សៀមរាប ៖ ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប បានដឹកនាំកិច្ចប្រជុំបូកសរុបការវាស់វែង របស់ក្រុមការងារនិងសិក្សាផលប៉ះពាល់សំណង់ ដែលអនុវត្តគម្រោងហេដ្ឋារចនាសម្ព័ន្ធទាំង ៣៨ខ្សែ ជាអំណោយដ៏ថ្លៃថ្លារបស់សម្តេចតេជោ នាយករដ្ឋមន្ត្រីបានប្រគល់ជូនខេត្តសៀមរាប ដើម្បីស្តារហេដ្ឋារចនាសម្ព័ន្ធ ក្នុងខេត្តឱ្យកាន់តែមានភាពប្រសើរឡើងវិញ កាលពីព្រឹកថ្ងៃទី២៩ ខែកញ្ញា ឆ្នាំ២០២០ ។
ឯកឧត្តម ទៀ សីហា ក៏បានជំរុញដល់ក្រុមការងារទាំងអស់ត្រូវវាស់វែងឱ្យប្រព្រឹត្តទៅបានរលូន និងស្របតាមផែនការដែលបានគ្រោងទុក។ ជាមួយគ្នានេះ ឯកឧត្តម ក៏បានបញ្ជាក់បន្ថែមដល់ក្រុមការងារទាំងអស់ត្រូវធ្វើរបាយការណ៍ជាប្រចាំអំពីលទ្ធផលវាស់វែង និងផលប៉ះពាល់ទាំងអស់ ដើម្បីធ្វើការបូកសរុបរបាយការណ៍ ស្តីពីផលប៉ះពាល់ជូនគណៈកម្មការអន្តរក្រសួង។
នាឱកាសនេះដែរ ឯកឧត្តម ក៏បានថ្លែងអំណរគុណដល់ក្រុមការងារទាំងអស់ ដែលបានខិតខំយកអស់កម្លាំងកាយចិត្ត ដើម្បីអនុវត្តគម្រោងនេះប្រកបដោយប្រសិទ្ធភាពខ្ពស់ និងថ្លែងអំណរគុណបងប្អូនប្រជាពលរដ្ឋ ដែលរស់នៅតាមផ្លូវ ដែលរាជរដ្ឋាភិបាលបានគ្រោងនឹងសាងសង់នេះ ដោយមានការចូលរួមសហការជាមួយក្រុមការងារយ៉ាងសស្រាក់សស្រាំ ក្នុងការរុះរើសំណង់របស់ខ្លួនចេញឱ្យទាន់ពេលវេលា។
ក្នុងនាមក្រុមការងារអន្តរក្រសួង ក៏ដូចជារដ្ឋបាលខេត្ត ឯកឧត្តម អភិបាលខេត្តបានស្នើដល់បងប្អូនបន្តចូលរួមសហការជាមួយអាជ្ញាធរគ្រប់លំដាប់ថ្នាក់ ដើម្បីឱ្យការអនុវត្តគម្រោងនេះប្រព្រឹត្តទៅតាមផែនការដែលបានគ្រោងទុក។
រដ្ឋបាលខេត្តសៀមរាប សូមសរសើរចំពោះការស្ម័គ្រចិត្តរបស់ បងប្អូនប្រជាពលរដ្ឋ ៩១គ្រួសារ ដែលបានរស់នៅលើគន្លងផ្លូវ២២ម៉ែត្រ ក្រោយពេទ្យគន្ធបុប្ផា ដែលជាផ្លូវមួយក្នុងចំណោមផ្លូវសាងសង់ទាំង ៣៨ខ្សែ បន្ទាប់ពីរដ្ឋបាលខេត្តចេញសេចក្តីជូនដំណឹងរួចមក បងប្អូនប្រជាពលរដ្ឋ ៩១គ្រួសារ ដែលកំពុងរស់នៅក្រោយពេទ្យគន្ធបុប្ផា បានសហការរុះរើសំណង់របស់ខ្លួនដោយខ្លួនឯង កាលពីថ្ងៃទី៣០ ខែកញ្ញា ឆ្នាំ២០២០ ដែលគម្រោងបើកផ្លូវនេះ នឹងចាប់សាងសង់ពង្រីកផ្លូវទំហំ ២២ម៉ែត្រ។
ជាមួយគ្នានេះ រដ្ឋបាលខេត្ត បានសង្កេតឃើញថា បងប្អូនប្រជាពលរដ្ឋបានស្ម័គ្រចិត្តរុះរើសំណង់របស់ខ្លួន ដែលបានសាងសង់នៅលើផ្លូវកន្លងមក ដើម្បីឱ្យអាជ្ញាពាក់ព័ន្ធអនុវត្តការពង្រីក និងសាងសង់ផ្លូវទាំង ៣៨ខ្សែ ឱ្យស្របទៅតាមផែនការដែលបានគ្រោងទុក។
រដ្ឋបាលខេត្តសង្ឃឹមយ៉ាងមុតមាំថា បងប្អូននឹងបន្តចូលរួមសហការជាមួយអាជ្ញាធរខេត្ត ដើម្បីការកែលម្អ និងស្តារហេដ្ឋារចនាសម្ព័ន្ធរបស់ខេត្តសៀមរាបយើង ឱ្យស័ក្តិសមជាខេត្តទេសចរណ៍ប្រវត្តិសាស្ត្រ។
សកម្មភាពរុះរើរបស់បងប្អូនទាំងអស់នេះ ក្នុងនាមអាជ្ញាធរខេត្តសូមកោតសរសើរ និងសូមថ្លែងអំណរគុណយ៉ាងជ្រាលជ្រៅចំពោះសកម្មភាពនេះ ហើយអាជ្ញាធរខេត្តនឹងចារទុកសកម្មភាពនេះ ជាប្រវត្តិសាស្ត្រដែលជាប្រជាពលរដ្ឋគំរូល្អក្នុងសង្គមជាតិ៕ដោយ៖កូឡាប