ភ្នំពេញ ៖ សម្តេចតេជោ ហ៊ុន សែន បានថ្លែងថា បច្ចុប្បន្នកម្ពុជាមានលទ្ធភាពផលិតស៊ីម៉ង់ត៍បានប្រមាណ ៧លានតោនក្នុងមួយឆ្នាំ ជាមួយរោងចក្រចំនួន៤ ដែលបានដើរតួនាទីសំខាន់សម្រាប់បំពេញតម្រូវការលើវិស័យសំណង់ និងផ្លូវមួយចំនួនផងដែរ។
នៅព្រឹកថ្ងៃព្រហស្បតិ៍ ទី៨ ខែកុម្ភៈ ឆ្នាំ២០១៨នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញជាអធិបតីភាពដ៏ខ្ពង់ខ្ពស់សម្ពោធដាក់ឲ្យប្រើប្រាស់រោងចក្រផលិតស៊ីម៉ង់ត៍របស់ក្រុមហ៊ុន ជីបម៉ុង អ៊ីនស៊ី ស៊ីមេន ខបភើរេសិន (Chip Mong Insee-CMIC) ដែលមានទីតាំងនៅតាមបណ្តោយផ្លូវជាតិលេខ៣១ ក្នុងភូមិព្រៃតាព្រិត ឃុំស្តេចគង់ខាងលិច ស្រុកបន្ទាយមាស ខេត្តកំពត ចម្ងាយប្រមាណ ១២៥គីឡូម៉ែត្រពីទីក្រុងភ្នំពេញ។
សម្តេចតេជោ ហ៊ុន សែន បានមានប្រសាសន៍ថា ប្រទេសកម្ពុជា ដែលបាន បង្កើតរោងចក្រផលិតស៊ីម៉ងត៍ផ្ទាល់ខ្លួននៅទីនេះ ហើយការបង្កើតរោងចក្រនេះ គឺជាការបង្កើតឧស្សាហកម្មធុនធ្ងន់មួយរបស់ប្រទេសកម្ពុជា ក្នុងការចូលរួមចំណែកនៃវិស័យសំណង់ ជាពិសេសការសាងសង់សំណង់អាគារផ្សេងៗដែលជាតម្រូវការរបស់ប្រជាពលរដ្ឋ និងគ្រប់វិស័យនានា ។ ស៊ីម៉ងត៍ គឺជាតម្រូវការដ៏ចាំបាច់នៅលើពិភពលោក ពីព្រោះបច្ចុប្បន្ននេះ គ្រប់សំណង់ទាំងអស់សុទ្ធតែត្រូវ ការប្រើប្រាស់ស៊ីម៉ងត៍ ដូចជាអគារបុរីលំនៅដ្ឋាន សាលារៀន វត្តអារាម និងផ្លូវបេតុងជាដើម។ រោងចក្រផលិតស៊ីម៉ងត៍ដ៏ធំមួយនេះគឺបានវិនិយោគក្នុងទឹកប្រាក់ប្រមាណ ២៦២លានដុល្លារអាមេរិក ដែលជាវិនិយោគរួមគ្នារវាងក្រុមហ៊ុន ជីបម៉ុងគ្រុប របស់កម្ពុជាចំនួនទឹកប្រាក់៦០% និងក្រុមហ៊ុនស្យ៉ាមស៊ីធីស៊ីមេនរបស់ប្រទេសថៃចំនួនទឹកប្រាក់៤០% ដែលមានសមត្ថភាពផលិតស៊ីម៉ងត៍បាន ៥.០០០តោនក្នុងមួយថ្ងៃ ឬ ១,៧លានតោនក្នុងមួយឆ្នាំ ។
សម្តេចតេជោ ហ៊ុន សែន បានមានប្រសាសន៍បញ្ជាក់ថា ខេត្តកំពត គឺជាខេត្ត ដែលបានបញ្ចប់សង្គ្រាមក្នុងឆ្នាំ១៩៩៦ តាមរយៈនយោបាយឈ្នះឈ្នះដែលរាជរដ្ឋាភិបាលបានដាក់ចេញហើយពេលនេះខេត្តកំពតបានប្រែក្លាយទៅជាខេត្តដែលមានការអភិវឌ្ឍន៍រីកចម្រើនស្ទើរលើគ្រប់វិស័យ ជាពិសេសលើផ្នែកហេដ្ឋារចនាសម្ព័ន្ធ និងទេសចរណ៍ ព្រោះជាខេត្តជាប់តំបន់សមុទ្រ ។ កំពតក៏ជាខេត្តដែលមានផលិតអំបិលផ្ទាល់ខ្លួន និងចែកចាយអំបិលទៅកាន់បណ្តាខេត្តផ្សេងៗទៀតផង។
តាមរយៈការបង្កើតរោងចក្រនេះក៏ជាការផ្តល់ការងារមួយចំនួនដល់ពលរដ្ឋកម្ពុជាប្រមាណជាង៤០០នាក់ ផងដែរ ជាពិសេសអ្នកដែលនៅខេត្តកំពតនេះតែម្តង។ កម្ពុជាក៏ត្រូវការផលិតស៊ីម៉ងត៍ ដើម្បីធ្វើការនាំចេញផងដែរ ដូចច្នេះកម្ពុជាត្រូវបង្កើនសមត្ថភាពបន្ថែមទៀតក្នុងវិស័យឧស្សាហកម្មមួយនេះ។
សម្តេចតេជោ ហ៊ុន សែន នាយករដ្ឋមន្ត្រី បានថ្លែអំណរគុណចំពោះប្រជាពលរដ្ឋទូទាំងខេត្តកំពត ដែលកន្លងមកតែងតែជឿជាក់គាំទ្រ និងបោះឆ្នោតជូនគណបក្សប្រជាជនកម្ពុជា ហើយសម្តេចតេជោ សូមអោយប្រជាពលរដ្ឋទាំងអស់ចូលរួមគាំទ្រជាបន្តទៀត។ សម្តេចតេជោ សន្យាថានឹងនៅរួមដំណើរជាមួយប្រជាពលរដ្ឋកម្ពុជាក្នុងការដឹកនាំប្រទេសមិនតិចជាង១០ឆ្នាំទៅមុខទៀត។
សម្តេចតេជោ ហ៊ុន សែន បានថ្លែងប្រឆាំងចំពោះនយោបាយគាំពារនិយមរបស់ប្រទេសមួយចំនួនលើវិស័យពាណិជ្ជកម្ម ហើយការប្រកាន់នយោបាយគាំពារនិយម នឹងធ្វើឲ្យប្រទេសនោះក្លាយទៅជាឯកោ។ សម្តេចប្រមុខរាជរដ្ឋាភិបាល បានគូសបញ្ជាក់ថា តម្រូវការស៊ីម៉ងត៍នាពេលបច្ចុប្បន្ន គឺកាន់តែខ្ពស់ ព្រោះតែការសាងសង់កំពុងតែកើនឡើងខ្ពស់។សម្តេចតេជោ ហ៊ុន សែន បានថ្លែងថា ខេត្តកំពតមានធនធានពីធម្មជាតិច្រើនសម្រាប់ផលិតចេញនូវផលិតផលនានា ដូចជាការការផលិតអំបិល និងមានថ្ម មានដីសម្រាប់ផលិត ស៊ីម៉ងត៍ជាដើម។ សម្តេចតេជោក៏បានមើលឃើញថា សេដ្ឋកិច្ចក្នុងខេត្តកំពតមានការរីកចម្រើនច្រើន តែមិនទាន់គ្រប់គ្រាន់នៅឡើយទេ ដែលទាមទារឲ្យមានការប្រឹងប្រែងរួមគ្នាបន្ថែមទៀត៕ ដោយ៖បញ្ញាស័ក្តិ
