ភ្នំពេញ៖ កាលពីពេលថ្មីៗនេះក្រុមហ៊ុន Facebook បានដាក់ពាក្យបណ្ដឹងប្ដឹងក្រុមហ៊ុនពីរ ដែលជាក្រុមហ៊ុនបង្កើតកម្មវិធីមុខងារបន្ថែម (Extensions) សម្រាប់ប្រើប្រាស់ជាមួយកម្មវិធី Chrome។ ក្រុមហ៊ុនទាំងពីរនេះមានឈ្មោះថា BrandTotal Ltd. និង Unimania Inc. ហើយពួកគេបានបង្កើតកម្មវិធី UpVoice និងកម្មវិធី Ads Feed ដែលមានដាក់ឱ្យទាញយកបានពីក្នុង Chrome Web Store ចាប់តាំងពីខែកញ្ញាឆ្នាំ២០១៩។ នេះបើតាមការផ្សាយរបស់នាយកដ្ឋានប្រឆាំងបទល្មើសបច្ចេកវិទ្យានៃក្រសួងមហាផ្ទៃ។
បើតាមការចោទប្រកាន់របស់ក្រុមហ៊ុន Facebook នៅក្នុងពាក្យបណ្ដឹងបានឱ្យដឹងថាក្រុមហ៊ុន BrandTotal បានប្រើល្បិចល្បួងអ្នកប្រើប្រាស់ ដោយផ្ដល់ប្រាក់កាសជាប្រភេទកាត ឱ្យពួកគេបន្តិចបន្តួចជាថ្នូរនឹងការបញ្ចូលកម្មវិធីនេះ ចំណែកឯក្រុមហ៊ុន Unimania ត្រូវបានចោទប្រកាន់ដោយប្រើល្បិចបោកបញ្ឆោតអ្នកប្រើប្រាស់ថា នៅពេលដែលពួកគេទាញយកកម្មវិធីនេះ ពួកគេនឹងក្លាយទៅជាសមាជិករបស់សហគមន៍អ្នកល្បីៗ ដែលគ្រប់គ្រងការផ្សព្វផ្សាយពាណិជ្ជកម្មដែលមានថវិការាប់ពាន់លានដុល្លារ។
ទោះជាយ៉ាងណាក្ដីក្រុមហ៊ុន Facebook បានធ្វើការចោទប្រកាន់ថា កម្មវិធីទាំងពីរនេះគឺជាកម្មវិធីបង្កើតឡើងដើម្បីលួចយកទិន្នន័យរបស់អ្នកប្រើប្រាស់ដូចជា ឈ្មោះផ្ទាល់ខ្លួន ឈ្មោះសម្រាប់ចូលក្នុងគណនី ភេទ ថ្ងៃខែឆ្នាំកំណើត និងទីតាំង របស់អ្នកប្រើប្រាស់តាមរយៈគេហទំព័រពីក្រុមហ៊ុនផ្សេងៗមានដូចជា Facebook, Instagram, Amazon, Twitter, LinkedIn, Pinterest និង YouTube ជាដើម។ ក្រុមហ៊ុនទាំងពីរខាងលើបានប្រមូលទិន្នន័យទាំងអស់នេះដើម្បីលក់ទៅឱ្យក្រុមហ៊ុនផ្សេងៗទៀតក្នុងការផ្សព្វផ្សាយពាណិជ្ជកម្ម។
បច្ចុប្បន្នកម្មវិធីទាំងពីរនេះនៅតែមាននៅក្នុង Chrome Web Store ទោះបីជាក្រុមហ៊ុន Facebook បានព្យាយាមទាក់ទងជាមួយក្រុមហ៊ុន Google ជាច្រើនលើកច្រើនសាមកហើយ ដែលនេះធ្វើឱ្យពួកគេមានការងឿងឆ្ងល់ដែរថា តើហេតុអ្វីបានជាក្រុមហ៊ុន Google មិនលុបចោលកម្មវិធីទាំងពីរនេះចេញ ព្រោះថាកម្មវិធីនេះមានបង្កប់មុខងារដែលផ្ទុយពីសេវាកម្មរបស់ក្រុមហ៊ុន Google៕ ដោយ៖កូឡាប