ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានចូលរួមក្នុងកិច្ចប្រជុំជាន់ខ្ពស់រំលឹកខួបលើកទី ៧៥ នៃអង្គការសហប្រជាជាតិ ក្រោមមូលបទ៖ «អនាគតដែលយើងទាំងអស់គ្នាចង់បាន, សហប្រជាជាតិដែលយើងត្រូវការ ៖ ធានាឡើងវិញកិច្ចប្រឹងប្រែងរួមដើម្បីពហុភាគីនិយម» នៅថ្ងៃទី ២១ ខែ កញ្ញា ឆ្នាំ ២០២០។
សម្តេចតេជោ នាយករដ្ឋមន្ត្រី បានថ្លែងថា ជាការពិត, ការប្រារព្ធខួបលើកទី ៧៥ នេះ គឺស្ថិតនៅក្នុងកាលៈទេសៈនៃការបង្អាក់រំខានដ៏ ខ្លាំងក្លាចំពោះពិភពលោក បង្កឡើងដោយវិបត្តិសុខភាពសកលពុំធ្លាប់មាន ដែលបានធ្វើឲ្យប៉ះពាល់ ដល់សេដ្ឋកិច្ច និង សង្គមយ៉ាងធ្ងន់ធ្ងរ ។ បន្ទាប់ពីភាពខ្ទេចខ្ទាំក្នុងភ្លើងសង្គ្រាមលោកលើកទី ២, នៅក្នុងបុព្វកថានៃធម្មនុញ្ញអង្គការសហប្រជាជាតិ , មេដឹកនាំនៃពិភពលោកបានប្រកាសថា ការប្រើប្រាស់នូវ «យន្តការអន្តរជាតិសម្រាប់ការលើកស្ទួយសេដ្ឋកិច្ច និង ការរីកចម្រើនក្នុងសង្គមសម្រាប់ប្រជាជនគ្រប់រូប” គឺជាមធ្យោបាយជាសារវន្តក្នុងការធានាសុខសន្តិភាព , ការលើកកម្ពស់សិទ្ធិមនុស្ស និងធានានូវវឌ្ឍនភាពសង្គម ។ ផ្ទុយពីទស្សនវិស័យនេះនៃធម្មនុញ្ញអង្គការសហប្រជាជាតិដែលកំពុងតែស្ថិតនៅជាធរមាន, យើងសង្កេតឃើញថា «យន្តការអន្តរជាតិ» និង ការប្តេជ្ញាចិត្តរបស់យើងដើម្បីបុព្វហេតុនេះ កំពុងរងការបំផ្លិចបំផ្លាញ និង តម្រូវឲ្យមានការយកចិត្តទុកដាក់ជាបន្ទាន់ ។
សម្តេចនាយករដ្ឋមន្ត្រី មានប្រសាសន៍ថា ជាក់ស្តែង , យន្តការពហុភាគីនិយម កំពុងទទួលរងការវាយប្រហារយ៉ាងដំណំ ពិសេសគឺដោយសារទង្វើជាតិនិយមជ្រុល និង គាំពារនិយមរបស់ប្រទេសមហាអំណាចខ្លះលើសកលលោក ។
ជំនួសការទទួលបានការគាំទ្រ , ជារឿយៗ ប្រទេសកំពុងអភិវឌ្ឍន៍ តែងត្រូវបានប្រែក្លាយជាមុខព្រួញនៃការដាក់ទណ្ឌកម្ម ចំពោះកិច្ចដំណើរការប្រឹងប្រែងកសាងជាតិរបស់ខ្លួន ដែលមិនបានល្អ ឥតខ្ចោះស្របតាមស្តង់ដាររបស់ប្រទេសអភិវឌ្ឍន៍ ខណៈដែលសមត្ថភាពប្រទេសទន់ខ្សោយទាំងនោះ នៅមានការខ្វះខាត ក្នុងកិច្ចការពារសិទ្ធិមនុស្សជាមូលដ្ឋាន ដូចជា សិទ្ធិទទួលបានសន្តិភាព រានមានជីវិត, សិទ្ធិទទួលបានអាហារ , សិទ្ធិរស់ , ទីជម្រក និង ការងារ ជាដើម ។ នេះ គឺជាមូលហេតុមួយដែល ចូលរួមចំណែកក្នុងការបំផ្លិចបំផ្លាញយ៉ាងធ្ងន់ធ្ងរដល់កិច្ចប្រឹងប្រែងស្តារ និង អភិវឌ្ឍជាតិរបស់
ប្រទេសក្រីក្រ ពិសេស តាមរយៈការធ្វើនយោបាយូបនីយកម្មលើបញ្ហាសិទ្ធិមនុស្ស បម្រើឲ្យរបៀបវារៈ ភូមិសាស្ត្រនយោបាយរបស់ប្រទេសអភិវឌ្ឍន៍មួយចំនួន ។ ការប្រកួតប្រជែងរវាងមហាអំណាច បាន បង្កជាការរាំងខ្ទប់ដល់សិទ្ធិស្វ័យសម្រេចរបស់ប្រទេសកំពុងអភិវឌ្ឍន៍ ក្នុងការជ្រើសរើសយកឯករាជ្យ និង អធិបតេយ្យ ជាមាគ៌ាសម្រាប់ការអភិវឌ្ឍ ក៏ដូចជាក្នុងការជ្រើសរើសដៃគូមិត្តភាព ដើម្បីសន្តិភាព និង ការអភិវឌ្ឍ ។ ខ្ញុំគិតថា នេះ គឺជាឧបសគ្គពិតប្រាកដដ៏ចម្បងមួយរបស់ប្រទេសកំពុងអភិវឌ្ឍន៍ ក្នុងការធ្វើឲ្យសម្រេចបាននូវគោលដៅរបៀបវារៈឆ្នាំ ២០៣០ បន្ថែមពីលើបញ្ហាប្រឈមបន្ទាន់ទាំង ឡាយ ដែលបង្កឡើងដោយការឆ្លងរាតត្បាតនៃជំងឺកូវីដ-១៩ និងផលប៉ះពាល់នៃជំងឺនេះ មកលើ សង្គម និង សេដ្ឋកិច្ច ។
សម្តេចតេជោ បានលើកឡើងថា “គណៈប្រតិភូរបស់ខ្ញុំជឿជាក់ថា បណ្តារដ្ឋជាសមាជិកត្រូវអនុវត្តទៅតាមបទប្បញ្ញត្តិដែលមាន ចែងក្នុងសេចក្តីប្រកាសស្តីពីការរំឮកខួបទី ៧៥ នៃអង្គការសហប្រជាជាតិ ដែលយើងបានអនុម័តក្នុងកិច្ចប្រជុំនេះ”។
ជោគជ័យរបស់យើងក្នុងការអនុវត្តគោលដៅប្រកបដោយមហិច្ឆតា ដែលយើងទាំងអស់គ្នា បានកំណត់យក នឹងត្រួសត្រាយផ្លូវសម្រាប់មនុស្សជំនាន់ក្រោយ ឲ្យអាចរស់នៅបាន ក្នុងវិបុលភាព និង ក្នុងសង្គមមួយដែលប្រកបដោយបរិយាប័ន្ន និង ភាពសុខដុមរមនា ។
ប្រសិនបើយើងសម្លឹងមើលទៅអនាគត, សហគមន៍អន្តរជាតិ ពិតជាទាមទារចង់បានអង្គការ សហប្រជាជាតិដ៏រឹងមាំមួយ ដែលមានសមត្ថភាពពេញលេញ ក្នុងការដោះស្រាយគ្រប់បញ្ហាប្រឈម ដែលកើតមាននៅក្នុងតថភាពនៃសតវត្សទី ២១ ។ កម្ពុជាទទួលស្គាល់តួនាទីស្នូលនៃប្រព័ន្ធពហុភាគីនិយម ក្នុងការដោះស្រាយបញ្ហាប្រឈមសកលដ៏ស្មុគស្មាញដែលយើងកំពុងជួបប្រទះនាបច្ចុប្បន្ននេះ ដូចដែលសេចក្តីប្រកាសបានចែងយ៉ាងច្បាស់ថា «បញ្ហាប្រឈមរបស់យើងមានភាពប្រទាក់ក្រឡាគ្នា និង អាចដោះស្រាយបានតែតាមរយៈប្រព័ន្ធពហុភាគីនិយម ដែលត្រូវតែបានធ្វើឲ្យប្រសើរឡើងវិញ» ។ តាមរយៈការគោរពធម្មនុញ្ញអង្គការសហប្រជាតិ , តម្លាភាព , សាមគ្គីភាព, កិច្ចសហប្រតិបត្តិការ និង ការ ចូលរួមជាមួយគ្នាជាធ្លុងមួយ, សហគមន៍អន្តរជាតិពិតជានឹងអាចសម្រេចបាននូវអនាគតមួយដែល យើងទាំងអស់គ្នាចង់បាន និង អង្គការសហប្រជាជាតិមួយដែលយើងត្រូវការ ៕ដោយ៖កូឡាប
