ស្ទឹងត្រែង៖ ចៅក្រមស៊ើបសួរ នៃសាលាដំបូងខេត្តស្ទឹងត្រែង បានសម្រេចចេញដីកាឃុំខ្លួនស្ត្រីម្នាក់ ដែលចាក់សម្លាប់ប្ដីខ្លួនឯង បណ្ដាលឲ្យស្លាប់ ព្រោះភ្លើងប្រច័ណ្ឌកាលពីថ្ងៃទី២៣ ខែកញ្ញា ឆ្នាំ ២០២០។
សូមបញ្ជាក់ថា ជនត្រូវចោទឈ្មោះ ហួត សុខឡេង ហៅ លីដា ភេទស្រី អាយុ៣៦ឆ្នាំ មុខរបរជាអ្នកម៉ាស្សា កើតនៅភូមិភ្នំធំ ឃុំជាលា ស្រុកបាធាយ ខេត្តកំពង់ចាម។ បច្ចុប្បន្ន សា្នក់នៅភូមិកណ្តាល សង្កាត់ស្ទឹងត្រែង ក្រុងស្ទឹងត្រែង ខេត្តស្ទឹងត្រែង ។
ស្ត្រីជាប់ចោទ ហួត សុខឡេង មានប្តីឈ្មោះ ម៉ុល ចាន់ អាយុ៣៣ឆ្នាំ មានប្រុសកូនម្នាក់រស់ក្នុងបន្ទុក ។ ជនត្រូវចោទ ត្រូវបានដាក់ឲ្យស្ថិតក្រោមការពិនិត្យពីបទ «ឃាតកម្ម» ប្រព្រឹត្តនៅចំណុច វាលរំពេរ៍ ភូមិកាតូត ឃុំកំភុន ស្រុកសេសាន ខេត្តស្ទឹងត្រែង កាលពីវេលាម៉ោង ៣រសៀលថ្ងៃទី២១ ខែកញ្ញា ឆ្នាំ២០២០។
គួររំលឹកថា កម្លាំងនគរបាលស្រុកសេសាន ខេត្តស្ទឹងត្រែង បានចុះឃាត់ខ្លួនស្ត្រីសម្លាប់ប្តីខ្លួនឯង នឹងកាំបិតចុងស្រួច ក្រោយផ្ទុះការប្រច័ណ្ឌក្នុងរឿងស្នេហាត្រីកោណ ប្តីនាំស្រីក្មេងឡើងដេកក្នុងបន្ទប់។
បុរសជាប្តីរងគ្រោះ ត្រូវបានស្ត្រីជាប្រពន្ធ ចាក់ជាច្រើនកាំបិតចុងស្រួច បណ្តាលឲ្យដេកដួលនៅ ក្នុងថ្លុកឈាម ក្នុងលំនៅដ្ឋានចំការ នៅក្នុងហេតុការណ៍ប្រតាយប្រតប់គ្នា ផ្ទុះកំហឹងផ្លូវចិត្ត ដោយសារជនរងគ្រោះបាននាំស្រីស្នេហ៍ មកដេកនៅលើផ្ទះ។ ក្រោយពេលកើតហេតុ កម្លាំងសមត្ថកិច្ចបានចុះឃាត់ខ្លួនស្ត្រីដៃដល់ បញ្ជូនមកកាន់ស្នងការដ្ឋាន នគរបាលខេត្តស្ទឹងត្រែង ភ្លាមៗ។
កាលពីល្ងាចថ្ងៃទី ២៣ ខែកញ្ញា ឆ្នាំ ២០២០ ស្ត្រីជាប់ចោទករណីឃាតកម្មសម្លាប់ប្ដីខ្លួនឯង ត្រូវបានចៅក្រមស៊ើបសួរ នៃសាលាដំបូងខេត្តស្ទឹងត្រែង លោកម៉ង់ សូហាន សម្រេចចេញដីកាឃុំខ្លួន ជាបណ្ដោះអាសន្នរង់ចាំការស៊ើបអង្កេតជាបន្តទៀត ៕ ដោយ៖សុខុម
