ភ្នំពេញ៖អគ្គិភ័យជាបញ្ហាដែលគួរឲ្យព្រួយបារម្ភ និងផ្ដល់ផលប៉ះពាល់ច្រើនដល់សេដ្ឋកិច្ចជាតិ និងការរស់នៅរបស់ប្រជាពលរដ្ឋ ដូច្នឹះ ក្រសួងមហាផ្ទៃ រៀបចំកិច្ចប្រជុំប្រកាសសេចក្ដីសម្រេចស្ដីពីការបង្កើតក្រុមការងារតាក់តែងលិខិតបទដ្ឋានគតិយុត្តស្ដីពីការបង្ការ និងការពន្លត់អគ្គិភ័យ។
នៅទីស្ដីការក្រសួងមហាផ្ទៃ នាព្រឹកថ្ងៃព្រហស្បតិ៍ ទី១ ខែតុលា ឆ្នាំ២០២០នេះ ក្រសួងមហាផ្ទៃ រៀបចំកិច្ចប្រជុំប្រកាសសេចក្ដីសម្រេចស្ដីពីការបង្កើតក្រុមការងារតាក់តែងលិខិតបទដ្ឋានគតិយុត្តស្ដីពីការបង្ការ និងការពន្លត់អគ្គិភ័យ ក្រោមអធិបតីភាពឯកឧត្តម នាយឧត្តមសេនីយ៍ សន្តិបណ្ឌិត អ៊ុក គឹមលេខ រដ្ឋលេខាធិការ ក្រសួងមហាផ្ទៃ ដែលមានការចូលរួមពីអនុរដ្ឋលេខាធិការ អគ្គស្នងការរងនគរបាលជាតិ ប្រធាននាយកដ្ឋាន អនុប្រធាននាយកដ្ឋាន ដែលជាសមាជិកក្រុមការងារ ព្រមទាំងមន្ត្រីពាក់ព័ន្ធជាច្រើនរូបផងដែរ។
ឯកឧត្តម នាយឧត្តមសេនីយ៍ សន្តិបណ្ឌិត អ៊ុក គឹមលេខ បានលើកឡើងថា អគ្គិភ័យជាបញ្ហាដែលគួរឲ្យព្រួយបារម្ភ និងផ្ដល់ផលប៉ះពាល់ច្រើនដល់សេដ្ឋកិច្ចជាតិ និងការរស់នៅរបស់ប្រជាពលរដ្ឋ ហេតុនេះ ក្រោយពីមានការបង្កើតក្រុមការងារនេះឡើង ការរៀបចំ តាក់តែងលិខិតបទដ្ឋានគតិយុត្តស្ដីពីការបង្ការ និងការពន្លត់អគ្គិភ័យនានា ត្រូវមានលក្ខណៈច្បាស់លាស់ និងគ្រប់ជ្រុងជ្រោយ សំដៅរួមសហការគ្នាជួយសង្គ្រោះការខាតបង់របស់ប្រជាពលរដ្ឋ និងសង្គមជាតិ។
ឆ្លៀតក្នុងឱកាសនោះ ឯកឧត្តមរដ្ឋលេខាធិការ ក៏បានផ្ដល់មតិផ្ដាំផ្ញើឲ្យមានការយកចិត្តទុកដាក់ខ្ពស់ក្នុងការសិក្សា ស្រាវជ្រាវ តាក់តែងលិខិតបទដ្ឋានគតិយុត្តឲ្យមានលក្ខណៈតឹងរឹង គ្រប់ជ្រុងជ្រោយ និងសមស្របទៅតាមការវិវត្តជាក់ស្ដែង ហើយរួមគ្នាធ្វើយ៉ាងណាឲ្យកិច្ចការងារនេះមានភាពម៉ត់ចត់ និងរលូន ជាពិសេសគឺត្រូវគិតដល់ផលប្រយោជន៍ជាតិ និងផលប្រយោជន៍ប្រជាពលរដ្ឋជាធំ។
គួរជម្រាបជូនថា ក្រុមការងារតាក់តែងលិខិតបទដ្ឋានគតិយុត្តស្ដីពីការបង្ការ និងការពន្លត់អគ្គិភ័យនេះមានភារកិច្ចសិក្សាស្រាវជ្រាវច្បាប់ និងលិខិតបទដ្ឋាននៃព្រះរាជាណាចក្រកម្ពុជា និងប្រទេសនានាសម្រាប់ជាជំនួយ និងបទពិសោធក្នុងការបម្រើឲ្យកិច្ចតាក់តែង ហើយត្រូវសហការជាមួយក្រសួង ស្ថាប័ន អង្គភាពពាក់ព័ន្ធ ដើម្បីប្រមូលព័ត៌មាន ចងក្រង រៀបចំឯកសារ និងតាក់តែងសេចក្ដីព្រាងលិខិតបទដ្ឋាននេះផងដែរ៕ ដោយ៖បញ្ញាស័ក្តិ
