ភ្នំពេញ៖ នាព្រឹកថ្ងៃទី៥ ខែតុលា សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា និងឯកឧត្តម Wang Wentian ឯកអគ្គរដ្ឋទូតចិនប្រចាំកម្ពុជា បានអញ្ជើញចុះពិនិត្យគម្រោងពហុកីឡដ្ឋានជាតិមរតកតេជោ ដែលជាជំនួយរបស់ចិនជូនចំពោះកម្ពុជា។
ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍កម្ពុជា និងមន្ត្រីកម្មាធិការជាច្រើនរូបទៀត ដែលអញ្ជើញមកពីស្ថាប័នរដ្ឋក្នុងប្រទេសកម្ពុជាមានដូចជា ក្រសួងមហាផ្ទៃ ក្រសួងអប់រំ យុវជននិងកីឡា ក្រសួងសាធារណការ និងដឹកជញ្ជូន ក្រសួងសុខាភិបាល ក្រសួងសង្គមកិច្ច អតីតយុទ្ធជន និងយុវនីតិសម្បទា ក្រសួងវប្បធម៌ និងវិចិត្រសិល្បៈ ក្រសួងការពារជាតិ និងលោក Wu Guoquan ទីប្រឹក្សាកិច្ចការសេដ្ឋកិច្ចនិងពាណិជ្ជកម្មនៃស្ថានទូតចិនប្រចាំកម្ពុជា និងព្រមទាំងមន្ត្រីទូតជាច្រើនរូបទៀតអញ្ជើញមានវត្តមានក្នុងកម្មវិធីខាងលើ។
សម្តេចពិជ័យសេនា និងឯកឧត្តម ឯកអគ្គរដ្ឋទូតចិន បានអញ្ជើញសណ្ដាប់សេចក្តីរាយការណ៍ ពីស្ថានភាពវិវឌ្ឍននៃគម្រោងដែលបង្ហាញដោយលោក Wang Qunqing ប្រធានក្រុមបច្ចេកទេសគម្រោងដែលទទួលសាងសង់ដោយក្រុមហ៊ុន CHINA STATE CONSTRUCTION គ្រុប（CSCES）។
បន្ទាប់មកក៏បានចុះពិនិត្យទីតាំងការដ្ឋាននៃគម្រោង និងបានលើកទឹកចិត្តបុគ្គលិកនៃគម្រោងឱ្យខិតខំប្រឹងប្រែង ដើម្បីកសាងគម្រោងពហុកីឡដ្ឋានជាតិនេះ ឱ្យក្លាយជាវិស្វកម្មគំរូមួយដែលមានស្តង់ដារនិងគុណភាពខ្ពស់។
គម្រោងពហុកីឡដ្ឋានជាតិដែលជាជំនួយរបស់ចិនជូនចំពោះកម្ពុជា មានទីតាំងនៅប៉ែកខាងជើងនៃរាជធានីភ្នំពេញ ផ្ទៃដីនៃគម្រោងមានទំហំប្រមាណ ៨២៤០០ ម៉ែត្រការ៉េ ដែលអាចផ្ទុកមនុស្សបាន ៦ម៉ឺន នាក់ បានផ្តល់ការគាំទ្រដោយថវិកាជំនួយឥតសំណងរបស់រដ្ឋាភិបាលចិន។ ហើយគម្រោងនេះគ្រោងនឹងបញ្ចប់នាឆ្នាំ២០២១ ហើយនឹងក្លាយជាទីកន្លែងដ៏សំខាន់សម្រាប់ប្រទេសកម្ពុជាក្នុងការធ្វើជាម្ចាស់ផ្ទះនៃព្រឹត្តិការណ៍កីឡាអាស៊ីអាគ្នេយ៍ក្នុងឆ្នាំ២០២៣។
ឯកឧត្តម វ៉ាត់ ចំរើន អគ្គលេខាធិការ CAMSOC ថ្លែងក្រោយបញ្ចប់ទស្សនកិច្ចនេះថា សម្តេចពិជ័យសេនា ទៀ បាញ់ បានវាយតម្លៃខ្ពស់ចំពោះហេដ្ឋារចនាសម្ព័ន្ធទីលានប្រកួត ត្រៀមស៊ីហ្គេម លើកទី៣២ ឆ្នាំ២០២៣។ នៅថ្ងៃនេះផ្តោតសំខាន់លើការត្រៀមលក្ខណៈ២សំខាន់ៗ គឺកីឡដ្ឋានធំ ដែលប្រែប្រួលកាលបរិច្ឆេទនៃការបញ្ចប់ការសាង់សង់ ដោយក្រុមហ៊ុនសាងសង់បញ្ជាក់ថា នឹងបញ្ចប់ការសាងសង់នាខែឧសភា ឆ្នាំ២០២១ ដោយត្រូវការពេលវេលាបន្ថែម ក្នុងការបំពាក់កៅអី កញ្ចក់ ការតុបតែងផ្សេងៗ ជាពិសេសគឺការតុបតែងផ្នែកខាងក្នុងកីឡដ្ឋានធំ ដូចជាទីលានបាល់ទាត់ ទីលានរត់អត្តពលកម្ម សណ្ឋាគារ បន្ទប់ VIP ដោយយើងសង្ឃឹមថា នៅពាក់កណ្តាលឆ្នាំ២០២១ នឹងបញ្ចប់ការសង់សង់កីឡដ្ឋានធំទាំងស្រុង ហើយនៅឆ្នាំ២០២២ យើងត្រៀមបើកសម្ពោធការប្រកួតកីឡាជាតិ លើកទី៤ នៅពហុកីឡដ្ឋានជាតិមរតកតេជោ។ ជាទូទៅបទបង្ហាញរបស់ក្រុមហ៊ុនសាងសង់ភាគីចិន បានបញ្ជាក់ច្បាស់អំពីគុណភាព សក្តានុពលនៃបច្ចេកវិទ្យាចុងក្រោយសម្រាប់ការសាងសង់ពហុកីឡដ្ឋានជាតិមរតកតេជោនេះ ដែលនេះជាគម្រោងដ៏ធំរបស់ភាគីចិន សម្រាប់ការងារក្រៅប្រទេសរបស់ខ្លួន។
ឯកឧត្តមអគ្គលេខាធិការបញ្ជាក់ជូនទៀតថា ចំណុចទី២ គឺផ្តោតលើការសាងសង់ភូមិកីឡា ដែលអាចផ្ទុកកីឡាករ កីឡាការិនីច្រើនជាង៧ពាន់នាក់ ដោយគ្រោងនឹងបញ្ចប់ការសាងសង់ឲ្យទាន់ពេលវេលាតាមការគ្រោងទុក ដើម្បីត្រៀមទទួលធ្វើម្ចាស់ផ្ទះ ការប្រកួតកីឡា ស៊ីហ្គេម លើកទី៣២ ក៏ដូចជាអាស៊ានប៉ារ៉ាហ្គេម លើកទី១២ ឆ្នាំ២០២៣។ ភូមិកីឡា គឺជាកន្លែងហូបចុកស្នាក់នៅរបស់អត្តពលិក ដែលអាចកាត់បន្ថយការចំណាយលើការរៀបចំនេះបានច្រើន ដែលអត្តពលិក គ្រូបង្វិកអាចហូបចុក ស្នាក់នៅទីនេះជុំគ្នា ផ្តល់ភាពងាយស្រួល ក្នុងការប្រកួត ហើយមិនចំណាយលើការស្នាក់នៅសណ្ឋាគារ និងការដឹកជញ្ជូនជាដើម។ នៅក្នុងដំណើរអញ្ជើញត្រួតពិនិត្យនៅទីនេះ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធាន CAMSOC ទទួលបាននូវភាពកក់ក្តៅ ហើយសម្តេចប្រធានក៏បានជំរុញឲ្យជំនាញខិតខំធ្វើការឲ្យបានល្អប្រសើរបន្ថែមទៀត ស្របទៅតាមគម្រោង និងពេលវេលា ព្រមទាំងឲ្យគោរពទៅតាមស្តងដារនៃការសាងសង់ផង និងស្តង់ដានិយាមបច្ចេកទេសនៃប្រភេទកីឡាទាំងអស់ ដែលមាន នៅក្នុងពហុកីឡដ្ឋានជាតិមរតកតេជោ។
«វាយតម្លៃជារួមឃើញថា ដំណើរទស្សនកិច្ចរបស់សម្តេចប្រធាន CAMSOC នាពេលនេះ យើងទទួលបាននូវការណែនាំដ៏ខ្ពង់ខ្ពស់ និងទទួលបានធាតុចូលបន្ថែមពីថ្នាក់ដឹកនាំ ហើយយើងនឹងកែសម្រួលនូវចំណុចខ្វះខាតមួយចំនួន ជាពិសេសគឺយើងនៅមានការរៀបចំដំណើរទស្សនកិច្ចជាច្រើនទៀតជូនសម្តេច នៅតាមបណ្តាខេត្តមួយចំនួនទៀតដែលត្រូវត្រៀមរៀបចំការប្រកួតកីឡាលើទឹក ដូចជាខេត្តកែប កំពត និងខេត្តព្រះសីហនុ។ ដូច្នេះនៅចុងឆ្នាំ២០២០នេះ ហេដ្ឋារចនាសម្ព័ន្ធកីឡាទាំងអស់ ត្រូវបានកំណត់នូវផែនការច្បាស់លាស់ ថាតើប្រភេទកីឡាណាខ្លះ ត្រូវលេងនៅកន្លែងណា ទីលានប្រកួតណាមានស្តង់ដារបច្ចេកទេសរួចហើយ ទីលានណាខ្លះទៀតមិនទាន់ឆ្លើយតបទៅនឹងស្តង់ដារបច្ចេកទេសស៊ីហ្គេម។ ក្រោយពេលយើងរៀបចំនូវទីលានប្រកួតនេះរួចរាល់ហើយ គឺយើងលែងខ្វល់ខ្វាយ ពីរឿងទីលានទៀត ហើយយើងនឹងងាកទៅពង្រឹងគុណភាណលើការរៀបចំព្រឹត្តិការណ៍ និងការអភិវឌ្ឍសមត្ថភាពកីឡាករ កីឡាការិនី ដោយធ្វើយ៉ាងណាឲ្យគ្រប់ទម្រង់ការងារមានគុណភាពល្អប្រសើរ ដើម្បីត្រៀមទទួលស្វាគមន៍ប្រតិភូ អត្តពលិកមកពីបណ្តាប្រទេសអាស៊ីអាគ្នេយ៍ ប្រកបដោយភាពកក់ក្តៅ ក្នុងឋានៈជាម្ចាស់ផ្ទះ ស៊ីហ្គេម លើកទី៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣»។ នេះជាការលើកឡើងបន្ថែមរបស់ឯកឧត្តម វ៉ាត់ ចំរើន៕ដោយ៖កូឡាប
