ភ្នំពេញ៖ ពាក្យថាស្នេហា ឬ គ្រាន់តែជាគូសង្សារ នោះយើងម្នាក់ៗមិនអាចកំណត់ថាពីរនាក់នេះពីរនាក់នោះ នឹងក្លាយជាគូជីវិតនឹងគ្នាបានទេ បើទោះជាពួកគេបង្ហាញភាពស្និទ្ធស្នាលខ្លាំង ដែលសឹងតែស្គាល់ចិត្តថ្លើមគ្នាស៊ីជម្រៅយ៉ាងណា តែបែរជាគ្មាននិស្ស័យជាស្នេហ៍ និងបានត្រឹមជាមិត្តនឹងគ្នារហូតទៅវិញ។ តួយ៉ាងដូចជាតារាចម្រៀងប្រុសស្រី៣ដួងនេះអ៊ីចឹង បើទោះជាត្រូវបានមហាជនមើលឃើញថាអ្នកទាំងបីពិតជាស័ក្តិសមគ្នាខ្លាំង តែចុងក្រោយគឺគ្មានអ្វីក្រៅពីមិត្តដដែល ដែលស្ទើរតែមិនគួរឲ្យជឿ។
១- ឱក សុគន្ធកញ្ញា និង ឆន សុវណ្ណរាជ
ពិតមែនហើយ បើទោះជាកន្លែងមក តារាទាំងពីរដួងនេះតែងតែងបង្ហាញភាពផ្អែមល្ហែមនឹងគ្នាស្ទើរតែគ្រប់ពេល និងត្រូវបានមហាជនថាពិតជាស័ក្តិសមគ្នាយ៉ាងណាក៏ដោយ ប៉ុន្តែ ទំនាក់ទំនងរវាងអ្នកទាំងពីរមិនអាចក្លាយជាស្នេហានឹងបាននោះទេ ព្រោះថា ពេលនេះ សុគន្ធកញ្ញា បានរកឃើញដៃគូជីវិតពិតប្រាកដ រៀបការមានកូនប្រុសម្នាក់ បង្កើតគ្រួសារមួយកំពុងមានក្តីសុខ និងសុភមង្គលយ៉ាងខ្លាំង។
២- ខេមរៈ សិរីមន្ត និង សុខ ពិសី
ទំនាក់ទំនងរវាងលោក ខេមរៈ សិរីមន្ត និងកញ្ញា សុខ ពិសី ក៏មិនខុសពីដៃគូតារាចម្រៀងទាំងពីរខាងលើប៉ុន្មាននោះដែរ ព្រោះថា ខេមរៈ សិរីមន្ត បានរកឃើញដៃគូជីវិតរៀបការប្រពន្ធតាំងពីឆ្នាំ២០០៩ មកម្ល៉េះ ។ ហេតុនេះ ទំនាក់ទំនងដ៏ស្និទ្ធស្នាលរវាងអ្នកទាំងពីរ ដែលត្រូវបានមហាជនផ្សំផ្គុំ ចុងក្រោយបានត្រឹមរាប់អានគ្នាជាមិត្តប៉ុណ្ណោះ។
៣- នីកូ និង ពេជ្រ សូលីកា
តារាចម្រៀងវ័យក្មេងដ៏ស័ក្តិសមបំផុតមួយនេះវិញ ក៏មិនអាចក្លាយជាដៃគូជីវិតនឹងគ្នាដែរ ព្រោះថា ពេជ្រ សូលីកា ក៏រកឃើញដៃគូជីវិតបង្កើតបានកូនប្រុសម្នាក់រួចហើយ បន្ទាប់ពីរៀបការតាមប្រពៃណីជាមួយអ្នកជំនួញវ័យក្មេងរូបសង្ហាម្នាក់គឺលោក គឹម ហាន កាលពីអំឡុងឆ្នាំ២០១៩៕ ដោយ៖ លឹម ហុង
