រាជធានីភ្នំពេញ ៖ អគ្គស្នងការនគរបាលជាតិ នៃក្រសួងមហាផ្ទៃ បានណែនាំដល់កងកម្លាំងនគរបាល នៅទូទាំងប្រទេសកម្ពុជា អោយបង្កើនសកម្មភាពចុះល្បាតការពារសន្តិសុខសុវត្ថិភាព ជូនប្រជាពលរដ្ឋ ដោយការទទួលខុសត្រូវខ្ពស់ នាឱកាសពិធីបុណ្យចូលឆ្នាំចិន វៀតណាម និងកូរ៉េ ដែលនឹងចាប់ផ្តើមចាប់ពីថ្ងៃទី១៥ ដល់ថ្ងៃទី១៨ ខែកុម្ភៈ ឆ្នាំ២០១៨។
សេចក្ដីណែនាំ ចុះហត្ថលេខា និងបោះត្រា ដោយ នាយឧត្តមសេនីយ៍ នេត សាវឿន អគ្គស្នងការដ្ឋាននគរបាលជាតិ ចុះថ្ងៃទី៩ ខែកុម្ភៈ ឆ្នាំ២០១៨ ស្តីពីកិច្ចការពារសន្តិសុខសណ្តាប់ធ្នាប់សាធារណៈ សុវត្ថិភាពសង្គមក្នុងពិធីបុណ្យចូលឆ្នាំថ្មី ប្រពៃណីជនជាតិចិន វៀតណាម និងកូរ៉េ បង្ហាញថា ដើម្បីការពារសន្តិសុខសណ្តាប់ធ្នាប់ ក្នុងពិធីខាងលើ អគស្នងការនគរបាលជាតិ បានដាក់ចេញសេចក្តីណែនាំ ៥ចំណុច ដល់កងកម្លាំងនៅទីទាំងប្រទេសត្រូវយកចិត្តទុកដាក់ ដើម្បីការពារសន្តិសុខ ជូនប្រជាពលរដ្ឋនាឱកាសពិធីបុណ្យចូលឆ្នាំចិន វៀតណាម និងកូរ៉េ នៅថ្ងៃទី១៥ ដល់ថ្ងៃទី១៨ ខែកុម្ភៈ ឆ្នាំ២០១៨។
ទន្ទឹមគ្នានេះ គណៈកម្មាធិការសុវត្ថិភាពចរាចរណ៍ផ្លូវគោក ក៏បានចេញសេចក្តីអំពាវនាវ ស្តីពីការទប់ស្កាត់គ្រោះថ្នាក់ចរាចរណ៍ផ្លូវគោក ក្នុងឱកាសពិធីបុណ្យចូលឆ្នាំចិន និងវៀតណាម ដោយរំលឹកដល់អ្នកបើកបរ ឬអ្នកប្រើប្រាស់ផ្លូវគ្រប់មធ្យោសបាយធ្វើដំណើរ ត្រូវគោរពច្បាប់ចរាចរណ៍ផ្លូវគោកអោយបានជាប្រចាំ និងមានសុជីវៈធ៌មក្នុងការបើកបរអោយបានជាប្រចាំ។
ខាងក្រោមនេះ គឺជាសេចក្តីណែនាំ របស់ អគ្គស្នងការនគរបាលជាតិ នៃក្រសួងមហាផ្ទៃ ស្តីពីការការពារសន្តិសុខសុវត្ថិភាព និងសេចក្តីណែនាំ របស់ គណៈកម្មាធិការជាតិសុវត្ថិភាពផ្លូវគោក ស្តីពីការទប់ស្កាត់គ្រោះថ្នាក់ចរាចរណ៍ នាឱកាសពិធីបុណ្យចូលឆ្នាំចិន វៀតណាម និងកូរ៉េ នៅថ្ងៃទី១៥-១៨ ខែកុម្ភៈ ឆ្នាំ២០១៨៕ ដែន សីមា