ភ្នំពេញ៖ ឯកឧត្តម នាយឧត្តមសេនីយ៍ មៀច សុផាន់ណា រដ្ឋលេខាធិការ ក្រសួងមហាផ្ទៃ និងជាប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយ បានដឹកនាំក្រុមការងារ ចូលរួមវេទិការ អាស៊ី-អឺរុប ស្តីពីឱសថក្លែងក្លាយ និងអន់គុណភាព តាមរយៈប្រព័ន្ធវីដេអូសន្និសីទជាមួយប្រទេសជាសមាជិកអាស៊ាន ក្រោមអធិបតីភាព ឯកឧត្តមបណ្ឌិតសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាលនៅទីស្ដីការក្រសួងមហាផ្ទៃ នារសៀលថ្ងៃទី២៩ ខែកញ្ញា ឆ្នាំ២០២០។
ក្នុងវេនទិកាអាស៊ី-អឺរ៉ុប មានវាគ្មិនសំខាន់ៗ ចូលរួមជាតំណាង នៃប្រទេសសមាជិក Asia-Europe Meeting
(ASEM 53 Partners : 30 European and 21 Asian countries, the European Union and the ASEAN Secretariat) ព្រមទាំងដៃគូអភិវ្ឍន៍មួយចំនួនទៀត ហើយក្នុងកិច្ចប្រជុំនេះផងដែរ នាយឧត្តមសេនីយ៍ មៀច សុផាន់ណា នឹអញ្ជើញចូលរួមជាវាគ្មិន ធ្វើបទបង្ហាញស្តីពី យុទ្ធសាស្ត្រក្នុងការអនុវត្តច្បាប់ ប្រយុទ្ធប្រយុទ្ធប្រឆាំងឱសថក្លែងក្លាយ និងអន់គុណភាព ក្នុងព្រះរាជាណាចក្រកម្ពុជា នៅថ្ងៃទី៣០ ខែកញ្ញា ពេលរសៀល ។
សូមជម្រាបថា វេទិការអាស៊ីអឺរុបស្តីពីឱសថក្លែងក្លាយ និងអន់គុណភាពនេះ ត្រូវបានរៀបចំឡើងក្នុងគោលបំណង៖
-លើកកម្ពស់ការយល់ដឹងស្ដីពី គ្រោះថ្នាក់នៃឱសថក្លែងក្លាយ និងអន់គុណភាព ដែលបង្កជាបញ្ហាដល់វិស័យសុខភាពសាធារណៈ និងវិស័យសុខាភិបាល ក៏ដូចជាបង្កជាបន្ទុកដល់សេដ្ឋកិច្ចជាតិផងដែរ។
-ពិភាក្សាពីផលប៉ះពាល់នៃការរីករាលដាលនៃជំងឺរាតត្បាតកូវីដ-១៩ទៅលើឱសថក្លែងក្លាយ និងអន់គុណភាព និងផ្ដល់នូវការណែនាំនានាក្នុងការប្រឈមមុខនឹងបញ្ហាពាក់ព័ន្ធនានា
ហើយចែករំលែកនូវការប្តេជ្ញាចិត្តរបស់អាស៊ាន តាមរយៈសេចក្តីថ្លែងការណ៍រួមរបស់រដ្ឋមន្ត្រីសុខាភិបាលអាស៊ានលើកទី១៤ ស្ដីពីឱសថក្លែងក្លាយ និងអន់គុណភាព។
-លើកទឹកចិត្តឲ្យមានកិច្ចសន្ទនាអាស៊ី-អឺរ៉ុប រវាងអ្នកពាក់ព័ន្ធមកពីវិស័យផ្សេងៗ ដើម្បីអនុវត្ត គោលនយោបាយ និងការអនុវត្តច្បាប់ស្តីពីឱសថក្លែងក្លាយ និងអន់គុណភាព។
-ឯកភាពគ្នាលើវិស័យជាអាទិភាព សម្រាប់កិច្ចសហប្រតិបត្តិការពហុវិស័យ និងអន្តរជាតិ រវាងអាស៊ីនិង អឺរ៉ុបស្តីពីការប្រយុទ្ធប្រឆាំងនឹងឱសថក្លែងក្លាយ និងអន់គុណភាព។
សូមជម្រាបជូនផងដែរថា វេទិកានេះប្រព្រឹត្តិទៅមានរយៈពេលពីរថ្ងៃគឺចាប់ពីថ្ងៃទី២៩ ដល់៣០ ខែកញ្ញា ឆ្នាំ២០២០ ដោយក្នុងកម្មវិធី នេះគណៈកម្មាធិការប្រយុទ្ធប្រឆាំងផលិតផលក្លែងក្លាយ ត្រូវធ្វើជាវាគ្មិនដើម្បីធ្វើ បទបង្ហាញស្តីពីយុទ្ធសាស្ត្រ ក្នុងការអនុវត្តច្បាប់សម្រាប់ការបង្ក្រាបឱសថក្លែងក្លាយ និងអន់គុណភាព របស់ប្រទេសកម្ពុជា ជូនដល់ប្រទេសជាសមាជិកអាស៊ាន ក្នុងអង្គវេទិកាអាស៊ីអឺរុបស្តីពីឱសថក្លែងក្លាយ និងអន់គុណភាពផងដែរ៕ ដោយ៖កូឡាប