ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានអញ្ជើញប្រគល់សញ្ញាបត្រជូនដល់គ្រូបង្រៀនកម្រិតមូលដ្ឋានឯកទេសអប់រំកាយ និងកីឡា ជំនាន់ទី២៧ និងជំនាន់ទី២៨ នៃវិទ្យាស្ថានជាតិអប់រំកាយ និងកីឡាចំនួន២៥១នាក់ ដែលបានបញ្ចប់ការសិក្សាដោយជោគជ័យ កាលពីឆ្នាំសិក្សា២០១៨-២០១៩ និងឆ្នាំសិក្សា២០១៩-២០២០ នៅព្រឹកថ្ងៃទី២៣ ខែកញ្ញា ឆ្នាំ២០២០ ហើយឯកឧត្តមបានវាយតម្លៃខ្ពស់ចំពោះលទ្ធផលការងារថ្មីៗ របស់វិទ្យាស្ថានជាតិអប់រំកាយ និងកីឡា ព្រមទាំងលោកគ្រូ អ្នកគ្រូ ដែលបានខិតខំឲ្យក្លាយជាធនធានប្រកបដោយប្រសិទ្ធភាព។
ឯកឧត្តមរដ្ឋមន្ត្រីមានប្រសាសន៍ថា លទ្ធផលនេះ បានដើរស្របគ្នាជាមួយនឹងគោលនយោបាយជាតិ ផែនការយុទ្ធសាស្ត្រអភិវឌ្ឍវិស័យអប់រំកាយ និងកីឡា និងកំណែទម្រង់ស៊ីជម្រៅការងារអប់រំកាយ និងកីឡា។ វិស័យកីឡាត្រូវបានប្រែក្លាយទៅជាវិស័យឈានមុខ និងទទួលការសាទរពីមហាជន ដោយសារកំណែទម្រង់វិស័យកីឡា ការសហការជាមួយគណៈកម្មាធិការជាតិអូឡាំពិកកម្ពុជា និងសហព័ន្ធកីឡាជាតិ និងបានផ្ទេរថវិកាគាំទ្រជូនដល់សហព័ន្ធកីឡាជាតិ។ កំណែទម្រង់នៃការប្រកួត និងជាការសាកល្បង ដើម្បីវាស់ស្ទង់គុណផលកីឡាជាតិ និងហ្វឹកហ្វឺនមន្ត្រីជំនាញឲ្យមានចំណេះដឹង បទពិសោធន៍គ្រប់គ្រាន់ ត្រៀមទទួលធ្វើម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣។
ឯកឧត្តមរដ្ឋមន្ត្រីក្រសួងអប់រំ យុវជន និងកីឡា បន្ថែមទៀតថា ទោះជាយ៉ាងណា ការអប់រំកាយ និងកីឡា នៅជួបប្រទះនូវបញ្ហាប្រឈមមួយចំនួនដូចជា ហេដ្ឋារចនាសម្ព័ន្ធកីឡានៅមានកម្រិត សមត្ថភាពមន្ត្រីអប់រំកាយ និងកីឡា កីឡាករ គ្រូបង្វឹក និងអាជ្ញាកណ្តាលនៅមានកម្រិត កង្វះធនធានសម្រាប់អនុវត្តផែនការគោល ឆ្ពោះទៅធ្វើជាម្ចាស់ផ្ទះ នៃការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣។ នៅពេលខាងមុខ ក្រសួងមានទិសដៅបន្តលើកកម្ពស់វិស័យកីឡា និងកិត្យានុភាពកម្ពុជាលើឆាកជាតិ និងអន្តរជាតិ ដោយត្រូវបន្តអនុវត្តកំណែទម្រង់វិស័យកីឡា និងពង្រឹងយន្តការដែលមានស្រាប់ ដើម្បីគាំទ្រការអភិវឌ្ឍវិស័យអប់រំកាយ និងកីឡា ដោយផ្តោតសំខាន់លើ៧ចំណុចសំខាន់ៗ រួមមាន៖ ១-ការពង្រឹងសហព័ន្ធកីឡា ការបណ្តុះបណ្តាល កីឡាករ គ្រូបង្វឹក អាជ្ញាកណ្តាល ចៅក្រម និងពង្រឹងការគ្រប់គ្រង់សហព័ន្ធ។ ២-រៀបចំទីលានកីឡាតាមស្តង់ដា ក្នុងគ្រឹះស្ថានសិក្សាដោយចាប់ពី១វិទ្យាល័យ ក្នុង១រាជធានី-ខេត្ត។ ៣-ពង្រឹង និងពង្រីកសកម្មភាពអប់រំកាយ ក្នុងម៉ោងសិក្សា និងការងារកីឡា ក្រៅម៉ោងសិក្សា។ ៤-រៀបចំកម្មវិធីបណ្តុះបណ្តាលគ្រូអប់រំកាយ និងកីឡាឲ្យដល់កម្រិតបរិញ្ញាបត្រ។ ៥-ជំរុញមហាជនឲ្យហាត់ប្រាណជាប្រចាំ និងផ្សារភ្ជាប់ សកម្មភាពអប់រំកាយ និងកីឡា ទៅនឹងកិច្ចការសង្គម វប្បធម៌ និងលុបបំបាត់បាតុភាពរំលោភបំពាន និងអំពើហិង្សាគ្រប់ប្រភេទ និងចាកផុតពីការប្រើប្រាស់គ្រឿងញៀន។ ៦-អភិវឌ្ឍសមត្ថភាពគ្រូបង្វឹក អនុរក្ស និងកីឡាករ កីឡាការិនី ជម្រើសជាតិថ្នាល និងទី៧ រៀបចំព្រឹត្តិការណ៍កីឡាជាតិ រៀងរាល់២ឆ្នាំម្តង សម្រាប់ត្រៀមធ្វើម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣ នៅកម្ពុជាផងដែរ។
ជាមួយគ្នានោះឯកឧត្តមបណ្ឌិតសភាចារ្យ ហង់ជួន ណារ៉ុន បានសម្តែងនូវអំណរគុណយ៉ាងជ្រាលជ្រៅចំពោះ វត្តមានចូលរួមរបស់ឯកឧត្តម MIKAMI Masahiro ឯកអគ្គរាជទូតប្រទេសជប៉ុនប្រចាំនៅកម្ពុជា តំណាងអង្គការ JICA និងអង្គការបេះដូងមាស ដែលបានអញ្ជើញចូលរួមអបអរសាទរ និងលើកទឹកចិត្តជូនដល់គ្រូបង្រៀនកម្រិតមូលដ្ឋាន ឯកទេសអប់រំកាយ និងកីឡា ដែលជាជ័យលាភីទាំងអស់ នាពេលនេះ៕ដោយ៖កូឡាប