កំពង់ស្ពឺ ៖ ក្រុមការងារអន្ដរជំនាញ មាននគរបាលប្រឆាំងបទល្មើសសេដ្ឋកិច្ច នគរបាលចរាចរណ៍ផ្លូវគោក និងមន្ទីរសាធារណការនិងដឹកជញ្ជូនខេត្ដកំពង់ស្ពឺ ចុះត្រួតពិនិត្យនិងបិទយានដ្ឋានកែច្នៃយានយន្ដខុសច្បាប់នៅក្នុងខេត្ដកំពង់ស្ពឺចំនួន ១៤ កនកន្លែង ហើយនៅបន្ដលួចលាក់ទៀតកសាងសំណុំរឿងបញ្ជូនទៅតុលាការ។
នៅព្រឹកថ្ងៃទី១ ខែតុលា ឆ្នាំ២០២០ ក្រុមគណៈកម្មការ ចុះត្រួតពិនិត្យយានដ្ឋានជួសជុល និងកែច្នៃដំឡើងយានយន្តខុសលក្ខណៈបច្ចេកទេស រួមមាន ជំនាញមន្ទីរសាធារណការ និងដឹកជញ្ជូនខេត្ត នគរបាលប្រឆាំងបទល្មើសសេដ្ឋកិច្ចខេត្ត នគរបាលចរាចរណ៍ ។
យោងតាមប្រកាសរួម ស្មារតីអង្គប្រជុំកាលពីថ្ងៃទី៨ ខែកញ្ញា ឆ្នាំ២០២០ នៅក្រសួងមហាផ្ទៃ ស្ដីពីវិធានការពង្រឹងការគ្រប់គ្រងបច្ចេកទេសដំឡើង កែច្នៃយានយន្ដ ឱ្យស្របតាមលក្ខណៈបច្ចេកទេសត្រឹមត្រូវ ការអនុវត្តច្បាប់ ចំពោះយានដ្ឋានខុសច្បាប់ ក្រុមការងារអន្ដរជំនាញខេត្តកំពង់ស្ពឺបានចុះត្រួតពិនិត្យទីតាំងយានដ្ឋាន ជួសជុល និងកែច្នៃដំឡើងយានយន្តខុសលក្ខណៈបច្ចេកទេសនៅក្នុងភូមិសាស្ត្រ ក្រុងច្បារមន ស្រុកភ្នំស្រួច នឹងបន្ដចុះតាមបណ្ដាស្រុកមួយចំនួនទៀតនៅទូទាំងខេត្ដកំពង់ស្ពឺ។
ជារួមក្រុមការងារបានរកឃើញយានដ្ឋាន ចំនួន ១៤ កន្លែង គ្មានច្បាប់អនុញ្ញាត និងបានសម្រេចធ្វើកំណត់ហេតុបិតទាំងស្រុង ករណីនៅបន្ដលួចលាក់ទៀតកសាងសំណុំរឿងបញ្ជូនទៅតុលាការចំណាត់ការផ្លូវច្បាប់៕ ដោយ៖កូឡាប