ភ្នំពេញ៖ ឯកឧត្តម តុប សំ ប្រធាន ក្រុមប្រឹក្សាជាតិប្រឆាំងអំពើពុករលួយ បានថ្លែងថា ក្រុមប្រឹក្សាជាតិប្រឆាំងអំពើពុករលួយ បានបង្ហាញជំហរយ៉ាងម៉ឺងម៉ាត់ក្នុងការគាំទ្រ រួមគ្នាទទួលខុសត្រូវជាមួយអង្គភាពប្រឆាំងអំពើពុករលួយ ក្នុងការប្រយុទ្ធប្រឆាំងអំពើពុករលួយ ។
ក្រុមប្រឹក្សាជាតិប្រឆាំងអំពើពុករលួយ (ក.ជ.ប.ព.) បើកកិច្ចប្រជុំលើកទី៣ អាណត្តិទី៣ នៅថ្ងៃទី២៩ ខែកញ្ញា ឆ្នាំ២០២០ ក្រោមអធិបតីភាព ឯកឧត្តម តុប សំ ប្រធានក្រុមប្រឹក្សាជាតិប្រឆាំងអំពើពុករលួយ។
បើតាមរបាយការណ៍របស់ ឯកឧត្តមទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ អំពីសកម្មភាពការងាររបស់អង្គភាពប្រឆាំងអំពើពុករលួយ ក្នុងអំឡុងខែកញ្ញា ឆ្នាំ២០២០ ដែលមានជាអាទិ៍៖ការប្រកាសទ្រព្យសម្បត្តិ និងបំណុល៖ មានសរុបចំនួន ២៦០នាក់ ដែលក្នុងនោះ តែងតាំងថ្មីមាន ១៤០នាក់ ប្រកាសទ្រព្យសម្បត្តិ និងបំណុលជាលើកចុងក្រោយ ដោយការលាឈប់ពីការងារ -ចប់អាណត្តិ – ត្រូវបញ្ឈប់ពីការងារ – ចូលនិវត្តន៍ មាន ១២០នាក់ ។
ពាក្យប្តឹងក្នុងខែកញ្ញា មាន ៦៦ពាក្យប្តឹង (អនាមិក ១៧ពាក្យប្តឹង ស្មើនឹង ២៥,៧ %) – អង្គភាពប្រឆាំងអំពើពុករលួយ បានកោះហៅជនរងការចោទពីពាក្យប្តឹង ៥នាក់មកផ្តល់ចម្លើយ ។
អង្គភាពប្រឆាំងអំពើពុករលួយ បានទទួលការបំភ្លឺមកវិញពីក្រសួងស្ថាប័ន និង បុគ្គលតាមពាក្យប្តឹងចំនួន ២៤លិខិត មានពាក្យប្តឹង ២៥ ដែលអង្គភាពប្រឆាំងអំពើពុករលួយ ឆ្លើយតបទៅម្ចាស់បណ្ដឹងថា មិនស្ថិតនៅក្នុងសមត្ថកិច្ចអង្គភាពប្រឆាំងអំពើពុករលួយទេ ឬមិនមានតម្រុយអំពីអំពើពុករលួយឡើយ។
អង្គភាពប្រឆាំងអំពើពុករលួយ បានធ្វើលិខិតជូនស្ថាប័ន និងបុគ្គលដែលពាក្យប្តឹង បានលើកឡើងចំនួន ២៦លិខិត ។
ប្រធានក្រុមប្រឹក្សាជាតិប្រឆាំងអំពើពុករលួយបានថ្លែងថា ការងារប្រយុទ្ធប្រឆាំងអំពើពុករលួយ គឺជាកិច្ចការងារមួយដ៏លំបាកស្មុគស្មាញ ដែលចាំបាច់ត្រូវការ ភាពអំណត់ ឈ្លាសវៃ ប៉ិនប្រសព្វ និងដោះស្រាយប្រកបដោយវិជ្ជាជីវៈ ។ ក្រុមប្រឹក្សាជាតិប្រឆាំងអំពើពុករលួយ បានបង្ហាញជំហរយ៉ាងម៉ឺងម៉ាត់ក្នុងការគាំទ្រ រួមគ្នាទទួល ខុសត្រូវជាមួយអង្គភាពប្រឆាំងអំពើពុករលួយ ក្នុងការប្រយុទ្ធប្រឆាំងអំពើពុករលួយ ៕ ដោយ៖កូឡាប