ខេត្តកំពង់ស្ពឺ៖ ប៉ុន្មានថ្ងៃជាប់ៗគ្នាមកនេះ អំពើហិង្សាបែបព្រៃផ្សៃបានកើតឡើងឥតស្រាកស្រានទៅលើស្ត្រី ដែលក្នុងនោះមានទាំងពីហិង្សាក្នុងជម្លោះផឹកស៊ី សង្សារវាយសង្សារប៉ោងមុខ ឪពុកវាយកូនដូចសត្វធាតុ និងសូម្បីអំពើឃាតកម្មប្តីសម្លាប់ប្រពន្ធផងដែរ។
ដោយឡែក ថ្មីៗនេះ អំពើហិង្សាឪពុកវ័យក្មេងម្នាក់ប្រើអំពើហិស្សាលើកូនស្រីបង្កើតរបស់ខ្លួន ដោយយកខ្សែក្រវាត់វាយឲ្យបែកឈាមយ៉ាងសាហាវ បានកំពុងធ្វើឲ្យមហាជនផ្ទុះកំហឹងយ៉ាងខ្លាំងតែម្តង។ ករណីថ្មីៗនេះ បានកើតឡើងស្រុកឧត្តុង ខេត្តកំពង់ស្ពឺ កាលពីវេលាម៉ោង ៤ និង ៣០ នាទី ល្ងាចថ្ងៃទី២៥ ខែកញ្ញា ឆ្នាំ២០២០។
បើតាមបងស្រីម្នាក់មានគណនីឈ្មោះ ម៉ាក់ អូន នីតា ជាអ្នកបង្ហោះវីដេអូ និងក៏ជាអ្នកជួយក្មេងស្រីរងគ្រោះ បានប្រាប់ថា គាត់ពុំបានដឹងរឿងហេតុច្បាស់ពីគ្រួសារនេះទេ ប៉ុន្តែ គ្រាន់បានដឹងក្មេងស្រីរងគ្រោះនេះ គឺជាកូនបង្កើតរបស់បុរសវ័យក្មេងនោះដែលគ្រប់គ្នាច្រឡំស្មានតែបង ឬក៏ពូ។ ហើយអ្វីដ៏គួរឲ្យរន្ធត់ចិត្តទៀតនោះ គឺក្មេងស្រីរងគ្រោះ ដែលត្រូវបានដឹងថាមានប្តីរួចហើយ ពុំត្រឹមតែរងអំពើហិង្សាពីសំណាក់ឪពុកបង្កើតប៉ុណ្ណោះទេ តែក៏ត្រូវប្តីវាយធ្វើបាបជារឿយៗផងដែរ។
គាត់បានឲ្យដឹងទៀតថា លើកនេះ នាងបានបីប្អូនស្រីម្នាក់ រត់ចេញពីផ្ទះមកឲ្យគេឯងជួយ ហើយក៏ត្រូវបានឪពុកវ័យក្មេងចិត្តកំណាចរូបនេះ តាមមកវាយនឹងខ្សែក្រវាត់យ៉ាងសាហាវតែម្តង។ សំណាងហើយ ដែលបានអ្នកភូមិឃើញជួយឃាត់ ពុំនោះទេ នាងអាចធ្ងន់ធ្ងរ។
បើតាមឮក្នុងវីដេអូ ឪពុកនោះបានខឹងកូនស្រីរបស់ខ្លួន ក្រាញពុំព្រមទៅផ្ទះវិញ ប្រហែលជានាងខ្លាចរងអំពើហិង្សា ដែលជាហេតុធ្វើឲ្យរូបគេផ្ទុះកំហឹងបែបនេះតែម្តង។
ជាមួយគ្នានេះផងដែរ អ្នកភូមិក៏បានសម្តែងនូវការព្រួយបារម្ភពីសុវត្ថិភាពក្មេងស្រីរងគ្រោះជាខ្លាំង ខណៈពេលដឹងថា ឪពុករូបនេះត្រូវបានប៉ូលិសដោះលែងវិញ ដោយគ្រាន់តែយកទៅប៉ុស្តិ៍ដើម្បីធ្វើការព្រមាន៕ ដោយ៖ លឹម ហុង
