ភ្នំពេញ៖ ឯកឧត្តម ទេសរដ្ឋមន្ដ្រី វ៉ា គឹមហុង ប្រធានលេខាធិការដ្ឋានអចិន្ដ្រៃយ៍ នៃអាជ្ញាធរជាតិទទួលបន្ទុកកិច្ចការព្រំដែន បានអះអាងថា កម្ពុជានឹងខិតខំប្រឹងប្រែងដើម្បីបោះបង្គោលព្រំដែន ដែលនៅសេសសល់១៦ភាគរយ ជាមួយភាគីវៀតណាម ឲ្យបញ្ចប់ក្នុងពេលឆាប់ៗខាងមុខនេះ ហើយធានាមិនឲ្យបាត់ដីសូម្បីមួយមីល្លីម៉ែត្រនោះឡើយ។
ក្នុងវេទិកាផ្សព្វផ្សាយស្ដីពីការងារខណ្ឌសីមា និងបោះបង្គោលព្រំដែនគោក កម្ពុជា- វៀតណាម នៅព្រឹកថ្ងៃទី២៩ ខែកញ្ញា ឆ្នាំ២០២០នេះ ទេសរដ្ឋមន្ដ្រី វ៉ា គឹមហុង បានគូសបញ្ជាក់ថា កិច្ចការបង្គោលព្រំដែននេះមិនមែនជារឿងងាយស្រួលនោះទេ ហើយទាមទារឲ្យមានការសិក្សាលើផែនទីច្បាស់លាស់ជាមួយស្ថានភាពជាក់ស្ដែង។
តាមកាបញ្ជាក់របស់ ឯកឧត្តម ទេសរដ្ឋមន្ដ្រី វ៉ា គឹមហុង ឧបសគ្គដែលភាគីកម្ពុជា- វៀតណាម ជួបប្រទះក្នុងការងារបោះ បង្គោលព្រំដែននេះ គឺមានទាំងឧបសគ្គបច្ចេកទេស ឧបសគ្គផ្លូវច្បាប់ ហើយរហូត ដល់នាយករដ្ឋមន្ដ្រីប្រទេសទាំងពីរ ស្នើសុំប្រធានាធិបតីបារាំង បញ្ជូនអ្នកជំនាញបារាំងជួយលើការងារនេះផងដែរ ពិសេសលើការងារបំលែងផែនទីពី ១/១០០ ០០០ មក១/៥០ ០០០។
ឯកឧត្តម ទេសរដ្ឋមន្ដ្រី វ៉ា គឹមហុង បានថ្លែងយ៉ាងដូច្នេះថា «ការងារបោះបង្គោលព្រំដែន ដែលនៅសល់១៦ភាគរយ យើងនឹងខិតខំសម្រេចឲ្យបាននៅក្នុងពេលឆាប់ៗខាងមុខនេះ បើអាចធ្វើទៅបាន ប៉ុន្ដែមាន កត្តាច្រើន ដែលជាឧបសគ្គត្រូវរកដំណោះ ស្រាយ មានទាំងឧបសគ្គបច្ចេកទេស ឧបសគ្គផ្លូវច្បាប់»។ ប៉ុន្ដែអ្វីដែលសម្រេចបានរហូតមកដល់ពេលនេះ គឺការបោះ បង្គោលព្រំដែនបាន៨៤ភាគរយ ទេសរដ្ឋមន្ដ្រី បានចាត់ទុកថា នេះជាមោទនភាពខ្លាំងណាស់សម្រាប់កម្ពុជា ព្រោះក្នុងប្រវត្តិសាស្ដ្រមិនដែលធ្លាប់មាននោះទេ។
ឯកឧត្តម ទេសរដ្ឋមន្ដ្រី បានអះអាងទៀតថា កម្ពុជា-វៀតណាម បានធ្វើពិធីសារមួយស្ដីពីការកំណត់ព្រំដែនរវាងប្រទេសទាំងពីរផងដែរ។ ឯកឧត្តម សង្កត់ធ្ងន់ថា ពិធីសារនេះ គឺធ្វើឡើងដើម្បីបរិយាយអំពីខ្សែព្រំដែនទាំងអស់ ពីតំបន់កន្ទុយនាគ រហូតដល់កំពត (បង្គោលលេខ៣១៤) ដែលមានកម្រាស់ជាង២,០០០ទំព័រ។ ពាក់ព័ន្ធនឹងសំណួរថា តើប្រជាពលរដ្ឋខ្មែរអាចមាន ផលលំបាកក្នុងការយល់អំពីបញ្ហាបោះ បង្គោលព្រំដែន ដែលសុទ្ធតែការងារបច្ចេកទេសដែរឬទេ? ទេសរដ្ឋមន្ដ្រី វ៉ា គឹម ហុង បានឆ្លើយតប និងបង្ហាញជំនឿថា ប្រជាពលរដ្ឋមិនលំបាកយល់នោះទេ លើការងារព្រំដែន ប្រសិនបើមិនមានអ្នកនយោ បាយទៅបំផុសបំផុល និងបំផ្លើសពីការពិតលើការងារនេះ។
ឯកឧត្តម បន្តថា រាជរដ្ឋាភិបាលកម្ពុជា មានឆន្ទៈខ្ពស់ណាស់ក្នុងការការពារបូរណភាពទឹកដី ដោយមិនអនុញ្ញាតឲ្យខ្មែរបាត់ដីដូចអតីតកាលទៀតនោះឡើយ ពោលរក្សាអ្វីដែលមាននៅពេលបច្ចុប្បន្ននេះ ហើយចំណុចដែលមិនទាន់ព្រមព្រៀងគ្នា ១៦ភាគរយនោះ គឺទាមទារឲ្យមានការឯកភាពគ្នារវាងភាគីទាំងពីរ ព្រោះភាគីនីមួយៗសុទ្ធតែមានភស្ដុតាងច្បាស់លាស់ ក្នុងការការពារបូរណភាព ទឹកដីរបស់ខ្លួន។
សូមបញ្ជាក់ថា កម្ពុជា-វៀតណាម មានព្រំដែនគោកជាមួយគ្នាប្រវែងប្រមាណ ១.២៧០គីឡូម៉ែត្រ។ ប្រទេសទាំងពីរបានឯកភាព និងព្រមព្រៀងគ្នាកំណត់ខណ្ឌសី មា និងបោះបង្គោលព្រំដែនសម្រេចបានប្រមាណ ៨៤ភាគរយ ហើយត្រូវបានសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា និងនាយករដ្ឋមន្ដ្រីវៀតណាម ចុះហត្ថលេខាទទួលស្គាល់លទ្ធផលបោះបង្គោលព្រំដែន នាព្រឹកថ្ងៃទី៥ ខែតុលា ឆ្នាំ២០១៩៕ ដោយ៖បញ្ញាស័ក្តិ