ភ្នំពេញ ៖ ដូចដែលបងប្អូនមហាជនបានទទួលជ្រាប និងផ្ទុះកំហឹងរួចហើយ ចំពោះបុរសចិត្តកំណាចម្នាក់ ដែលបានប្រើអំពើហិង្សាដ៏សាហាវឃោរឃៅមកលើនារីម្នាក់ជាសង្សារ បណ្តាលឲ្យបែកជាំហើមពេញមុខគួរឲ្យអាសូរ។
ទោះយ៉ាងណា ក្រោយវីដេអូបង្ហាញឲ្យឃើញស្លាកស្នាមរបួសយ៉ាងធ្ងន់ធ្ងរនៅលើផ្ទៃមុខនារីជាងសង្សារ ត្រូវបានគេចែករំលែកនៅលើបណ្តាញសង្គមហ្វេសប៊ុកមិនបានប៉ុន្មានម៉ោង បុរសមានចិត្តកាចសាហាវមិនស្គាល់ទោសទណ្ឌរូបនោះ ក៏ត្រូវបានសមត្ថកិច្ចធ្វើការឃាត់ខ្លួន ដើម្បីចាត់ការទៅតាមផ្លូវច្បាប់ ក្រោយពីបានបង្កហិង្សាមកលើសង្សាររបស់ខ្លួនបណ្តាលឲ្យរងរបួសធ្ងន់ធ្ងរ ស្ថិតនៅម្ដុំផ្សារក្រមួន ស្ថិតក្នុងសង្កាត់ភ្នំពេញថ្មី ខណ្ឌសែនសុខរាជធានីភ្នំពេញកាលពីវេលាម៉ោងជិត៣រំលងអធ្រាត្រឈានចូលថ្ងៃទី២០ ខែកញ្ញា ឆ្នាំ២០២០។
យ៉ាងណាមិញ អ្វីដែលបានធ្វើឲ្យគ្រប់គ្នាសម្តែងការហួសចិត្ត និងមិនអាចទទួលយកបានឡើយ ក្រោយពីបានឃើញកាយវិការរបស់បុរសនេះ ខណៈដៃកំពុងជាប់ខ្នោះ ចាប់កាន់ដៃអង្វរលន់តួ សូមឲ្យនាងលើកលែងទោសម្តងទៀត ដោយសន្យាឈប់ធ្វើបែបនេះតទៅទៀតហើយ ក្រោយពីបានវាយស្ទើររាប់ភ្លេច។
ជាមួយនឹងកាយវិការហាក់សម្តែងឲ្យល្អមើលនេះផងដែរ ដោយក្នុងនោះ បងប្អូនអ្នកប្រើប្រាស់បណ្តាញសង្គមបានចំអកឲ្យបែបៗនេះថា៖ «កន្ទុយខ្វៀនអបមិនត្រង់ ដោះឈើអបចេញខ្វង់ដដែល, កុំមកលួងលោមធ្វើល្អ ដេកគុកទៅអានាង»។
ចំណែកអ្នកដទៃទៀត ក៏បានឲ្យយោបល់ទៅកាន់នារីរងគ្រោះថា៖ «ចាំទុកថាបើមិនដកខ្លួនចេញថ្ងៃនេះ អ្នកអស់ឱកាសមើលថែខ្លួនឯងហើយ(សម្រាប់ខ្ញុំសុំចប់)!, លើកលែងម្ដងនេះទៀត ថ្ងៃក្រោយវាសម្លាប់ចោលហ្មងឱកាសមានសម្រាប់អ្នក ចង់កែខ្លួនតែអាតិរច្ឆាននេះដូចមិនមែនទើបតែម្ដងនេះទេ, បើត្រូវគ្នាវិញថ្ងៃក្រោយ វាមិនត្រឹមតែវាយទេ វាអាចនឹងសម្លាប់ចោលក៏ថាបាន បើបងស្រីស្រឡាញ់ខ្លូនបែកពីវាទៅ»៕ ដោយ៖ លឹមហុង
