ប្រធានាធិបតីអាមេរិក លោក ដូណាល់ ត្រាំ បាននិយាយនៅព្រឹកថ្ងៃសុក្រនេះថា លោកនិងលោកស្រីទីមួយមីឡានែល បានធ្វើតេស្តវិជ្ជមានវវីរុសកូវីដ១៩។
លោក ត្រាំ បានសរសេរនៅបណ្តេញសង្គម Twitter របស់លោកថា៖ «នៅរាត្រីនេះខ្ញុំនិងភរិយាបានធ្វើតេស្តវិជ្ជមានវីរុស COVID-19 ។ យើងនឹងចាប់ផ្តើមដំណើរការការដាក់ឲ្យនៅដាច់ដោយឡែកពីគេនិងដំណើរជាសះស្បើយក្នុងពេលឆាប់ៗនេះ។ យើងនឹងឆ្លងកាត់បញ្ហាទាំងអស់គ្នា»។
ជំនួយការសេតវិមានដ៏ជិតស្និទ្ធរបស់លោក ត្រាំ គឺលោក Hicks ក៏បានធ្វើតេស្តវិជ្ជមានកូវីដ១៩ដែរ នៅព្រឹកថ្ងៃដដែល។ លោក Hicks បានស្ថិតនៅលើយន្តហោះ Air Force One ជាមួយប្រធានាធិបតីនៅពេលគាត់ធ្វើដំណើរទៅទីក្រុង Cleveland រដ្ឋអូហៃយ៉ូ សម្រាប់ការជជែកដេញដោលប្រធានាធិបតីលើកដំបូងជាមួយគូប្រជែងរបស់គាត់គឺលោក Joe Biden ដែលជាអ្នកប្រជាធិបតេយ្យកាលពីថ្ងៃអង្គារ។
ហើយលោកក៏បានចូលរួមជាមួយលោក ត្រាំផងដែរ ក្នុងដំណើរទស្សនកិច្ចរបស់លោកទៅធ្វើយុទ្ធនាការបោះឆ្នោតនៅរដ្ឋមិនីសូតាកាលពីថ្ងៃពុធ។
ការរឹតបន្តឹងនៅអឺរ៉ុប
ទន្ទឹមនឹងនេះដែរអាជ្ញាធរបារាំងបានព្រមានថា ទីក្រុងប៉ារីសអាចត្រូវបានដាក់ការប្រកាសអាសន្នជាអតិបរមា ដើម្បីបញ្ឈប់ការរីករាលដាលនៃវីរុសនេះ ហើយប្រទេសអេស្ប៉ាញបានរឹតត្បិតយ៉ាងខ្លាំងនៅទូទាំងរដ្ឋធានីម៉ាឌ្រីដរបស់ខ្លួន។
យោងតាមប្រភពផ្លូវការរបស់ AFP បានឲ្យដឹងថាគិតត្រឹមម៉ោង ៨ យប់ថ្ងៃព្រហស្បតិ៍ (ម៉ោង ៣ ព្រឹកថ្ងៃសុក្រនៅប្រទេសថៃ) ជំងឺរាតត្បាតបានសម្លាប់មនុស្សយ៉ាងហោចណាស់ ១.០១៩.២៦៧ នាក់នៅជុំវិញពិភពលោកនិងឆ្លងជាង ៣៤ លាននាក់។
អាជ្ញាធរបារាំងបាននិយាយថាពួកគេអាចដាក់ទីក្រុងប៉ារីស ឲ្យ មានការប្រុងប្រយ័ត្នខ្ពស់បំផុតនៅថ្ងៃច័ន្ទនេះដែលអាចតម្រូវឱ្យមានការបិទបារទាំងអស់នៅពេលដែលចំនួនករណីបានកើនឡើង។ រដ្ឋមន្ត្រីក្រសួងសុខាភិបាលបារាំង លោក Olivier Veran បានមានប្រសាសន៍ថា៖“ យើងស្ថិតក្នុងដំណាក់កាលមួយដែលស្ថានភាពកាន់តែអាក្រក់ទៅ ៗ» ។
អេស្ប៉ាញដែលកំពុងប្រយុទ្ធនឹងរលកទីពីរនៃវីរុសកូវីដ១៩ ក៏បានពង្រីកការរឹតត្បិតយ៉ាងខ្លាំងនៅទូទាំងរដ្ឋធានីរបស់ខ្លួន ទោះបីជាមានការប្រឆាំងយ៉ាងខ្លាំងពីអាជ្ញាធរក្នុងទីក្រុងម៉ាឌ្រីដ ហើយតំបន់ផ្សេងទៀតភាគច្រើនបានយល់ព្រម រឹតបន្តឹងលើតំបន់ដែលមានការរីករាលដាលយ៉ាងឆាប់រហ័ស។ ម៉ាឌ្រីដកំពុងតស៊ូនឹងអត្រាករណីឆ្លងចំនួន ៧៨០ ករណីក្នុងមនុស្ស ១០០.០០០ នាក់បើប្រៀបធៀបនឹង ៣០០ នាក់ក្នុង ១០០.០០០ នាក់នៅអេស្បាញដែលខ្ពស់បំផុតនៅសហភាពអឺរ៉ុប។
នៅចក្រភពអង់គ្លេសឯណោះវិញ ប្រធានទីប្រឹក្សាវិទ្យាសាស្ត្រលោក Patrick Vallance បានប្រាប់អ្នកយកព័ត៌មានថា“ អ្វីៗពិតជាកំពុងដើរក្នុងទិសដៅខុស” ខណៈដែលរដ្ឋាភិបាលបានបិទទ្វារទៅទីក្រុងជាច្រើននៅភាគខាងជើងនៃប្រទេសអង់គ្លេស ដោយបានដាក់ច្រើនជាងមួយភាគបួននៃប្រទេសនេះដែលស្ថិតនៅក្រោមការរឹតត្បិតនៃមេរោគឆ្លង។
ដោយឡែក រដ្ឋាភិបាលស្លូវ៉ាគីនិងឆែកទាំងពីរបានសម្រេចចិត្តដាក់រដ្ឋក្នុងគ្រាមានអាសន្ន ដោយចាប់ផ្តើមពីថ្ងៃព្រហស្បតិ៍និងថ្ងៃចន្ទសប្តាហ៍ក្រោយរៀងៗខ្លួន ដើម្បីអនុញ្ញាតឱ្យពួកគេធ្វើការសម្រេចចិត្តយ៉ាងឆាប់រហ័សចំពោះការកើនឡើងនៃការឆ្លងនិងការស្លាប់៕
ប្រភព៖ AFP
ដោយ៖CEN
