សៀមរាប៖ កម្លាំងគណៈបញ្ជាការឯកភាពនៃរដ្ឋបាលស្រុកប្រាសាទបាគង កាកាលពីវេលាម៉ោង១២និង៣០នាទីឈានចូល ថ្ងៃទី២៦ខែកញ្ញាឆ្នាំ២០២០ បានសហការជាមួយកម្លាំងចម្រុះ នៃស្នងការដ្ឋាននគរបាលខេត្តសៀមរាប បានធ្វើការឃាត់ រថយន្តសង្ស័យ ១គ្រឿង ម៉ាកឡង់គ្រីស័រពណ៌ត្រេអ៊ីប៉ារា ពាក់ផ្លាកលេខ ខម2-6158 ព្ព្រមទាំងអ្នកបើកបរនិងអ្នករួមដំណើរ នៅចំណុចភូមិជ្រៃ ឃុំកណ្ដែក ស្រុកប្រាសាទបាគង ខេត្តសៀមរាប ដើម្បីធ្វើការត្រួតពិនិត្យ និងបានរកឃើញមានការដឹកជញ្ជូនសត្វប្រវឹកព្រៃចំនួន៥៥៣ក្បាលដោយខុសច្បាប់។
សមត្ថកិច្ចបញ្ជាក់ថា បន្ទាប់ពី បានសាកសួរ ជនសង្ស័យបានសារភាពថា សត្វប្រវឹកព្រៃទាំងនេះ ត្រូវបានពួកគេលួចនាំចូលមកពីខេត្តស្រះកែវ ប្រទេសថៃ បម្រុងយកទៅលក់នៅរាជធានីភ្នំពេញ។ បច្ចុប្បន្នជនសង្ស័យនិងវត្ថុតាង ត្រូវបានធ្វើកំណត់ហេតុ និងប្រគល់បន្តជូន ខណ្ឌរដ្ឋបាលព្រៃឈើស្រុកបន្ទាយស្រី ដើម្បី ចាត់ការ បន្តតាមនីតិវិធីនៃច្បាប់។
ក្នុងនាមប្រធានគណៈបញ្ជាការឯកភាពនៃរដ្ឋបាលស្រុកប្រាសាទបាគង សូមធ្វើការកោតសរសើរ នឹងលើកទឹកចិត្ត ឲ្យកងកម្លាំងទាំងអស់ បង្កើនសកម្មភាព បង្ការ បង្ក្រាបនិងទប់ស្កាត់ បទល្មើសប្រភេទនេះ និងបទល្មើសផ្សេងៗទៀត អោយដូចភ្លៀងរលឹម កុំអោយកើតមានក្នុងមូលដ្ឋានយើង៕ ដោយ៖បញ្ញាស័ក្តិ