ខេត្ដកណ្ដាល៖ នគរបាលក្រុងតាខ្មៅ ចាប់ខ្លួនជនសង្ស័យម្នាក់ករណីជេរប្រមាថនិងគំរាមសម្លាប់បងស្រីខ្លួននឯង នឹងថាសម្លាប់មួយពូជតែម្តង។ ជនសង្ស័យត្រូវចាប់ខ្លួន យោងតាមពាក្យប្តឹងរបស់ជនរងគ្រោះជាបងស្រីបង្កើត នៅថ្ងៃព្រហស្បតិ៍ ទី១ ខែតុលា ឆ្នាំ២០២០ វេលាម៉ោង៨និង០០នាទី នៅចំណុចផ្ទះជនរងគ្រោះភូមិព្រែកតាពៅ១ សង្កាត់ដើមមៀន ក្រុងតាខ្មៅ ខេត្តកណ្តាល។
ជនរងគ្រោះជាបងបង្កើតឈ្មោះម៉ាន រ៉ហីម៉ាស់ ភេទស្រី អាយុ៥០ឆ្នាំ ជនជាតិខ្មែរឥស្លាម ទីលំនៅភូមិព្រែកតាពៅ១ សង្កាត់ដើមមៀន ក្រុងតាខ្មៅ ខេត្តកណ្តាល មុខរបរលក់ដូរ ។ ចំណែកជនសង្ស័យត្រូវប្អូនបង្កើតឈ្មោះម៉ាន យូសុះ ភេទប្រុស អាយុ៣៣ឆ្នាំ ជនជាតិខ្មែរឥស្លាម ទីលំនៅភូមិព្រែកតាពៅ១ សង្កាត់ដើមមៀន ក្រុងតាខ្មៅ ខេត្តកណ្តាល មុខរបរមិនពិតប្រាកដ (ឃាត់ខ្លួន)។
វត្ថុតាងចាប់យក៖ កាំបិតប៉័ងតោចំនួន១ ទួណឺវីសចំនួន១ កំសៀវទឹកចំនួន១ ឈើជ្រុង១កំណាត់ប្រវែង៤៩សង់ទីម៉ែត្រ
នគរបាលក្រុងតាខ្មៅ បានឲ្យដឹងថា នៅវេលាកើតហេតុខាងលើ ពេលដែលជនរគ្រោះកំពុងតែអង្គុយលេងជាមួយម្តាយ នៅក្នុងផ្ទះ ស្រាប់តែជនសង្ស័យមិនដឹងជាខឹងរឿងអ្វីទេ បានដើរចូលមកជេរប្រមាថ ហើយទាញយកកំណាត់ឈើជ្រុង និងកំសៀវទឹកគប់ តែមិនត្រូវទេ បន្ទាប់មកទៀតជនសង្ស័យបានស្ទុះទៅយកកាំបិតប៉័ងតោ និងទួណឺវីស កាន់នៅជាប់ដៃ គំរាមកាប់សម្លាប់ចោលទាំងពូជ ហើយបានជិះម៉ូតូចេញពីផ្ទះបាត់ទៅ។
ដោយជនរងគ្រោះនិងអ្នកផ្ទះ មានការភ័យខ្លាច និងអំពើគំរាមកំហែងជាច្រើន លើកច្រើនសារ ពីសំណាក់ជនសង្ស័យលែងបាន ទើបមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលដើមមៀន ជួយអន្តរាគមន៍ឃាត់ខ្លួនជនសង្ស័យបានរួមទាំងវត្ថុតាង យកមកសាកសួរនៅប៉ុស្តិ៍រួចបញ្ជូនបន្តមកកាន់អធិការដ្ឋាននគរបាលក្រុងតាខ្មៅ ដើម្បីបន្តចាត់ការតាមនីតិវិធី៕ដោយ៖កូឡាប