កណ្តាល៖ សាលាដំបូងខេត្តកណ្តាល បានចេញដីការឃុំខ្លួនជនសង្ស័យជាស្ត្រីចំនួន ២នាក់ ពាក់ព័ន្ធករណីគ្រឿងញៀន ដាក់ពន្ធនាគារខេត្តកណ្តាល ក្នុងនោះស្ត្រីជាប់ចោទម្នាក់ មានកូនតូចម្នាក់ ក៏ត្រូវជាប់ឃុំតាមជាមួយម្តាយដែរ។
សូមបញ្ជាក់ថា ថ្ងៃទី២១ ខែកញ្ញា ឆ្នាំ២០២០ កម្លាំងមូលដ្ឋាន កងរាជអាវុធហត្ថស្រុកខ្សាច់កណ្តាល បន្ទាប់ពីទទួលបានព័ត៌មានពីប្រជាពលរដ្ឋថាមានករណី ជួញដូរដោយខុសច្បាប់នូវសារធាតុញៀន នៅចំណុចឃុំព្រះប្រសប់ ស្រុកខ្សាច់កណ្តាល ខេត្តកណ្តាល។
ដោយមានការដឹកនាំចង្អុលបង្ហាញផ្ទាល់ពីលោកឧត្តមសេនីយ៍ មេបញ្ជាការខេត្ត និងមានការសម្របសម្រួលនីតិវិធីពីលោកព្រះរាជអាជ្ញាអមសាលាដំបូងខេត្ត កម្លាំងជំនាញបានចុះដល់ទីកន្លែងជាក់ស្តែង ឃាត់ខ្លួនជនសង្ស័យបាន ចំនួន ០២នាក់ ភេទស្រី និងបានដកហូតវត្ថុតាង ថ្នាំញៀន(ម៉ាទឹកកក) ចំនួន៣២កញ្ចប់, ជញ្ជីងសម្រាប់ថ្លឹងគ្រឿងញៀន ០១គ្រឿង, ទូរស័ព្ទ ០២គ្រឿង, អាវុធខ្លី ០១ដើម, សម្ភារវេចខ្ចប់មួយចំនួន, ប្រាក់រៀល និង ប្រាក់ដុល្លារមួយចំនួន, គ្រឿងអលង្ការមួយចំនួន។
បច្ចុប្បន្ន ជនសង្ស័យ និងវត្ថុតាង សមត្ថកិច្ចកងរាជអាវុធហត្ថខេត្តកណ្តាល បានកសាងសំណុំរឿង បញ្ជូនទៅអយ្យការអមសាលាដំបូងខេត្តតាមនីតិវិធី ហើយតុលាការបានចេញដីកាឃុំខ្លួនជនសង្ស័យដាក់ពន្ធនាគារខេត្ត៕ដោយ បញ្ញាស័ក្តិ
