ភ្នំពេញ៖ នៅឆ្នាំ២០១៨ ក្រសួងវប្បធម៌ កំពុងចាប់ផ្ដើមរៀបចំឯកសារ ប្រាសាទកោះកេរ និងប្រាសាទបន្ទាយឆ្មារ ដាក់ទៅអង្គការយូនីស្កូ ដើម្បីស្នើសុំដាក់ជាបញ្ជីបេតិកភណ្ឌពិភពលោក។
ក្នុងពិធីសន្និបាតបូកសរុបលទ្ធផលការងារប្រចាំឆ្នាំ២០១៧ និ លើកទិសដៅការងារឆ្នាំ២០១៨ នៅថ្ងៃទី៧ ខែកុម្ភៈ ឆ្នាំ២០១៨ នៅសាលសន្និសីទចតុមុខ លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានបញ្ជាក់ថា បច្ចុប្បន្ននេះ ក្រសួងបានរៀបចំឯកសារ ល្ខោនខោល និង ក្បាច់ល្បុក្កតោ បញ្ជូនទៅអង្គការយូនីស្កូរួចហើយ ហើយក៏កំពុងតែរៀបចំខាងតម្បាញសូត្រ និងកំពុងទាក់ទងទៅបណ្ដាប្រទេសមួយចំនួនទៀត ដើម្បីស្វែងរកយកវត្ថុបុរាណ មកកាន់ដែនដីកម្ពុជាវិញ។
លោកស្រី ភឿង សកុណា បានថ្លែងថា ឆ្នាំ២០១៧ ក្រសួង បានសម្រេចជោគជ័យចុះបញ្ជី ប្រាសាទសំបូរព្រៃគុក ជាបេតិកភណ្ឌពិភពលោក។ សម្រាប់ទិសដៅឆ្នាំ២០១៨ នេះ គឺយើងបានចាប់ផ្ដើមរៀបចំឯកសារ នៃកោះកេរ និង បន្ទាយឆ្មារ ដាក់ស្នើសុំ ផ្ញើទៅអង្គការយូនីស្កូ ដើម្បីដាក់ជាបញ្ជីបេតិកភណ្ឌ នៅពេលដែលរៀបចំឯកសារគ្រប់គ្រាន់ យើងនឹងបញ្ចូនទៅអង្គការយូនីស្កូរ។ ក្រសួងដាក់ផែនការ ស្រាវជ្រាវយកវត្ថុបុរាណ ដែលជាសម្បត្តិរូបិយ មកទុកជាកេរ្ដិ៍ដំណែល និងតម្កល់ទុក នៅសារមន្ទីរជាតិ ឬបញ្ជូនទៅកន្លែងដើមវិញ៕ ដោយ៖បញ្ញាស័ក្តិ
