ភ្នំពេញ៖ កម្លាំងផ្នែកជំនាញខណ្ឌបឹងកេងកង សហការជាមួយកម្លាំងប៉ុស្តិ៍ទួលស្វាយព្រៃទី២ ឃាត់ខ្លួនជនជាតិចិន ចំនួន ២នាក់ ដែលបង្កឲ្យមានអគ្គិភ័យឆេះនៅភោជនីយដ្ឋាន អិនប្រាំបី(N8) កាលពីថ្ងៃទី២៦ ខែកញ្ញា ឆ្នាំ២០២០ វេលាម៉ោង១០នឹង២០នាទី នៅចំណុចភោជនីយដ្ឋាន អិនប្រាំបី(N8) ជាន់ទី៣ អគារលេខ៥៦ ផ្លូវមុន្នីរ៉េត កែងផ្លូវ២៨៦ ក្រុម៤៧ ភូមិ១១ សង្កាត់ទួលស្វាយព្រៃទី២ ខណ្ឌបឹងកេងកង រាជធានីភ្នំពេញ។
អគ្គិភ័យបានឆាបឆេះភោជនីយដ្ឋានN8 ចេញផ្សែងខ្មួរខ្មាញ់បង្កឲ្យមានការភ្ញាក់ផ្អើលដល់បងប្អូនប្រជាពលរដ្ឋក៏ដូចជាកម្លាំងសមត្ថកិច្ចនិងរថយន្តពន្លត់អគ្គិភ័យចេញជួយអន្តរាគមន៍ជាច្រើនគឿងចំនួន២លើក គឺ បានកើតឡើងកាលពីវេលាម៉ោង ៤នឹង៤០នាទីល្ងាចថ្ងៃទី២៣ខែកញ្ញា២០២០ ស្ថិតនៅត្រង់ចំណុច ហាង ភោជនីយដ្ឋាន N8 ផ្លូវព្រះមុន្នីរ៉េត សង្កាត់ទួលស្វាយព្រៃទី ២ ខណ្ឌបឹងកេងកងរាជធានីភ្នំពេញ និងនៅ វេលាម៉ោង ១០និង៥០នាទី ថ្ងៃទី២៦ ខែកញ្ញ ឆ្នាំ២០២០។
នគរបាលខណ្ឌបឹងកេង បានឲ្យដឹងថា ជនបង្ក ទី១-ឈ្មោះ ចាង ឡី ភេទប្រុស អាយុ៣៨ឆ្នាំ ជនជាតិចិន ស្នាក់នៅផ្ទះជួល សង្កាត់ទឹកថ្លា ខណ្ឌសែនសុខ រាជធានីភ្នំពេញ មុខរបរ ប្រធានក្រុមហ៊ុន កំពុងសម្រាកព្យាបាលនៅមន្ទីរពេទ្យ លឹម តាំង ស្ថិតនៅសង្កាត់អូបែកក្អម ខណ្ឌសែនសុខ រាជធានីភ្នំពេញ ដោយមូលហេតុ រអិលជើងធ្លាក់ពីជណ្ដើរបាក់ភ្លៅ ពេលកំពុងមានអគ្គិភ័យ ទី២-ឈ្មោះ យ៉ាង ហ៊ូ ភេទប្រុស អាយុ៣៦ឆ្នាំ ជនជាតិចិន ស្នាក់នៅផ្ទះជួល សង្កាត់ទឹកថ្លា ខណ្ឌសែនសុខ រាជធានីភ្នំពេញ មុខរបរ ជាងសំណង់។
សម្ភារខូចខាតមាន ឆេះបន្ទប់ភោជនីយដ្ឋានទំហំ៤គុណ៨ម៉ែត្រ ចំនួន១បន្ទប់ រួមទាំងបរិក្ខារក្នុងបន្ទប់អស់ទាំងស្រុង។
ប្រភពដដែលបន្តថា មុនពេលកើតហេតុក្រុមជនបង្ក នាំគ្នាផ្សារដំបូលស័ង្កសី ធ្វើឲ្យធ្លាក់កម្ទេចធូបផ្សារដែកបង្កជាអគ្គិភ័យកើតឡើង។ អគ្គិភ័យខាងលើប្រើប្រាស់ឡានពន្លត់អគ្គិភ័យចំនួន ៣៨គ្រឿង បាញ់ទឹកពន្លត់អស់ចំនួន៥៩រថយន្ដ ស្មើនឹង២៧២ម៉ែត្រគូប អគ្គិភ័យត្រូវបានពន្លត់ចប់នៅវេលាម៉ោង១៥នឹង០០នាទី នៅថ្ងៃខែឆ្នាំដដែល។
បច្ចុប្បន្ន ជនបង្កម្នាក់ឈ្មោះ ចាង ឡី ភេទប្រុស អាយុ៣៨ឆ្នាំ ជនជាតិចិន កំពុងសម្រាកព្យាបាលនៅមន្ទីរពេទ្យ លឹម តាំង ស្ថិតនៅសង្កាត់អូបែកក្អម ខណ្ឌសែនសុខ រាជធានីភ្នំពេញ (មូលហេតុ រអិលជើង ធ្លាក់ពីជណ្ដើរបាក់ភ្លៅ ពេលកំពុងមានអគ្គីភ័យ)។ ចំណែកជនបង្កចំនួន១ទៀតឈ្មោះ យ៉ាង ហ៊ូ ភេទប្រុស អាយុ៣៦ឆ្នាំ ជនជាតិចិន ត្រូវបានឃាត់ខ្លួននៅអធិការដ្ឋាននគរបាលខណ្ឌបឹងកេងកង ដើម្បីសាកសួរបន្ដ និងចាត់ការតាមនីតិវិធីច្បាប់ ៕ ដោយ៖កូឡាប