បន្ទាយមានជ័យ ៖ នៅរសៀលថ្ងៃទី ២៥ ខែ កញ្ញា ឆ្នាំ ២០២០ ប្អូនស្រី សុខ ស្រីនាង និង ប្អូនប្រុស ឆន ឈាក ដែលជាប់ពន្ធនាគារយ៉ាងអយុត្តិធម៌ពីសំណាក់ចៅក្រម និង តំណាងអយ្យការអមសាលាដំបូងខេត្តបន្ទាយមានជ័យ ត្រូវបានឯកឧត្តម ប្រធានក្រុមប្រឹក្សាជំនុំជម្រះសាលាឧទ្ធរណ៍បាត់ដំបង សម្រេចលេីកលែងការចោទប្រកាន់ និងអោនិងអោយដោះលែងពីពន្ធនាគារវិញហើយ បន្ទាប់ពី សមាជិកក្រុមមេធាវីស្ម័គ្រចិត្តសម្តេចតេជោសែន ប្រចាំខេត្តបន្ទាយមានជ័យ និងខេត្តបាត់ដំបង ជួយអន្តរាគមន៍។
សមាជិកក្រុមមេធាវីស្ម័គ្រចិត្តសម្តេចតេជោសែន ប្រចាំខេត្តបន្ទាយមានជ័យ និងខេត្តបាត់ដំបង បានទទួលសិទ្ធិការពារជូនឈ្មោះ ឆន ឈាក និងឈ្មោះ សុខ ស្រីនាង នៅក្នុងសំណុំរឿងព្រហ្មទណ្ឌលេខ ៧៩ ចុះថ្ងៃទី៣ ខែសីហា ឆ្នាំ២០២០ របស់មហាអយ្យការអមសាលាឧទ្ធរណ៍បាត់ដំបង ដែលពីរនាក់ប្តីប្រពន្ធនេះត្រូវបានឃុំខ្លួនដោយសាលាដំបូង ខេត្តបន្ទាយមានជ័យ ។
ក្រុមមេធាវីស្ម័គ្រចិត្តសម្តេចតេជោសែន បានឲ្យដឹងថា ជាលទ្ធផល ក្រុមប្រឹក្សាជំនុំជម្រះនៃសាលាឧទ្ធរណ៍បាត់ដំបង បានសម្រេចបដិសេធការសម្រេចរបស់សាលាដំបូង និងបានសម្រេចឲ្យដោះលែង នារសៀលថ្ងៃទី២៥ ខែកញ្ញា ឆ្នាំ២០២០ នេះ ។
ទាំងពីរនាក់ប្តីប្រពន្ធ បានគោរពថ្លែងអំណរគុណចំពោះសម្ដេចតេជោ និងសម្ដេចកិតិ្តព្រឹទ្ធបណ្ឌិត ដែលបានបង្កើតឲ្យមានក្រុមមេធាវីស្ម័គ្រចិត្តសម្ដេចតេជោសែន សម្រាប់ជួយដល់ស្ត្រីទន់ខ្សោយគ្មានលទ្ធភាពតតាំងក្តីតាមផ្លូវច្បាប់ និងបានអរគុណឯកឧត្ដមគី តិច ប្រធានក្រុមមេធាវីស្ម័គ្រចិត្តសម្ដេចតេជោសែន ដែលបានចាត់មេធាវីស្ម័គ្រចិត្តសម្ដេចតេជោសែន ទៅជួយការពារ រហូតទទួលបាននូវយុត្តិធម៌ សម្រាប់អ្នកទាំងពីរ ។ ទាំងពីរនាក់ប្តីប្រពន្ធ បានថ្លែងអំណរគុណចំពោះឯកឧត្ដម ប្រធានក្រុមប្រឹក្សាជំនុំជម្រះ និង ចៅក្រម ព្រះរាជអាជ្ញា អមសាលាឧទ្ធរណ៍បាត់ដំបង ដែលបានសម្រេចសេចក្ដីប្រកបដោយយុត្តិធម៌ត្រឹមត្រូវជូនដល់ពួកខ្ញុំ ។
ដីកាបង្គាប់ឲ្យដោះលែងរបស់អយ្យការអមសាលាដំបូងខេត្តបន្ទាយមានជ័យ យើង តេង សាម៉ៃ ព្រះរាជអាជ្ញារង នៃអយ្យការអមសាលាដំបូងខេត្តបន្ទាយមានជ័យ ។ បានឃើញ សំណុំរឿងព្រហ្មទណ្ឌលេខៈ ៧៩ ចុះថ្ងៃទី ០៣ ខែ សីហា ឆ្នាំ២០២០ របស់មហាអយ្យការអមសាលាឧទ្ធរណ៍បាត់ដំបង ។ បានឃើញ សាលដីកាលេខៈ ៨៤ (ឆ) ចុះថ្ងៃទី ១៦ ខែកញ្ញា ឆ្នាំ២០២០ របស់សាលាឧទ្ធរណ៍បាត់ដំបង ។ ដែលបានសម្រេឲឲ្យឈ្មោះ សុខ ស្រីនាង ហៅ ស្រេង ស្រីមុំ ហៅ ស្រីម៉ៅ ភេទស្រី អាយុ ២៩ ឆ្នាំ សញ្ជាតិខ្មែរ ទីកន្លែងកំណើតភូមិអូរប្រាំទី២ ឃុំព្រែកកក់ ស្រុកស្ទឹងត្រង់ ខេត្តកំពង់ចាម ទីលំនៅបច្ចុប្បន្នភូមិ ផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ពីបទៈលួច(មានស្ថានទម្ងន់ទោស ) ប្រព្រឹត្តនៅចំណុចភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត ខេត្តបទ្ទាយមានជ័យ កាលពីថ្ងៃទី១៥ ខែមិថុនា ឆ្នាំ២០១៧ តាមបញ្ញត្តិមាត្រា៣៥៣ និងមាត្រា ៣៥៧ នៃក្រមព្រហ្មទណ្ឌ។ បច្ចុប្បន្នជនជាប់ចោទនេះ ត្រូវបានតុលាការសម្រេចឲ្យរួចផុតពីបទចោទលួច(មានស្ថានទម្ងន់ទោស ) ប្រព្រឹត្ត នៅចំណុចភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ កាលពីថ្ងៃទី ១៥ ខែមិថុនា ឆ្នាំ២០១៧ តាមបញ្ញត្តិមាត្រា៣៥៣ និងមាត្រា ៣៥៧ នៃក្រមព្រហ្មទណ្ឌ តាមសាលដីកាលេខៈ៩៤ )ចុះថ្ងៃទី២២ ខែកញ្ញា ឆ្នាំ២០១០ របស់សាលាឧទ្ឋរណ៍បាត់ដំបង រួចហើយ ។ ហេតុដូច្នេះសម្រេចបង្គាប់មកលោកប្រធានពន្ឋនាគារ ឲ្យដោះលែងឈ្មោះ សុខ ស្រីនាង ហៅ ស្រេង ស្រីមុំ ហៅ ស្រីម៉ៅ ភេទស្រី អាយុ២៩ ឆ្នាំ ជាបន្ទាន់ប្រសិនបើជនេះមិនត្រូវឃុំខ្លួនពីបទល្មើសអ្វីផ្សេងទៀតទេ ។
បានសម្រេចឲ្យឈ្មោះ ឆន ឈាក ហៅ ឈុន ឈាក ភេទប្រុស អាយុ ៣៧ ឆ្នាំ សញ្ជាតិខ្មែរ ទីកន្លែងកំណើតភូមិផាត់សណ្ដោង ឃុំឆ្នាំទី ១ ស្រុកស៊ីធរកណ្តាល ខេត្តព្រៃវែង ទីលំនៅបច្ចុប្បន្ន ភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ពីបទៈ លួច (មានស្ថានទម្ងន់ទោស) ប្រព្រឹត្តទៅចំណុចភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត ខេត្ត បន្ទាយមានជ័យ កាលពីថ្ងៃទី១៥ ខែមិថុនា ឆ្នាំ២០១៧ តាមបញ្ញត្តិមាត្រា៣៥៣ និងមាត្រា ៣៥៧ នៃក្រមព្រហ្ម ទណ្ឌ។
បច្ចុប្បន្នជនជាប់ចោទនេះត្រូវបានតុលាការសម្រេចឲ្យរួចផុតពីបទចោទ លួច(មានស្ថានទម្ងន់ទោស) ប្រព្រឹត្តនៅចំណុចភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ កាលពីថ្ងៃទី១៥ ខែមិថុនា ឆ្នាំ២០១៧ តាមបញ្ញត្តិមាត្រា៣៥៣ និងមាត្រា ៣៥៧ នៃក្រមព្រហ្មទណ្ឌ តាមសាលដីកាលេខៈ ៩៤(ធ) ចុះថ្ងៃទី២២ ខែកញ្ញា ឆ្នាំ២០២០ របស់សាលាឧទ្ធរណ៍បាត់ដំបង រួចហើយ ។ ហេតុដូច្នេះសម្រេច បង្គាប់មកលោកប្រធានពន្ធនាគារឲ្យដោះលែងឈ្មោះ ឆន ឈាក ហៅ ឈុន ឈាក ភេទប្រុសអាយុ៣៧ ឆ្នាំ ជាបន្ទាន់ប្រសិនបើជននេះមិនត្រូវឃុំខ្លួនពីបទល្មើសអ្វីផ្សេងទៀតទេ ៕ ដោយ៖កូឡាប
