ភ្នំពេញ៖ ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា លោក Patrick Murphy បានអះអាងថា សាជីវកម្មហិរញ្ញវត្ថុសម្រាប់ការអភិវឌ្ឍអន្តរជាតិសហរដ្ឋអាមេរិក (DFC) នឹងផ្តល់ហិរញ្ញប្បទាន ដែលមានអត្រាការប្រាក់ទាប ដល់វិស័យឯកជននៅកម្ពុជា ជាពិសេសសហគ្រាសធុនតូច និងមធ្យម ដើម្បីចូលរួមជួយស្តារសេដ្ឋកិច្ចកម្ពុជាឡើងវិញ ដែលរំពឹងថានឹងជួយសម្រាលការលំបាកក្នុងពេលកំពុងប្រឈមនឹងវិបត្តិនៃជំងឺកូវីដ-១៩។
ការអះអាងរបស់លោក Patrick Murphy ធ្វើឡើងក្នុងជំនួបជាមួយ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋ មន្ត្រីក្រសួងសេដ្ឋកិច្ច និងហិរញ្ញវត្ថុ។
លោកឯកអគ្គរដ្ឋទូត Patrick Murphy បានលើកឡើងផងដែរថា ដោយសារបរិស្ថានវិនិយោគនៅកម្ពុជាមានភាពទាក់ទាញ លោកនឹងលើកទឹកចិត្តឱ្យអ្នកវិនិយោគអាមេរិកជាច្រើនទៀតមកវិនិយោគនៅកម្ពុជា ដើម្បីពង្រីកទំហំពាណិជ្ជកម្មទ្វេភាគីរវាងប្រទេសទាំងពីរ និងរួមចំណែកជួយដល់ជីវភាពរបស់ប្រជាជនកម្ពុជា។
ក្នុងអំឡុងពេលរាជរដ្ឋភិបាលកម្ពុជាកំពុងប្រយុទ្ធប្រឆាំងនឹងជំងឺកូវីដ១៩នេះ សហរដ្ឋអាមេរិកបានប្រកាសផ្តល់ហិរញ្ញប្បទានឥតសំណងចំនួន ៧,៥លានដុល្លារអាមេរិក សម្រាប់ស្តារសេដ្ឋកិច្ចកម្ពុជាឡើងវិញ បន្ទាប់ពីរងផលប៉ះពាល់ដោយសារជំងឺកូវីដ-១៩ និងសម្រាប់ប្រយុទ្ធប្រឆាំងនឹងជំងឺរាតត្បាតនេះ។
អគ្គបណ្ឌិតសភាចារ្យ អូន ព័ន្ធមុនីរ័ត្ន បានឱ្យដឹងថា កន្លងមក រដ្ឋាភិបាល និងប្រជាជនអាមេរិក បានផ្តល់ហិរញ្ញប្បទានឥតសំណងរួមចំណែកដល់ការអភិវឌ្ឍនៅកម្ពុជា ជាពិសេស ក្នុងវិស័យសុខាភិបាល, អប់រំ, កសិកម្ម, បរិស្ថាន និងអភិបាលកិច្ច។ សហរដ្ឋអាមេរិក ក៏ដូចជាដៃគូអភិវឌ្ឍន៍ដទៃទៀតដែរ បានរួមចំណែកយ៉ាងសកម្មជាមួយរាជរដ្ឋាភិបាលកម្ពុជាក្នុងការប្រយុទ្ធប្រឆាំងនឹងជំងឺកូវីដ-១៩។
សហរដ្ឋអាមេរិក គឺជាទីផ្សារនាំចេញធំបំផុតរបស់កម្ពុជា នាពេលបច្ចុប្បន្ន ក្នុងក្របខណ្ឌប្រទេស និងជាទីផ្សារធំលំដាប់ទីពីរបន្ទាប់ពីសហភាពអឺរ៉ុបក្នុងក្របខណ្ឌតំបន់។
យោងតាមទិន្ន័យការិយាល័យជំរឿននៃក្រសួងពាណិជ្ជកម្មសហរដ្ឋអាមេរិកបានបង្ហាញថា ការនាំចេញរបស់កម្ពុជាទៅកាន់ទីផ្សារសហរដ្ឋអាមេរិក រយៈពេល ៧ខែឆ្នាំ ២០២០នេះ មានតម្លៃទឹកប្រាក់ ៣៤០០លានដុល្លារ បានកើនឡើងប្រមាណ ២៤ភាគរយ បើធៀបនឹងរយៈពេលដូចគ្នាកាលពីឆ្នាំមុន។
ចំណែកការនាំចេញរបស់សហរដ្ឋអាមេរិក ត្រឡប់មកប្រទេសកម្ពុជាវិញ ក្នុងរយៈពេល ៧ខែ ឆ្នាំនេះ មានតម្លៃទឹកប្រាក់ប្រមាណតែ ១៧០លានដុល្លារ បានធ្លាក់ចុះរហូតដល់ទៅ ៤៤,៦២ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៩៕
ដោយ៖CEN
