ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នឹងអញ្ជើញចូលរួមកិច្ចប្រជុំប្រមុខរដ្ឋ/រដ្ឋាភិបាលស្តីពី «ហិរញ្ញប្បទាននៃរបៀបវារៈសម្រាប់ការអភិវឌ្ឍដោយចីរភាពឆ្នាំ២០៣០ ក្នុងកាលៈទេសៈកូវីដ-១៩ និងពេលខាងមុខ» ដែលនឹងប្រព្រឹត្តទៅនៅថ្ងៃទី២៩ ខែកញ្ញា ឆ្នាំ២០២០ តាមប្រព័ន្ធវីដេអូថតទុកជាមុន។
បើតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិនៅថ្ងៃទី ២៩ ខែកញ្ញា ឆ្នាំ២០២០ បានឲ្យដឹងថា តបតាមការអញ្ជើញរួមរបស់ ឯកឧត្តម អាន់តូនីញ៉ូ ហ្គូទែរ៉េស អគ្គលេខាធិការអង្គការ សហប្រជាជាតិ ឯកឧត្តម ចេស្ទីន ទ្រូដូ នាយករដ្ឋមន្ត្រីកាណាដា និងឯកឧត្តម អេនដ្រូ ហ្វូណេស នាយករដ្ឋមន្ត្រីហ្សាម៉ាអ៊ុក សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នឹងអញ្ជើញចូលរួមកិច្ចប្រជុំប្រមុខរដ្ឋ/រដ្ឋាភិបាលស្តីពី «ហិរញ្ញប្បទាននៃរបៀបវារៈ សម្រាប់ការអភិវឌ្ឍដោយចីរភាពឆ្នាំ២០៣០ ក្នុងកាលៈទេសៈកូវីដ-១៩ និងពេលខាងមុខ” ដែលនឹង ប្រព្រឹត្តទៅនៅថ្ងៃទី២៩ ខែកញ្ញា ឆ្នាំ២០២០ តាមប្រព័ន្ធវីដេអូថតទុកជាមុន ដែលរៀបចំឡើងស្របពេលសម័យប្រជុំលើកទី៧៥ នៃមហាសន្និបាតអង្គការសហប្រជាជាតិ។
នៅក្នុងសេចក្តីថ្លែងការណ៍ប្រកបដោយអត្ថន័យ សម្តេចតេជោនាយករដ្ឋមន្ត្រី នឹងគូសបញ្ជាក់អំពីវិធានការសម្រាប់រយៈពេលខ្លី មធ្យម និងវែង ដែលអាចចាត់ទុកថាមានប្រសិទ្ធភាពបំផុត ក្នុងការដោះស្រាយវិបត្តិបច្ចុប្បន្ន និងដើម្បីអាចសម្រេចបាននូវរបៀបវារៈ សម្រាប់ការអភិវឌ្ឍប្រកប ដោយចីរភាពឆ្នាំ២០៣០ ព្រមទាំងការពង្រឹងភាពធន់ បរិយាប័ន្ន និងចីរភាពសម្រាប់រយៈពេលវែង។ សម្តេចតេជោ នឹងផ្តល់អនុសាសន៍មួយចំនួនពាក់ព័ន្ធនឹងតួនាទីរបស់អង្គការសហប្រជាជាតិ ក្នុងការ ជួយរដ្ឋសមាជិក ដើម្បីជម្នះវិបត្តិនាពេលបច្ចុប្បន្ន និងកសាងអនាគតប្រសើរជាងមុន៕ដោយ៖កូឡាប