មណ្ឌលគីរី៖ ឯកឧត្តមកិត្តិសេដ្ឋាបណ្ឌិត ឆាយ ថន បានថ្លែងថា រាជរដ្ឋាភិបាលកម្ពុជា ប្តេជ្ញាចិត្តបន្តកិច្ចខិតខំប្រឹងប្រែង និងពង្រឹងកិច្ចសហការល្អជាមួយនឹងស្ថាប័នរបស់អង្គការសហប្រជាជាតិ និងប្រទេសជារដ្ឋភាគីទាំងអស់ ជាពិសេស អង្គការសុខភាពពិភពលោក ក្នុងការប្រយុទ្ធប្រឆាំងនឹងជំងឺឆ្លងកូវីដ-១៩ សំដៅលុបបំបាត់ទាំងស្រុងជំងឺកូវីដ-១៩ ។
ឯកឧត្តមកិត្តិសេដ្ឋាបណ្ឌិត ឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការ ថ្លែងក្នុងពិធីបើកសិក្ខាសាលាផ្សព្វផ្សាយ ការជំរុញការអនុវត្តគោលនយោបាយជាតិប្រជាជន ២០១៦-២០៣០ ក្នុងក្របខ័ណ្ឌគោលដៅអភិវឌ្ឍន៍ប្រកបដោយចីរភាពកម្ពុជា ៖ បញ្ហាសុខុមាលភាពនិងសុខភាពបន្តពូជយុវវ័យ នាព្រឹកថ្ងៃទី២៩ ខែកញ្ញា ឆ្នាំ២០២០ នៅសាលាខេត្តមណ្ឌលគីរី ។
ឯកឧត្តមកិត្តិសេដ្ឋាបណ្ឌិត បានមានប្រសាសន៍ថា សិក្ខាសាលានេះ រៀបចំឡើងក្នុងគោលបំណងជំរុញការអនុវត្តគោលនយោបាយជាតិប្រជាជន ២០១៦-២០៣០ ក្នុងក្របខ័ណ្ឌគោលដៅអភិវឌ្ឍន៍ប្រកបដោយចីរភាពកម្ពុជា ឱ្យកាន់តែមានប្រសិទ្ធភាព តាមរយៈការបញ្ជ្រាបការយល់ដឹងឲ្យទូលំទូលាយដល់អ្នកមានចំណែកពាក់ព័ន្ធទាំងអស់ ពិសេស មន្រី្តមន្ទីរផែនការថ្នាក់រាជធានី-ខេត្ត មន្ទីរវិស័យ អ្នកមានចំណែកពាក់ព័ន្ធ ព្រមទាំងសង្គមស៊ីវិល អំពីទស្សនៈវិស័យ យុទ្ធសាស្ត្រ ផែនការ គោលនយោបាយជាតិ និងគោលដៅអភិវឌ្ឍន៍ប្រកបដោយចីរភាពរបស់រាជរដ្ឋាភិបាល ដោយផ្សារភ្ជាប់ជាមួយនឹងបញ្ហាប្រជាជននិងការអភិវឌ្ឍ រួមមាន បញ្ហាបម្រែបម្រួលប្រជាសាស្ត្រ បញ្ហាមនុស្សវ័យចាស់ បញ្ហាទេសន្តរប្រវេសន៍និងនគរូបនីយកម្ម បញ្ហាយុវជននិងការអប់រំ និង បញ្ហាសុខុមាលភាពនិងសុខភាពបន្តពូជយុវវ័យ។
ឯកឧត្តមកិត្តិសេដ្ឋាបណ្ឌិត បានលើកឡើងថា ជំងឺកូវីដ-១៩ បានបង្កបញ្ហាប្រឈមដល់មនុស្សគ្រប់គ្នានៅលើពិភពលោក ក្នុងនោះ ស្ត្រីជាមុខសញ្ញាចម្បងដែលអាចទទួលរងការប៉ះពាល់មុនគេ ជាពិសេសបុគ្គលិកសុខាភិបាលជួរមុខជាស្ត្រី។ ជាក់ស្ដែងថ្មីៗនេះ ការសិក្សាស្រាវជ្រាវរបស់ អង្គការមូលនិធិសហប្រជាជាតិសម្រាប់ប្រជាជន (UNFPA) បង្ហាញថាប្រសិនបើវិធានការបង្ខាំង បន្តរយៈពេល៦ខែទៀត ហើយការផ្តល់សេវាសុខាភិបាលមិនបានពេញលេញដោយសារជំងឺកូវីដ-១៩ ពេលនោះនឹងមានស្ត្រីជាង ៤៧លាននាក់នៅក្នុងបណ្តាប្រទេស ដែលមានចំណូលទាបនិងចំណូលមធ្យម នឹងមិនអាចទទួលបានសេវាពន្យារកំណើតទំនើប ដែលជាលទ្ធផល ស្ត្រីប្រហែល ៧លាននាក់នឹងអាចមានផ្ទៃពោះមិនតាមប្រាថ្នា ហើយអំពើហឹង្សាផ្អែកលើយេនឌ័រនឹងអាចកើតមានប្រហែល ៣១លានករណីបន្ថែមទៀត។ លើសពីនេះទៀត បើធៀបនឹងបុរស ស្ត្រីធ្វើការនៅក្នុងទីផ្សារពលកម្មដែលមិនសូវមានសុវត្ថិភាព ត្រូវរងផលប៉ះពាល់ផ្នែកសេដ្ឋកិច្ចធ្ងន់ធ្ងរជាង ពីវិបត្តិកូវីដ-១៩។ ស្ត្រីជិត ៦០% នៅទូទាំងពិភពលោកកំពុងធ្វើការនៅក្នុងវិស័យសេដ្ឋកិច្ចក្រៅប្រព័ន្ធ ដែលងាយរងហានិភ័យខ្ពស់ក្នុងការធ្លាក់ចូលក្នុងភាពក្រីក្រ។ ការងារថែទាំដែលមិនមានប្រាក់កម្រៃរបស់ស្ត្រីមានការកើនឡើង ដោយសារការបិទសាលារៀន និងការកើនឡើងនៃតម្រូវការរបស់មនុស្សវ័យចាស់។ ជំងឺឆ្លងកូវីដ-១៩ កំពុងវាយលុកសហគមន៍ ដែលងាយរងគ្រោះ ជាពិសេស ការកើតមានវិសមភាពកាន់តែខ្លាំង និងការរារាំងដល់កិច្ចខិតខំប្រឹងប្រែងសម្រេចគោលដៅរួមរបស់យើងគឺ “ការកសាងពិភពលោកមួយ ដែលគ្មាននរណាម្នាក់ត្រូវបានបំភ្លេចចោល”។
ឯកឧត្តមកិត្តិសេដ្ឋាបណ្ឌិត បានបញ្ជាក់បន្តថា ក្នុងស្មារតីនេះ រាជរដ្ឋាភិបាលកម្ពុជា ប្តេជ្ញាចិត្តបន្តកិច្ចខិតខំប្រឹងប្រែងនិងពង្រឹងកិច្ចសហការល្អជាមួយនឹងស្ថាប័នរបស់អង្គការសហប្រជាជាតិ និងប្រទេសជារដ្ឋភាគីទាំងអស់ ជាពិសេស អង្គការសុខភាពពិភពលោក ក្នុងការប្រយុទ្ធប្រឆាំងនឹងជំងឺឆ្លងកូវីដ-១៩ សំដៅលុបបំបាត់ទាំងស្រុងជំងឺកូវីដ-១៩ និងការពារសុខុមាលភាពរបស់ប្រជាជនកម្ពុជា ក៏ដូចជាប្រជាជនក្នុងពិភពលោក។
ឯកឧត្តមកិត្តិសេដ្ឋាបណ្ឌិត បានបន្តថា ការជំរុញការអនុវត្តគោលនយោបាយជាតិប្រជាជន ២០១៦-២០៣០ ក្នុងក្របខ័ណ្ឌគោលដៅអភិវឌ្ឍន៍ប្រកបដោយចីរភាពកម្ពុជា ៖ បញ្ហាសុខុមាលភាព និងសុខភាពបន្តពូជយុវវ័យ គឺបង្ហាញពីភាពចាំបាច់ក្នុងការធានាឱ្យមានការធ្វើផែនការអភិវឌ្ឍន៍ មានលក្ខណៈគ្របដណ្តប់និងគ្រប់ជ្រុងជ្រោយ តាមរយៈការគិតគូរនិងបញ្ចូលកត្តាឌីណាមិកប្រជាសាស្ត្រ ដែលកំពុងកើតមាននាពេលបច្ចុប្បន្ននិងដែលបន្តកើតមាននាពេលអនាគត ទៅក្នុងការធ្វើផែនការ ដោយគិតគូរដល់ទំនាក់ទំនងពហុវិស័យរវាងបញ្ហាប្រជាជននិងការអភិវឌ្ឍ ការរក្សានូវតម្លៃវប្បធម៌និងប្រពៃណីខ្មែរ និងការធានាការគោរពសិទ្ធិមនុស្សជាមូលដ្ឋាន។
ដោយ៖កូឡាប