ភ្នំពេញ៖ កញ្ញា នី មុនីនាថ នោះប្រិយមិត្តជាច្រើនបានស្គាល់ហើយថា ជាតារាស្រីមួយដួងដែលតែងលេចមុខដើរជាតួឯក។ តារាសម្តែងស្រីរូបនេះ បានឆក់យកចិត្តបេះដូងអ្នកទស្សនាបានយ៉ាងច្រើនកាលពីប៉ុន្មានឆ្នាំមុន និយាយរួមទៅគឺចាប់តាំងពីកញ្ញាទើបចូលប្រឡូកជាតារាសម្តែងខ្សែភាពយន្តដំបូងៗមកម្ល៉េះ តាមរយៈឈុតឆាកមនោសញ្ចេតនាកំសត់ៗ និងពិសេសពូកែសម្រក់ទឹកភ្នែក ដែលពិតជាស័ក្តិសមនឹងទឹកមុខ និងព្រមទាំងកាយវិការដ៏ទន់ភ្លន់របស់នាង។
ដោយឡែក និយាយដល់រឿងជីវិតគូក្រៅឆាកវិញ ប្រហែលក៏មិនខុសនៅក្នុងរឿងយ៉ាងដូច្នោះដែរ ដោយកាលពី ៣ ឆ្នាំ មុននេះ កញ្ញា នី មុនីនាថ ធ្លាប់មានគូដណ្តឹងជាបុរសអាណិកជនម្នាក់ ប៉ុន្តែ ស្នេហារបស់អ្នកទាំងពីរបានឈានដល់ការបែកបាក់ ដែលធ្វើឲ្យនាងឈឺចាប់ខ្លាំងបំផុត។
យ៉ាងណាមិញ ងាកមកចាប់អារម្មណ៍នៅក្នុងកម្មវិធី 3 Fun Talkshow ពេលសួរដល់ក្នុងមួយឆាកជីវិតសោកស្តាយអ្វីជាងគេ? កញ្ញា នី មុនីនាថា បានទម្លាយចេញទាំងអួលដើមកថា ក្នុងមួយជីវិតរឿងដែលឈឺចាប់សោកស្តាយជាងគេគឺរឿងជីវិតគូ ព្រោះដោយសារកាលពីមួយរយៈមុន កញ្ញាមានគូដណ្តឹង សង្ឃឹមថានឹងរៀបការក្រាបក្បាលដល់កន្ទេល មានជីវិតគូត្រឹមត្រូវនឹងគេ តែធាតុពិតមិនទទួលបានថ្ងៃដ៏ពិសេសនេះ ហើយថែមទាំងទទួលនូវកេរឈ្មោះមិនល្អ ដែលកញ្ញាខំកសាងក្នុងវិស័យសិល្បៈតាំងពីយូរ ដែលមហាជនកោតសរសើរថាកញ្ញាជាតារាល្អ អត់ដែលមានរឿងអាស្រូវ។ ប៉ុន្តែ ដល់ពេលជួបរឿងបែបនេះ វាពិតជាធ្វើឲ្យនាងបាក់ទឹកចិត្ត និងសោកស្តាយខ្លាំងក្នុងមួយឆាកជីវិត ព្រោះជាប់ឈ្មោះមិនល្អត្រូវមហាជនមួយចំនួនចោទថា អ្នកសិល្បៈតែប៉ុណ្ណឹង ដើរតែបោកប្រាស់គេ តែធាតុពិត ពួកគាត់ពុំបានដឹងរឿងផ្ទៃក្នុងរបស់អ្នកទាំងពីរ ដែលពុំអាចទទួលយកជីវិតរួមរស់នៅជាមួយគ្នាបាន ព្រោះតែការមិនយល់ចិត្តគ្នា។
កញ្ញាក៏បានបន្ថែមទៀតថា ចំណុចដែលពេញចិត្តជាងគេមិនថាជួបរឿងអ្វី គឺនៅតែញញឹម ពីព្រោះកញ្ញាបានគិតថាជាមេគ្រួសារម្នាក់ ត្រូវប្រឈមដោះស្រាយគ្រប់បញ្ហាទាំងប៉ាឈឺត្រូវនាំទៅពេទ្យ ប៉ាម៉ាក់ឈ្លោះទាស់ទែងគ្នាក៏កញ្ញាធ្វើជាអាជ្ញាកណ្តាលផងដែរ។ ហេតុនេះកញ្ញាត្រូវញញឹមជានិច្ចមិនថាជាមួយមហាជន ឬ ក្រុមការងារ។
គួរបញ្ជាក់ផងដែរថា នី មុនីនាថ បានភ្ជាប់ពាក្យស្ងាត់ៗជាមួយអាណិកជនខ្មែរ រស់នៅសហរដ្ឋអាមេរិក លោក អ៊ុង សូឡាង ក្នុងអំឡុងឆ្នាំ២០១៤។ ប៉ុន្តែ គម្រោងរៀបការត្រូវបានផ្តាច់ទៅវិញ ក្រោយផ្ទុះរឿងត្រូវអតីតគូដណ្តឹងប្តឹងទាមទារប្រាក់ដែលធ្លាប់បានឧបត្ថម្ភទៅនាងនាពេលកន្លងមកចំនួន១២ម៉ឺនដុល្លារ ដែលនាំឱ្យមានការភ្ញាក់ផ្អើលខ្លាំងទាំងនៅក្នុងសង្គមសិល្បៈ និងមជ្ឈដ្ឋានទូទៅ៕ ដោយ៖ លឹម ហុង
