ភ្នំពេញ៖ ជឿជាក់ថាប្រិយមិត្តមួយចំនួនប្រាកដជាបានស្គាល់ហើយ តារាចម្រៀងរាងតូចច្រឡឹង កញ្ញា តន់ ច័ន្ទសីម៉ា ជាអតីតបេក្ខនារីក្នុងវិធីប្រឡងចម្រៀង “សំនៀងចែងចាំង” កាលពី៦ឆ្នាំមុន។ ប៉ុន្តែ គួរឲ្យសោកស្តាយ បើទោះជាទទួលបានការគាំទ្រយ៉ាងខ្លាំងពីសំណាក់ខ្លាំងយ៉ាងណា តែកញ្ញា ច័ន្ទសីម៉ា មិនបានទទួលជ័យលាភីនោះទេ។ តែយ៉ាងណា នាងមិនបានបាក់ទឹកចិត្តនោះទេ ដោយទទួលយកការពិត និងទុកជាបទពិសោធន៍ ហើយនៅតែបន្តចូលរួមប្រកួតតាមកម្មវិធីជាច្រើនដែលក្នុងនោះដូចជា The Voice Cambodia ជាដើម។
ការតស៊ូពិតជាគង់បានសម្រេចមែន! តារាចម្រៀងស្រីវ័យក្មេងរូបនេះ ដែលមហាជនមើលឃើញថាពិតជាមានសមត្ថភាពខ្ពស់ នៅទីបំផុតក៏បានមានឱកាសចូលជាសមាជិកនៅក្នុងផលិតកម្ម Galaxy Navatra ហើយពេលនេះផងដែរ កញ្ញាកំពុងទទួលបានការចាប់អារម្មណ៍ខ្លាំងតែម្តង ក្រោយពីបានចាប់ដៃគូជាមួយតារាចម្រៀងសំឡេងស្អក ខេម នៅក្នុងបទចម្រៀងថ្មី ដែលត្រឹមរយៈពេល៤ថ្ងៃប៉ុណ្ណោះ មានអ្នកចូលទស្សនារហូតដល់ទៅ១លានដងឯណោះ។
ស្របពេលដែលកេរ្តីឈ្មោះកំពុងល្បី ម្ចាស់បទ «នឹកស្រណោះ» រូបនេះ ឃើញថាសម្រស់របស់នាងក៏កាន់តែប្រែប្រួលស្អាតខ្លាំងពីមួយថ្ងៃទៅមួយ ដែលខុសឆ្ងាយពីសម្រស់កាលពីនាងបានចូលប្រលងនៅក្នុងកម្មវិធី «សំនៀងចាងចាំង» កាលពី៦ឆ្នាំមុន។
មិនត្រឹមតែមានរូបសម្រស់ស្រស់ស្អាត និងច្រៀងពិរោះប៉ុណ្ណោះទេ តែ តន់ ច័ន្ទសីម៉ា ក៏មានសមត្ថភាពខ្ពស់ជាអ្នកនិពន្ធ Melody និងទំនុកច្រៀងទៀតផង។ ជាក់ស្តែងដូចជាបទ «ភូមិខ្ញុំ Update» ដែលច្រៀងដោយលោក ព្រាប សុវត្ថិ ជាដើម ដែលទទួលបានការគាំទ្រយ៉ាងខ្លាំងពីសំណាក់មហាជន ព្រោះថាបទចម្រៀងមួយបទនេះ ស្តាប់ទៅទាំងសាច់ភ្លេង និងទំនុកច្រៀង គឺពិតជាពិរោះខ្លាំងណាស់៕ ដោយ៖ លឹម ហុង
