ខេត្តប៉ៃលិន ៖ អតីតប្តី បានលួចទៅទិញទឹកអាស៊ីត យកមកជះដាក់លើស្ត្រីជាប្រពន្ធ បណ្តាលឲ្យរងរបួសធ្ងន់ ដោយសារបុរសរូបនោះ បានមកលួងលោមសុំអតីតប្រពន្ធរួមរស់ជាមួយគ្នាវិញ ២ទៅ៣ដងហើយមិនបានសម្រេច ក៏ប្រព្រឹត្តអំពើព្រៃផ្សៃបែបនេះ។
ហេតុការណ៍បានកើតឡើងនៅម៉ោង១ រំលងអធ្រាត្រឈានចូលថ្ងៃទី២៧ ខែកញ្ញា ឆ្នាំ២០២០ នៅផ្ទះអតីតប្រពន្ធ នៅភូមិប៉ាហ៊ីជើង សង្កាត់ប៉ៃលិន ខេត្តប៉ៃលិន។
សមត្ថកិច្ចបានឲ្យដឹងថា ជនសង្ស័យមានឈ្មោះ សាយ សុខម៉េង ភេទប្រុស អាយុ៣៣ឆ្នាំ នៅភូមិបរតាំងស៊ូ សង្កាត់បរយ៉ាខា ក្រុងនិងខេត្តប៉ៃលិន។ ចំណែកជនរងគ្រោះឈ្មោះ សុខ នួន ហៅណាង ភេទស្រី អាយុ២៥ឆ្នាំ នៅភូមិប៉ាហ៊ីជើង សង្កាត់ប៉ៃលិន ក្រុង និងខេត្តប៉ៃលិន របួសធ្ងន់ កំពុងសម្រាកព្យាបាល នៅមន្ទីរពេទ្យខេត្តប៉ៃលិន។
តាមដំណើររឿងទាំងពីរនាក់នេះ បានយកគ្នាជាប្ដីប្រពន្ធ ដោយគ្មានសំបុត្របញ្ជាក់អាពាហ៍ពិពាហ៍នោះទេ តាំរពីឆ្នាំ២០១៣។ មួយរយៈក្រោយមក អ្នកទាំងពីរនាក់បានធ្វើការនៅប្រទេសថៃ។ ក្រោយពេលវិលត្រឡប់មកវិញឈ្មោះ សាយ សុខម៉េង ជាប្ដី បានសុំលែងលះប្រពន្ធបានមួយរយៈហើយ ក៏មកសុំប្រពន្ធត្រូវគ្នាវិញ ២ ទៅ៣ដង តែប្រពន្ធមិនព្រម ទើបបានជាឈ្មោះ សាយ សុខម៉េង សម្រេចចិត្តលួចទៅទិញទឹកអាស៊ីតយកមកជះដាក់លើអតីតប្រពន្ធ បណ្ដាលឱ្យរបួសធ្ងន់ ហើយជនសង្ស័យបានជិះម៉ូតូរត់គេចខ្លួនបាត់ ខណៈពេលនេះសមត្ថកិច្ចជំនាញកំពុងស្រាវជ្រាវ ដើម្បីឃាត់ខ្លួនជនបង្កយកមកអនុវត្ត តាមនីតិវីធីច្បាប់៕
ដោយ៖បញ្ញាស័ក្តិ