ភ្នំពេញ៖ កញ្ញា បេ នីយ៉ាំង (BenneYang) គឺជាអតីតតាសម្តែងម្នាក់ ដែលត្រូវបានគេដឹងចូលចិត្តកែសម្ផស្សខុសប្លែកពីតារាស្រីដទៃ ហើយបច្ចុប្បន្ន រូបសម្រស់របស់នាងបានផ្លាស់ប្តូរខ្លាំង ក្រោយពីឆ្លងកាត់ការវះកាត់ច្រើនលើកច្រើនសាររួចមក។
ជាមួយនឹងការកែសម្ផស្សរាប់ភ្លេចនេះផងដែរ នាងក៏ត្រូវបានមហាជនសើចចំអក ទៅលើរឿងកែសម្ផស្សខុស ដែលធ្វើឲ្យច្រមុះរបស់នាងខូចលើសដើម។ តែទោះយ៉ាងណា កញ្ញា បេ នីយ៉ាំង មិនខ្វល់ចំពោះពាក្យគេសើចចំអកទាំងនោះទេ ដោយទទួលយកនូវការពិត។
ទាក់ទងនឹងការសម្ផស្សខូចច្រមុះកាលលើកមុននោះផងដែរ គេនៅចាំបានថា កញ្ញា បេ នីយ៉ាំង បាននិយាយនៅក្នុងការឡាយមួយថា យើងត្រូវហ៊ានទទួលយកនូវការពិត ព្រោះថារូបសម្រស់របស់យើងមិនអាចនៅឋិតថេរគង់វង្សរហូតនោះទេ ហើយបើគេស្រឡាញ់យើងស្មោះ នោះគេមិនគិតអំពីរឿងនេះជាធំនោះទេ។
ទោះយ៉ាងណា បើងាកមកមើលជីវិតឯកជនវិញ អតីតតារាស្រីរូបនេះក៏មិនធម្មតា ដែលសព្វថ្ងៃនេះនាងមានមុខជំនួញក្នុងដៃជាច្រើនដែលសុទ្ធតែជោគជ័យខ្លាំង រហូតទិញផ្ទះដ៏ធំស្កឹមស្កៃ និងព្រមទាំងមានរថយន្តស៊េរីទំនើបជិះទៀតផង។
ដោយឡែក ថ្មីៗនេះ បេ នីយ៉ាំង ស្រាប់តែធ្វើឲ្យហ្វេនៗជាច្រើន មានការចាប់អារម្មណ៍ជាខ្លាំង ខណៈបង្ហោះរូបថតស្វ៊ីតៗជាមួយសង្សារ ពោរពេញដោយក្តីសុខ និងភ្ជាប់សារដ៏មានន័យចាក់ដោតថាៈ «មិនដឹងថាយើងអាចស្រឡាញ់មនុស្សម្នាក់បានយូរប៉ុណ្ណានោះទេ ប៉ុន្តែពេលនេះ ថ្ងៃនេះយើងគ្រាន់តែបំពេញតួនាទីរបស់យើងឲ្យបានល្អបំផុត គឺគ្រប់គ្រាន់ហើយ ស្នេហាក៏ប្រៀបដូចជាដើមឈើបើអ្នកមិនស្រោចទឹកថែទាំ វានឹងក្រៀមស្វិត បើអ្នកមើលថែវាបានយ៉ាងល្អវានឹងស្រស់ស្អាតបានយូរ សូមមើលថែគ្នា…. ហើយផ្ដល់ក្ដីសុខជូនគ្នាយកចិត្តទុកដាក់ពីគ្នាជានិច្ចទើបស្នេហាអ្នកមិនក្រៀមក្រំ»៕ ដោយ៖ លឹម ហុង