កាលពីថ្ងៃទី២២ ខែកញ្ញា ឆ្នាំ២០២០ ប្រព័ន្ធផ្សព្វផ្សាយវៀតណាមជាច្រើនបានរាយការណ៍ថា អាជ្ញាធរនៅប្រទេសវៀតណាម បានរកឃើញស្រោមអនាម័យប្រើប្រាស់មួយចំនួនធំ ដែលត្រូវបានកែច្នៃ និងរក្សាទុកត្រៀមសម្រាប់លក់នៅលើទីផ្សារឡើងវិញ។ ការរកឃើញដ៏ភ្ញាក់ផ្អើលនេះបានកើតឡើង បន្ទាប់បីអាជ្ញាធរបានឆ្មក់ចូលរោងចក្រកែច្នៃខុសច្បាប់មួយកន្លែង កាលពីថ្ងៃសោរ៍សប្តាហ៍មុននេះ។
អាជ្ញាធរបានរកឃើញ និងរឹបអូសស្រោមអនាម័យប្រើរួចជិត ៣២៤,០០០ ស្រោម ( ឬ ប្រហែល ៣៦០ គីឡូក្រាម) ត្រូវបានកែច្នៃឡើងវិញនៅក្នុងរោងចក្រនោះ ដែលមានទីតាំងស្ថិតនៅក្នុងខេត្ត Binh Duong ភាគខាងត្បូងនៃប្រទេសវៀតណាម។
នៅពេលចុះត្រួតពិនិត្យ អាជ្ញាធរបានរកឃើញថា ស្រោមអនាម័យប្រើប្រាស់រួចទាំងនោះ កំពុងដំណើរការកែច្នៃ និងពុំមានដាក់ស្លាកយីហោអ្វីនោះទេ។
ស្ត្រីឈ្មោះ Pham Thi Thanh Ngoc អាយុ ៣៣ ឆ្នាំ ជាម្ចាស់រោងចក្របានសារភាពថា គាត់បានទទួលស្រោមអនាម័យប្រើរួចទាំងនោះពីមនុស្សដែលមិនស្គាល់។ បន្ទាប់មក យកស្រោមអនាម័យទាំងនោះមកលាងសម្អាត សម្ងួត និងដំណើរការវេចខ្ចប់ដោយឧបករណ៍។
ម្ចាស់រោងចក្រកែច្នៃស្រោមអនាម័យប្រើប្រាស់រួចខាងលើ ក៏បានប្រាប់ត្រង់ៗថា គាត់បានទិញស្រោមទាំងនេះពីបុរសម្នាក់ដូចបានជម្រាបខាងលើ ដែលតែងតែប្រមូលទិញវាពីសណ្ឋារគារនានានៅក្នុងតំបន់ ដូចទិញអេតចាយអ៊ីចឹង៕ ដោយ៖ លឹម ហុង (ប្រភព៖ tekdeeps)
