សៀមរាប៖ លោកវរសេនីយ៍ឯក លឹមសម្បត្តិ អធិការនគរបាលស្រុកប្រាសាទបាគងបានថ្លែងថា សត្វប្រវឹកព្រៃចំនួន៥៥៣ក្បាលមានសេរីភាពហើយ។ លោកថា “ថ្ងៃនេះថ្នាក់ដឹកនាំទាំងអស់គ្នាបានស្រោចស្រង់ប្រោសជីវិត សត្វប្រវឹកឲ្យមានសេរីភាពក្នុងទីឋានដ៏សែនសុខមនោរម្យក្នុងនាមជាបក្សាបក្សី ហែលហើរត្រាច់ចរយ៉ាងស្រស់បំព្រងនៅ ថ្ងៃទី២៧ ខែកញ្ញា ឆ្នាំ២០២០”។
លោកឃឹម ហ្វីណង់ អភិបាលស្រុកបន្ទាយស្រី បានថ្លែងថា“សត្វប្រវឹក” ត្រូវបានលែងឱ្យមានសេរីភាពឡើងវិញនៅក្នុងតំបន់អភិរក្សនៃសហគមន៍ទេសចរណ៍បឹងឈូក ស្រុកបន្ទាយស្រី។
លោកបន្តថា ឆ្លៀតពេលចុងសប្តាហ៍ នាំកូនតូចៗមកចូលរួមនិងបានឃើញ ការលែងសត្វប្រវឹកដែលត្រូវបានរឹបអូស និងសង្គ្រោះពីការជួញដូរសត្វព្រៃខុសច្បាប់ ដោយមានការចូលរួមពីលោក ម៉ុង ប៊ុនលីម នាយខណ្ឌរដ្ឋបាលព្រៃឈើខេត្តសៀមរាប និងលោក ម៉ក់ ធារ៉ា ស្នងការរងទទួលបន្ទុកការងារប្រឆាំងបទល្មើសសេដ្ឋកិច្ច ព្រមទាំងមន្ត្រីរដ្ឋបាលព្រៃឈើ មន្ត្រីនគរបាល និងតំណាងសហគមន៍បឹងឈូកជាច្រើនរូបទៀត។
លោកថា ដោយហេតុតែបឹងឈូកមានតំបន់ព្រៃក្បាលជប់លិចទឹក ដែលតែងតែមានសត្វស្លាបចុះនិងរស់នៅជាប្រចាំ ហើយសហគមន៍នៅទីនេះមានការគ្រប់គ្រងល្អនិងប្តេជ្ញាខ្ពស់លើការងារអភិរក្សជីវៈចម្រុះ តំបន់នេះមានលក្ខណៈសម្បត្តិសមស្របសម្រាប់ការលែងសត្វប្រវឹកទាំងអស់នេះ ហើយអាចនឹងបង្កើតភាពទាក់ទាញខាងផ្នែកទេសចរណ៍សម្រាប់អ្នកស្រឡាញ់សត្វស្លាបនាពេលអនាគតផងដែរ ប្រសិនបើសត្វស្លាបទាំងនេះចាប់យកបឹងឈូកជាទីជម្រក។
លោកវរសេនីយ៍ឯក លឹមសម្បត្តិ បានបញ្ជាក់ថា អនុវត្តតាមផែនការ របស់គណៈបញ្ជាការឯកភាពនៃរដ្ឋបាលខេត្តសៀមរាប ដែលមានឯកឧត្តមទៀ សីហា អភិបាលខេត្តសៀមរាប ជាប្រធាន និងដោយមានការក្រើនរំឭកជាប្រចាំ ពីលោកឧត្តមសេនីយ៍ទោ ទិត្យ ណារ៉ុងស្នងការនៃស្នងការដ្ឋាននគរបាលខេត្តសៀមរាប និងលោកសូរ ប្លាតុង ប្រធានគណៈ បញ្ជាការឯកភាពស្រុក កាលពីវេលាម៉ោង១២និង៣០នាទីឈានចូលព្រឹកថ្ងៃទី២៦ខែកញ្ញាឆ្នាំ២០២០នេះ កំលាំងអធិការនគរបាលស្រុកប្រាសាទបាគង ចូលរួមសហការណ៍ជាមួយកំលាំងការិយាល័យព្រហ្មទណ្ឌ និងកំលាំងការិយាល័យអន្តរាគម៍ខេត្ត ដឹកនាំដោយលោកឧត្តមសេនីយ៍ត្រីប្រាក់ សុវណ្ណារ័ត្ន ស្នងការរង នៃស្នងការដ្ឋាននគរបាលខេត្តសៀមរាប បានធ្វើការឃាត់ រថយន្តសង្ស័យ ០១គ្រឿង ម៉ាកឡង់គ្រីស័រពណ៍ត្រេអ៊ីប៉ារា ពាក់ផ្លាកលេខ ខម2-6158 នៅចំណុចភូមិជ្រៃ ឃុំកណ្ដែក ស្រុកប្រាសាទបាគង ខេត្តសៀមរាប ដើម្បីធ្វើការត្រួតពិនិត្យ និងបានរកឃើញមានសត្វប្រវឹកព្រៃចំនួន៥៥៣ក្បាល។
បន្ទាប់ពីបានត្រួតពិនិត្យ និងឃើញមានការដឹកសត្វប្រវឹកព្រៃដោយខុសច្បាប់ ភ្លាមៗ យើងបានធ្វើការឃាត់ជនសង្ស័យចំនួន២ នាក់ ជាអ្នកបើកបរនិងអ្នករួមដំណើរ ទី១/ឈ្មោះ យ៉េង ឈុនហេង ភេទប្រុសអាយុ៣៣ឆ្នាំ រស់នៅភូមិព្រៃឬស្សី សង្កាត់ពន្លក ក្រុងសិរីសោភ័ណ ខេត្តបន្ទាយមានជ័យនិងទី២/ឈ្មោះ ឆាត រស្មី រស់នៅភូមិគាប ឃុំទឹកផ្លា ស្រុកសិរីសោភ័ណ ខេត្តបន្ទាយមានជ័យ ដើម្បីធ្វើការសាកសួរនាំ។
បន្ទាប់ពី បានសាកសួរ ជនសង្ស័យបានសារភាពថា សត្វប្រវឹកព្រៃទាំងនេះ ត្រូវបានពួកគេលួចនាំចូលមកពីខេត្តស្រះកែវ ប្រទេសថៃ បម្រុងយកទៅលក់នៅរាជធានីភ្នំពេញ។
បច្ចុប្បន្នជនសង្ស័យនិងវត្ថុតាង ត្រូវបានកម្លាំងនគរបាលនៃអធិការដ្ឋានស្រុកប្រាសាទបាគងសហការ ជាមួយកម្លាំងនគរបាលការិយាល័យប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តសៀមរាប បានធ្វើកំណត់ហេតុ និងប្រគល់បន្តជូន ខណ្ឌរដ្ឋបាលព្រៃឈើស្រុកបន្ទាយស្រី ដើម្បី ចាត់ការ បន្តតាមនីតិវិធីនៃច្បាប់៕ ដោយ៖កូឡាប