ភ្នំពេញ៖ គណៈកម្មាធិការជាតិរៀបចំការបោះឆ្នោត (គ.ជ.ប) នៅថ្ងៃទី១ ខែតុលា ឆ្នាំ២០២០នេះ បានចេញសេចក្តីប្រកាសព័ត៌មាន ដំណើរការចុះឈ្មោះភ្នាក់ងារគណបក្សនយោបាយ ដើម្បីសង្កេតមើលការពិនិត្យបញ្ជីឈ្មោះនិងការចុះឈ្មោះបោះឆ្នោតឆ្នាំ២០២០។
បើតាមគ.ជ.ប បានបញ្ជាក់ថា គិតត្រឹមវេលាម៉ោង ៥និង៣០នាទីល្ងាច ថ្ងៃទី៣០ ខែកញ្ញា ឆ្នាំ២០២០ មានគណបក្សនយោបាយចំនួន ៥ បានដាក់ភ្នាក់ងាររបស់ខ្លួន ដើម្បីសង្កេតមើលដំណើរការនៃការពិនិត្យបញ្ជីឈ្មោះ និងការចុះឈ្មោះបោះឆ្នោត ដែលមានដូចជា គណបក្សប្រជាជនកម្ពុជា គណបក្សសម្ព័ន្ធដើម្បីប្រជាធិបតេយ្យ គណបក្សខ្មែររួបរួមជាតិ គណបក្សហ្វ៊ុនស៊ិនប៉ិច និងគណបក្សយុវជនកម្ពុជា។ ចំនួនភ្នាក់ងារគណបក្សនយោបាយពេញសិទ្ធិ និងបម្រុង មានដូចខាងក្រោម៖ ១ គណបក្សប្រជាជនកម្ពុជា ចំនួន២.៣៤៧នាក់ (ស្រី៥០៤នាក់) ២ គណបក្សសម្ព័ន្ធដើម្បីប្រជាធិបតេយ្យ ចំនួន ២៥១១នាក់ (ស្រី៤៣៩នាក់) ៣ គណបក្សខ្មែររួបរួមជាតិ ចំនួន១៣១នាក់ (ស្រី១៨នាក់) ៤ គណបក្សហ្វ៊ុនស៊ិនប៉ិច ចំនួន៣៧នាក់ (ស្រី៤នាក់) ៥ គណបក្សយុវជនកម្ពុជាចំនួន១នាក់។
គ.ជ.ប ពិនិត្យឃើញថា នៅខេត្តចំនួន ៤ គឺខេត្តបន្ទាយមានជ័យ រាជធានីភ្នំពេញ សៀមរាប និងតាកែវ គណបក្សសម្ព័ន្ធដើម្បីប្រជាធិបតេយ្យ បានប្រើប្រាស់ទម្រង់បែបបទផ្ទាល់ខ្លួន ដែលខុសពីទម្រង់បែបបទ (ទ.១០០៧ ) កំណត់ដោយ គ. ប ហើយគណបក្សមានការភាន់ច្រឡំអំពីកាលបរិច្ឆេទ នៃដាក់ពាក្យសុំចុះឈ្មោះភ្នាក់ងារគណបក្សនយោបាយ ដោយយល់ថាបញ្ចប់ ការទទួលពាក្យនៅត្រឹមថ្ងៃទី ៣០ ខែកញ្ញា ឆ្នាំ២០២០។
តាមពិត តាមប្រតិទិននៃការពិនិត្យបញ្ជីឈ្មោះ និង សាធារណៈការចុះឈ្មោះបោះឆ្នោតដែលបានផ្សព្វផ្សាយជា ចុះឈ្មោះភ្នាក់ងារគណបក្សនយោបាយគឺចាប់ផ្តើមធ្វើពី ថ្ងៃទី២៤ ខែកញ្ញា រហូតដល់ ថ្ងៃទី២១ ខែធ្នូ ឆ្នាំ២០២០។
គ.ជ.ប សូមអំពាវនាវដល់គ្រប់គណបក្សនយោបាយដែលបានចុះបញ្ជីគណបក្សនយោបាយ នៅក្រសួងមហាផ្ទៃ សូមចូលរួមដាក់ពាក្យសុំ ចុះឈ្មោះភ្នាក់ងាររបស់ខ្លួន ដើម្បីសង្កេតមើលដំណើរការ ពិនិត្យបញ្ជីឈ្មោះ និងចុះឈ្មោះបោះឆ្នោត ឆ្នាំ២០២០ នេះកុំបីខាន។
គ.ជ.ប សង្ឃឹមយ៉ាងមុតមាំថាគ្រប់គណបក្សនយោបាយ ក្រុមប្រឹក្សាឃុំ សង្កាត់ គ្រប់ភាគីពាក់ព័ន្ធ និងមន្ត្រីបោះឆ្នោតទាំងអស់ នឹងយកចិត្តទុកដាក់សហការល្អ ដើម្បីឱ្យដំណើរការនៃការពិនិត្យបញ្ជីឈ្មោះ និងការ ចុះឈ្មោះបោះឆ្នោត ឆ្នាំ២០២០ នេះ ប្រព្រឹត្តទៅដោយរលូន និងជោគជ័យ៕ដោយ៖កូឡាប