ភ្នំពេញ៖ កាលពីពេលកន្លងទៅនេះ (ជិត២ខែ) មកហើយ មានរឿងដ៏គួរឲ្យអាណិតខ្លោចចិត្តមួយ ដោយទារិកាម្នាក់ ត្រូវបានកម្មករប្រមូលសំរាមប្រទះឃើញនៅលើគំនរសំរាមជាប់នឹងបង្គោលភ្លើងមួយកន្លែង ស្ថិតនៅជិតមជ្ឈមណ្ឌល ម៉ូឌែន២ ផ្លូវជាតិលេខ២ សង្កាត់ចាក់អង្រែក្រោម ដោយមិនដឹងថា ម្តាយមានចិត្តអប្រិយរូបណា យកគ្នាមកបោះបង់ចោលបែបនេះ។
តែយ៉ាងណា ទារិកានេះត្រូវចាត់ទុកថាមានជីវិតថ្លៃណាស់ ដែលនៅរស់រានមានជីវិត និងសំណាងបានគ្រួសារបងស្រីមួយលក់ដូរក្បែរនោះ ដែលមានចិត្តបុណ្យ បានសម្រេចចិត្តយកទារិកាដ៏អភព្វនេះ យកធ្វើជាកូនចិញ្ចឹមរបស់ពួកគាត់ ទាំងក្តីរំភើបរំជួលចិត្តយ៉ាងខ្លាំង។
ក្រោយពីបានឃើញដ៏គួរឲ្យអាណិតអាសូរជាខ្លាំងនោះ ឃើញថាមានបងប្អូនសប្បុរសជនជាច្រើន បានឧបត្ថម្ភជាថវិកា និងសម្ភារប្រើប្រាស់ផ្សេងៗ ដែលក្នុងនោះមានកំពូលតារាចម្រៀងស្រីអ្នកនាង ឱក សុគន្ធកញ្ញា និងស្វាមី ក៏បានចុះទៅកាន់ផ្ទះប្តីប្រពន្ធជាឪពុកម្តាយចិញ្ចឹម ដើម្បីបានឃើញមុខមាត់ទារិកាផ្ទាល់ និងក៏ដូចនាំយកសម្ភារប្រើប្រាស់សម្រាប់ទារិកា និងក៏ដូចជាថវិកាមួយចំនួនផងដែរ។
ដោយឡែក នៅពេលនេះ ទារិកាដែលមានឈ្មោះថា ធានី បានប្រែរូបរាងលូតលាស់ច្រើនណាស់ និងមុខមាត់ស្រស់ស្អាតគួរឲ្យក្នាញ់តែម្តង ។ ជាក់ស្តែង កាលពីពេលថ្មីៗនេះ ម្តាយចិញ្ចឹម ធានី បានយកគាត់ទៅពិនិត្យ និងព្រមទាំងបានបញ្ជាក់ប្រាប់ឲ្យដឹងថា៖ “28-09-2020 នាំកូនធានីមកពិនិត្យសុខភាព លូវអូនបាន ៥គីឡូ៤ខាំហើយ”។
ទន្ទឹមនេះផងដែរ បងប្អូនអ្នកប្រើប្រាស់បណ្តាញសង្គម បាន Comment ថា៖ «សំណាងណាស់កូន ដែលជួបម្តាយឪពុកចិត្តបុណ្យ មើលមុខឥឡូវគួរឲ្យស្អប់, ធំលឿនណាស់ កូនមហាសំណាង, ថ្លោសណាស់, មើលថ្ពាល់គេណ៎ខ្នាញ់ណាស់កូនជ្រូក, មុខឡើងអាក្រក់ នៅជិតអី ថើបទាល់តែយំហ្មង» ៕ ដោយ៖ លឹម ហុង
