
