ភ្នំពេញ៖ ឯកឧត្តម កែវ រ៉េមី ប្រធានសហព័ន្ធកីឡាតេក្វាន់ដូ អាយ.ធី.អែហ្វ (ITF) កម្ពុជា មានប្រសាសន៍ថា «ក្នុងការទទួលធ្វើម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣ ឲ្យតែបើកផ្លូវឲ្យប្រភេទកីឡាតេក្វាន់ដូ ITF ចូលរួមប្រកួតក្នុងស៊ីហ្គេមនោះ យើងមិនធ្វើឲ្យក្រសួងអប់រំ យុវជន និងកីឡា គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) ជាពិសេសគឺមិនធ្វើឲ្យសម្តេចតេជោ ហ៊ុន សែន ខកចិត្តជាដាច់ខាត»។
នេះជាការប្តេជ្ញាចិត្តខ្ពស់របស់ឯកឧត្តមប្រធាន កែវ រ៉េមី នៅក្នុងឱកាសបើកវគ្គបណ្តុះបណ្តាលចៅក្រម និងអាជ្ញាកណ្តាលកម្រិត «ក» កីឡាតេក្វាន់ដូ IFT កម្ពុជា កាលពីល្ងាចថ្ងៃទី២១ ខែកញ្ញា ឆ្នាំ២០២០ នៅពហុកីឡដ្ឋានជាតិអូឡាំពិក រយៈពេល៦ថ្ងៃ ចាប់ពីថ្ងៃទី២១ ដល់ថ្ងៃទី២៦ ខែកញ្ញា ឆ្នាំ២០២០ ដើម្បីត្រៀមខ្លួនក្នុងការប្រកួតកីឡាស៊ីហ្គេម ឆ្នាំ២០២៣ នៅកម្ពុជា។ ការប្តេជ្ញាបែបនេះ គឺដោយសារឯកឧត្តមបានដាក់ការជឿជាក់ទៅលើចៅក្រម អាជ្ញាកណ្តាល ក៏ដូចជាកីឡាករ កីឡាការិនីតេក្វាន់ដូ ITF កម្ពុជា ក្នុងការសម្រួចគោលដៅដ៏ធំចម្បងរបស់ខ្លួន ឆ្ពោះទៅទទួលរៀបចំធ្វើជាម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣ ឲ្យទទួលបានជោគជ័យជាប្រវត្តិសាស្ត្រជាលើកដំបូងរបស់កម្ពុជា។
ឯកឧត្តម កែវ រ៉េមី ដែលជាអនុប្រធានសហព័ន្ធកីឡាតេក្វាន់ដូ ITF អន្តរជាតិ និងជាប្រធានសហព័ន្ធកីឡាតេក្វាន់ដូ ITF អាស៊ីអាគ្នេយ៍ផងនោះ បានក្រើនរំឭកជូនដល់សិក្ខាកាម ដែលជាចៅក្រម អាជ្ញាកណ្តាលកីឡាតេក្វាន់ដូ ITF ទាំងអស់គប្បីត្រូវផ្តល់ភាពយុត្តិធម៌ ក្នុងការកាត់សេចក្តី ផ្តល់ពិន្ទុសម្រាប់ការប្រកួតរបស់កីឡាករ កីឡាការិនី ដោយផ្តល់នូវភាពយុត្តិធម៌ ដែលទទួលយកបាន និងមិនប្រកាន់បក្ខពួក។ ដើម្បីធ្វើឲ្យសម្រេចបាននូវភាពយុត្តិធម៌នេះ សហព័ន្ធបានធ្វើកំណែទម្រង់ផ្ទៃក្នុង ដោយកំពុងជំរុញប្រភេទកីឡាជំនាញមួយនេះ ឲ្យចូលក្នុងភាពភ្ញាក់ផ្អើល និងទទួលបានការគាំទ្រ រហូតដល់ក្រសួងអប់រំ យុវជន និងកីឡា ដាក់បញ្ជូលតេក្វាន់ដូ ITF នៅក្នុងការប្រកួតកីឡាជាតិ និងដាក់ឲ្យត្រៀមខ្លួន សម្រាប់ការប្រកួតស៊ីហ្គេម លើកទី៣២ ឆ្នាំ២០២៣ ទៀតផង។ ដើម្បីឲ្យកាន់តែរីកចម្រើនបន្ថែមទៀត គឺត្រូវ ពឹងផ្អែកទៅលើការដាក់ពិន្ទុរបស់ចៅក្រម អាជ្ញាកណ្តាល ដើម្បីផ្តល់ភាពយុត្តិធម៌ជូនកីឡាករ កីឡាការិនី ដោយឈ្នះ ដោយសមត្ថភាពពិតប្រាកដ ក្នុងការប្រកួតនានា។ «ប្រសិនបើឈ្នះក្នុងភាពលម្អៀង ប្រកាន់បក្ខពួក តើការឈ្នះនោះ មានប្រយោជន៍អ្វី មានន័យថា ប្រសិនបើឈ្នះ គឺចេញទៅឲ្យគេស្ញប់ស្ញែង ដើម្បីឲ្យគេទទួលស្គាល់ថា ពិតជាពូកែប្រកបដោយសមត្ថភាពពិតប្រាកដតែម្តង។ យើងចង់បានការឈ្នះដោយរបៀបនេះ»។
ជាមួយនឹងភាពជឿជាក់នេះ ត្រូវបានឯកឧត្តមបើកចំហររហូតដល់ឲ្យស្ត្រីម៉ាឡេស៊ីម្នាក់ ជាម្ចាស់ខ្សែក្រវាត់ខ្មៅ៧ដាន់ទទួលខុសត្រូវលើចៅក្រម អាជ្ញាកណ្តាល ក្នុងពេលទទួលធ្វើ ស៊ីហ្គេម ឆ្នាំ២០២៣នោះ ដោយផ្តល់ឲ្យជនជាតិគេ ធ្វើជាប្រធានចៅក្រម អាជ្ញាកណ្តាល ដោយសារតែឯកឧត្តមជឿជាក់លើចៅក្រម អាជ្ញាកណ្តាល និងកីឡាករ កីឡាការិនីកម្ពុជា ដែលត្រូវតែខិតខំដុះខាត់សមត្ថភាពឲ្យកាន់តែខ្លាំងក្លា ដើម្បីអភិវឌ្ឍខ្លួនចូលក្នុងកម្រិតតំបន់ ទ្វីប និងស្របតាមស្តង់ដារអន្តរជាតិ។
សូមបញ្ជាក់ថា សិក្ខាកាមដែលជាចៅក្រម អាជ្ញាកណ្តាល ក្នុងវគ្គបណ្តុះបណ្តាលកម្រិត «ក» នេះមានចំនួន ៣០នាក់ មកពីរាជធានី-ខេត្តចំនួន១១ ក្រោមការបង្រៀនពីលោក Master ឬ ឆុលណាំ ជាគ្រូអន្តរជាតិកម្រិតខ្សែក្រវ៉ាត់ខ្មៅ ៨ដាន់ និងជាប្រធានបច្ចេកទេសកីឡាតេក្វាន់ដូ ប្រចាំទ្វីបអាស៊ី រួមជាមួយលោក បួន ហ៊ីងសុធីយ៉ា អគ្គលេខាធិការសហព័ន្ធកីឡាតេក្វាន់ដូ ITF កម្ពុជា ជាគ្រូឧទ្ទេសផងដែរ៕ ដោយ៖បញ្ញាស័ក្តិ