បន្ទាយមានជ័យ៖ ក្រោមការណែនាំពីឧត្តមសេនីយ៍ឯក ហ៊ុន ម៉ាណែត មេបញ្ជារងកងយោធពលខេមរភូមិន្ទ អគ្គបញ្ជាការកងទ័ពជើងគោក មេបញ្ជាការរងយោធភូមិភាគទី៥ មេបញ្ជាការទិសទីមួយ ឧត្តមសេនីយ៍ទោ ឈុន ម៉ៅ បានដឹកនាំកម្លាំងយោធាក្នុងទីបញ្ជាការកងពលតូចថ្មើរជើងលេខ៥១ប្រមាណ៥០០នាក់ចុះជួយច្រូតកាត់ប្រជាកសិករដែលរងគ្រោះដោយជំនន់ទឹកភ្លៀងលិចលង់ស្រូវរបស់ពួកគាត់កាលពីប៉ុន្មានថ្ងៃនាចុងសប្តាហ៍នេះក្នុងស្រុកមង្គលបូរី។ កម្លាំងយោធាបានសម្រុកចុះច្រូតកាត់ដណ្តើមយកស្រូវពីទឹក ធ្វើឡើងនៅព្រឹកថ្ងៃទី២៦ខែកញ្ញាឆ្នាំ២០២០នេះ នៅចំណុចភូមិក្រម៉ុលឃុំរហាត់ទឹកស្រុកមង្គលបូរីខេត្តបន្ទាយមានជ័យ។
លោកស្រី គង់ សុភាព មេឃុំរហាត់ទឹកបានលើកឡើងថា ស្រូវបងប្អូនប្រជាពលរដ្ឋក្នុងឃុំនេះ ពួកគាត់ធ្វើបានច្រើនសម្រាប់ឆ្នាំនេះ។ តែដោយគ្រោះរាំងស្ងួតអូសបន្លាយរយៈពេលយូរនាដើមរដូវ ធ្វើឲ្យស្រូវដែលបងប្អូនធ្វើបានត្រូវងាប់អស់ស្ទើរគ្មានសល់។ ស្រូវសេសសល់តិចតួចត្រូវបានលិចលង់ដោយជំនន់ទឹកភ្លៀង បន្ទាប់ពីស្រូវទុំជិតល្មមច្រូតកាត់ប្រមូលផល។
សូមបញ្ចាក់ថា នៅប៉ុន្មានថ្ងៃទី២៥-២៦នេះ ស្រូវប្រមាណជាង២០ហិកតារបស់បងប្អូនប្រជាកសិករត្រូវបានទឹកជំនន់គ្រប់គ្រង ធ្វើឲ្យពិបាកក្នុងការច្រូតកាត់ប្រមូលផល តែអរគុណកងកម្លាំងយោធានៃទីបញ្ជាការកងពលតូចថ្មើរជើងលេខ៥១ បានបញ្ចេញកម្លាំងប្រមាណ៥០០នាក់ ជួយច្រូតកាត់ទាន់ពេលវេលាដណ្តើមស្រូវបានមួយចំនួនធំពីទឹកជំនន់ ។
លោកឧត្តមសេនីយ៍ទោ ឈុន ម៉ៅ មេបញ្ជាការរងយោធភូមិភាគទី៥ មេបញ្ជាការទិសទីមួយបន្ទាយមានជ័យថ្លែងថា ដោយកន្លងមក កងពលតូចថ្មើរជើងលេខ៥១បានបញ្ចេញកម្លាំងយោធាចំណុះប្រមាណ៥០០នាក់ ដើម្បីជួយអន្តរាគមន៍ច្រូតកាត់ប្រជាកសិករដែលរងគ្រោះទឹកជំនន់លិចស្រូវ។
បើយោងតាមរបាយការណ៍អាជ្ញាធរឃុំបានឲ្យដឹងថា ស្រូវរងគ្រោះមានប្រមាណជាង២០ហិកតា ដូច្នេះកម្លាំងយោធាយើងត្រូវពួតដៃគ្នាធ្វើការច្រូតកាត់ដណ្តើមស្រូវពីទឹកឲ្យទាន់ពេលវេលា និងរួចរាល់ទាំងស្រុង។ ថ្វីត្បិតការច្រូតកាត់មិនបានទាំងស្រុងតែយ៉ាងហោចណាស់កម្លាំងយើងអាចដណ្តើមយកស្រូវពីទឹកជំនន់ បានពី៧០ទៅ៨០ភាគរយដែរ ព្រោះថាការច្រូតស្រូវក្នុងទឹកមិនមែនជាការងាយស្រួលនោះ យើងមើលដើមស្រូវមិនឃើញ ហើយប្រឈមនិងសត្វអសិរ្ពិសទិចឬខាំទៀតផង ជាក់ស្តែងនៅថ្ងៃទីមួយនៃការច្រូតកាត់នេះ ពលទាហានម្នាក់ដែលចុះទៅច្រូតក្នុងទឹកកណ្តាលវាលស្រែត្រូវក្អែបខាំចំក្បាលបណ្តាលឲ្យរងការឈឺចាប់ខ្លាំង។
លោកឧត្តមសេនីយ៍បញ្ជាក់ថាកម្លាំងយោធានៃបញ្ជាការដ្ឋានកងពលតូចថ្មើរជើងលេខ៥១ ក្រៅពីការងារស្នូលគឺតែងតែចូលរួមគ្រប់សកម្មភាពសង្គម ចុះជួយពលរដ្ឋរងគ្រោះដោយខ្យល់កន្ត្រាក់ ជួសជុលផ្ទះសម្បែងជូនបងប្អូនរងគ្រោះ និង ជាក់ស្តែងចុះជួយច្រូតកាត់ប្រមូលផលគ្រាដែលជំនន់វាយលុកស្ទើរតែរាល់ឆ្នាំ។
ជាមួយនោះដែរ លោកឧត្តមសេនីយ៍ទោបានថ្លែងសារអំពាវនាវដល់ពលរដ្ឋ ដែលមានកូនតូចសូមបង្កើនការប្រុងប្រយ័ត្នឲ្យបានខ្ពស់បំផុត មិនត្រូវឲ្យលេងទឹកឬឡើងដើមឈើនោះទេ ជៀសវាងលង់ សត្វទិចឬខាំ ៕ ដោយ ៖ ថន
