ភ្នំពេញ៖យោងលិខិតលេខ ០៨/២០២០ គជបអ ចុះថ្ងៃចន្ទ ៦កើត ខែភទ្របទ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី ២៤ ខែសីហា ឆ្នាំ ២០២០ ស្តីពីការរៀបចំបុណ្យកាន់បិណ្ឌ ភ្ជុំបិណ្ឌ និង កឋិនទាន របស់ គណៈកម្មាធិការជាតិរៀបចំបុណ្យជាតិ-អន្តរជាតិ។
បុណ្យកឋិនទាន ជាកាលទានមួយដ៏ថ្លៃថ្លា មានលក្ខណៈពិសេសក្នុងព្រះពុទ្ធសាសនា ដែលក្នុងមួយឆ្នាំ មានតែម្តង មានរយៈពេលកំណត់ ២៩ថ្ងៃ ចាប់ពីថ្ងៃ១រោច ខែអស្សុជ ដល់ថ្ងៃ១៥កើត ខែកត្តិក ត្រូវនឹងថ្ងៃទី៣ ដល់ថ្ងៃទី៣១ ខែតុលា ឆ្នាំ២០២០ ដោយវត្តមួយអាចទទួលបានតែអង្គកឋិនមួយតែប៉ុណ្ណោះ ជាទានមានផលានិសង្ឃ ខ្ពស់ ទាំងទាយកទាយិកា (អ្នកឱ្យ) និងទាំងបដិគ្គាហកៈ(អ្នកទទួល) ជាទីជ្រះថ្លា និងចំណូលចិត្តរបស់ ពុទ្ធបរិស័ទខ្មែរ ដែលតែងតែប្រារព្ធធ្វើជារៀងរាល់ឆ្នាំ។
ដើម្បីឱ្យបុណ្យកឋិនទានប្រព្រឹត្តិទៅដោយរលូន និងមានសណ្តាប់ធ្នាប់របៀបរៀបរយ ក្រសួងធម្មការនិង សាសនា សូមធ្វើការណែនាំដូចខាងក្រោម៖
ទាយកទាយិកាម្ចាស់ដើមកឋិន ត្រូវយកចិត្តទុកដាក់ទទួលខុសត្រូវ និងណែនាំអ្នកចូលរួមដង្ហែ អង្គកឋិន ពិសេសយុវជន ហាមមិនឱ្យធ្វើអំពើផ្តេសផ្តាស់ដូចជាយកដុំដី ដុំថ្ម ទឹក និងវត្ថុផ្សេង ទៀត ចោលឬតប់ទៅលើអ្នកដទៃនៅតាមផ្លូវសាធារណៈដែលត្រូវដង្ហែអង្គកឋិន។
ទាយកទាយិកាម្ចាស់ដើមកឋិន ត្រូវពិនិត្យឱ្យបានច្បាស់លាស់ ហ្មត់ចត់ចំពោះអ្នកជិះរថយន្តត្រីចក្រយានយន្ត កប៉ាល់ ទូក កាណូត អំពីចំនួនមនុស្សដែលជិះ មិនត្រូវឱ្យឈរ ឬអង្គុយលើជញ្ជាំង ឬតោងរថយន្ត ឬអង្គុយលើបង្កាន់ដៃកប៉ាល់ ទូក កាណូត ជាដាច់ខាត ចៀសវាងគ្រោះថ្នាក់ ជាយថាហេតុ ដូចជាក្រឡាប់រថយន្ត ឬលិចកប៉ាល់ ទូក កាណូតជាដើម។ ហាមដើររៃអង្គាសនៅតាមផ្លូវសាធារណៈ ទីប្រជុំជន តាមគេហដ្ឋាន ។ល។ ដែលធ្វើឱ្យបាត់បង់សណ្តាប់ធ្នាប់របៀបរៀបរយសង្គម និងតម្លៃព្រះពុទ្ធសាសនា។ ចំពោះអាចារ្យ និងគណៈកម្មការវត្ត ដែលមានភារកិច្ចត្រៀមរង់ចាំទទួលទាយកទាយិកាដែលជា ម្ចាស់ដើមកឋិន ត្រូវសហការជាមួយអាជ្ញាធរពាក់ព័ន្ធ រៀបចំសណ្តាប់ធ្នាប់របៀបរៀបរយ ព្រមទាំង ធានានូវសន្តិសុខ សុវត្ថិភាពតាំងពីពេលដែលទាយកទាយិកាចូលដល់ និងចេញពីទីវត្តនោះ ជាការចាំបាច់បំផុត។
រាល់ការរៀបចំបុណ្យកឋិនទាន ត្រូវអនុវត្តតាមការណែនាំរបស់រាជរដ្ឋាភិបាលកម្ពុជា ក្នុងការទប់ស្កាត់ និងការពារជំងឺកូដ -១៩ និងអនុវត្តវិធានការសុវត្ថិភាពសុខភាពរបស់ក្រសួងសុខាភិបាល គឺត្រូវរៀបចំឱ្យមានជាកន្លែងពិនិត្យសុខភាព មុនពេលចូលក្នុងទីធ្លាវត្តអារាម ព្រះវិហារ ឬសាលាឆាន់ ត្រូវមានឧបករណ៍វាស់កម្ដៅ សាប៊ូ ជែល ឬទឹកអាល់កុលសម្រាប់លាងសម្អាតដៃជាប្រចាំ។ ត្រូវ ពាក់ម៉ាស់ ក្រមា កន្សែង ឬប្រើក្រដាសខ្ទប់មាត់នៅពេលក្អក ឬកណ្តាស់ និងត្រូវរក្សាគម្លាតបុគ្គល ម្នាក់ទៅបុគ្គលម្នាក់ទៀតឱ្យបានយ៉ាងតិចមួយម៉ែត្រកន្លះ។
ទទួលបានសេចក្តីណែនាំនេះ សូមលោកប្រធានមន្ទីរធម្មការ និងសាសនារាជធានី -ខេត្ត សហការ ជាមួយព្រះមេគណ ព្រះអនុគណ ព្រះចៅអធិការគ្រប់វត្តអារាមទូទាំងព្រះរាជាណាចក្រកម្ពុជា និងប្រធានអង្គភាព ពាក់ព័ន្ធធ្វើការផ្សព្វផ្សាយ និងទទួលខុសត្រូវចាត់ចែងអនុវត្តឱ្យមានប្រសិទ្ធភាពខ្ពស់ចាប់ពីថ្ងៃចុះហត្ថលេខា នេះតទៅ៕ដោយ៖កូឡាប
