ភ្នំពេញ៖ ក្នុងឱកាស អបអរសាទរទិវាអន្តរជាតិស្តីពី “សិទ្ធិទទួលព័ត៌មាន” ២៨ កញ្ញា ២០២០ លោកជិនម៉ាលីនអ្នកនាំពាក្យនិងជារដ្ឋលេខាធិការក្រសួងយុត្តិធម៌ បានលើកឡើងនូវ៥ចំណុច អំពីការអនុវត្តសិទ្ធិទទួលព័ត៌មាននៅកម្ពុជា ក្នុងនោះសារព័ត៌មាន ជាវិជ្ជាជីវៈសេរី តែក៏ត្រូវស្ថិតក្រោមការគ្រប់គ្រងនិងក្របខ័ណ្ឌច្បាប់ផងដែរ រួមមានច្បាប់ស្តីពីរបបសារព័ត៌មាននិងបញ្ញត្តិច្បាប់ផ្សេងៗទៀតដែលពាក់ព័ន្ធ បានន័យថាបើអ្នកសារព័ត៌មានមានកំហុសខាងវិជ្ជាជីវៈ គឺត្រូវទទួលខុសត្រូវតាមច្បាប់ស្តីពីរបបសារព័ត៌មាន។
អ្នកនាំពាក្យក្រសួងយុត្តិធម៌បានបញ្ជាក់ថា៥ចំណុច អំពីការអនុវត្តសិទ្ធិទទួលព័ត៌មាននៅកម្ពុជា៖
១. សិទ្ធិទទួលព័ត៌មាន ត្រូវបានធានានិងការពារនៅកម្ពុជាតាមរយៈយន្តការច្បាប់និងស្ថាប័ន រួមមានការរៀបចំក្របខណ្ឌច្បាប់សំខាន់ៗ និងចាំបាច់មួយចំនួនពាក់ព័ន្ធសេរីភាពសារព័ត៌មាន ជាពិសេសសេចក្តីព្រាងច្បាប់ស្តីពីសិទ្ធិទទួលព័ត៌មាន ដែលនឹងបញ្ចប់ក្នុងពេលឆាប់ៗខាងមុខនេះ និងការអនុញ្ញាតឱ្យបង្កើតនិងដំណើរការស្ថាប័នព័ត៌មានទាំងជាតិនិងអន្តរជាតិនៅកម្ពុជា និងធ្វើការផ្សព្វផ្សាយដោយសេរី មិនមានការត្រួតពិនិត្យជាមុន (Prior-censorship)។
២. វិជ្ជាជីវៈសារព័ត៌មាននៅកម្ពុជាបច្ចុប្បន្ន ពុំទាន់មានការវិវត្តន៍និងភាពចាស់ទុំដល់កម្រិតមួយដែលអាចរៀបចំបទបញ្ញត្តិ ក្នុងការគ្រប់គ្រងក្រុមរបស់ខ្លួនដោយខ្លួនឯង (Self regulation) ដូចបណ្តាប្រទេសលោកខាងលិចមួយចំនួនបាននោះទេ ដូច្នេះ ចាំបាច់រដ្ឋត្រូវធ្វើអន្តរាគមន៍ក្នុងការរៀបចំបទបញ្ញត្តិ និងគ្រប់គ្រងដើម្បីធានាបាននូវវិជ្ជាជីវៈនិងសណ្តាប់ឆ្នាប់សារព័ត៌មាននៅកម្ពុជា។
៣. សារព័ត៌មាន ជាវិជ្ជាជីវៈសេរី តែក៏ត្រូវស្ថិតក្រោមការគ្រប់គ្រងនិងក្របខ័ណ្ឌច្បាប់ផងដែរ រួមមានច្បាប់ស្តីពីរបបសារព័ត៌មាននិងបញ្ញត្តិច្បាប់ផ្សេងៗទៀតដែលពាក់ព័ន្ធ បានន័យថាបើអ្នកសារព័ត៌មានមានកំហុសខាងវិជ្ជាជីវៈ គឺត្រូវទទួលខុសត្រូវតាមច្បាប់ស្តីពីរបបសារព័ត៌មាន តែបើអ្នកសារព័ត៌មានប្រព្រឹត្តបទល្មើសព្រហ្មទណ្ឌ គឺត្រូវទទួលខុសត្រូវតាមបញ្ញត្តិច្បាប់ព្រហ្មទណ្ឌ។
៤. វាជារឿងមិនត្រឹមត្រូវនិងសមហេតុសមផលនោះទេ ការដែលក្រុមមួយហៅខ្លួនឯងថា សារព័ត៌មានឯករាជ្យដោយសារតែខ្លួនហ៊ានរិះគន់រដ្ឋាភិបាលនោះ ព្រោះថាសារព័ត៌មានវិជ្ជាជីវៈត្រូវធ្វើការផ្សព្វផ្សាយទាំងចំណុចវិជ្ជមាននិងអវិជ្ជមានរបស់រដ្ឋាភិបាល ដើម្បីជាប្រយោជន៍ដល់សង្គមនិងផ្តល់ព័ត៌មានពិតក៏ដូចជាចំណេះដឹងដល់សាធារណជន មិនមែនផ្តោតតែលើចំណុចអវិជ្ជមានដែលធ្វើឡើងដោយកំហឹង និងគំនុំគំគួនជាមួយរដ្ឋាភិបាលនិងដើម្បីបម្រើផលប្រយោជន៍នយោបាយនោះទេ។
៥. កម្ពុជាគ្មានទេសារព័ត៌មានឯករាជ្យ គឺមានតែសារព័ត៌មានវិជ្ជាជីវៈ និងគ្មានវិជ្ជាជីវៈ។ សារព័ត៌មានវិជ្ជាជីវៈគឺជាសារព័ត៌ដែលគោរពបានយ៉ាងខ្ជាប់ខ្ជួននូវក្រមសីលធម៌វិជ្ជាជីវៈ និងបញ្ញត្តិច្បាប់ផ្សេងៗពាក់ព័ន្ធនឹងសារព័ត៌មាន ហើយធ្វើការផ្សព្វផ្សាយនិងវិភាគប្រកបដោយការទទួលខុសត្រូវ៕ ដោយ៖កូឡាប
