កំពត៖ឯកឧត្តមកិត្តិសេដ្ឋាបណ្ឌិត ចម ប្រសិទ្ធ បានក្រើនរំលឹកដល់មន្ត្រី សមាជិកក្រុមការងារគ្រប់លំដាប់ថ្នាក់ ឲ្យបន្តពង្រឹងសកម្មភាពបំពេញបន្ថែមចំណុចខ្វះខាត ដើម្បីជំរុញដល់យន្តការដោះស្រាយ បញ្ហា សំណូមពរ និងតម្រូវការទំនាស់នានារបស់ពលរដ្ឋ នៅតាមមូលដ្ឋាន ឲ្យមានប្រសិទ្ធភាពខ្ពស់ និងបញ្ចៀសភាពអសកម្មឲ្យបានដាច់ខាត ដែលអាចបង្កឱ្យមានភាពថ្នាំងថ្នាក់ពីប្រជាពលរដ្ឋ ឲ្យជះឥទ្ធិពលអវិជ្ជមាន ដល់ការគ្រាំទ្របក្ស និងរាជរដ្ឋាភិបាល។
ព្រឹកថ្ងៃចន្ទ ទី៥ ខែ តុលា ឆ្នាំ២០២០ ឯកឧត្តម ជាវ តាយ អភិបាលនៃគណៈអភិបាលខេត្តកំពត បានអញ្ជើញចូលរួមក្នុងកិច្ចប្រជុំបូកសរុបលទ្ធផលការងារត្រីមាសទី៣ និងលើកទិសដៅការងារងនុវត្តបន្ត របស់ក្រុមការងាររាជរដ្ឋាភិបាលចុះមូលដ្ឋានខេត្តកំពត ដើម្បីត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលកម្ពុជា ក្រោមអធិបតីភាពដ៏ខ្ពង់ខ្ពស់ ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពត ។
ឯកឧត្តមអភិបាលខេត្តបានធ្វើសេចក្តីរាយការណ៍ជូនឯកឧត្តមប្រធានក្រុមការងារអំពីស្ថានភាពសន្តិសុខ សណ្តាប់ធ្នាប់សាធារណេៈមានភាពល្អរប្រសើរ សេដ្ឋកិច្ច និង ភ្ញៀវទេសចរនៅតែកើនឡើងជាលំដាប់ ទោះបីស្ថិតក្នុងដំណាក់កាលកូវីដក៏ដោយ ការងារចុះឈ្មោះបោះឆ្នោតដំណើរការដោយប្រក្រតី និងលទ្ធផលសម្រេចបានរបស់ក្រុមការងាររាជរដ្ឋាភិបាលចុះមូលដ្ឋានខេត្ត ក្រុង ស្រុក បានចុះធ្វើវេទិកាសាធារណៈសរុបចំនួន ២១៦លើក លើ ៩៣ឃុំ សង្កាត់ ដោយប្រមូលបាននូវបញ្ហាសំណូមពរចំនួន ៦៩៨ករណី ក្នុងនោះបានដោះស្រាយចំនួន ៤៧៦ករណី កំពុងដោះស្រាយបានចំនួន ២០៥ករណី និងមិនទាន់ដោះស្រាយបានចំនួន ១៧ករណី។
លោកក៏បានកោតសរសើរ និងវាយតម្លៃខ្ពស់ចំពោះលទ្ធផល ដែលសមាជិកក្រុមការងារគ្រប់លំដាប់ថ្នាក់ ចុះមូលដ្ឋានខេត្តកំពត ដែលបានខិតខំយកចិត្តទុកដាក់សកម្មភាពយ៉ាងផុលផុស ក្នុងការជួយសម្រួលដោះស្រាយរាល់បញ្ហាសំណូមពរ ជូនប្រជាពលរដ្ឋបានយ៉ាងល្អប្រសើរ។ ពិសេសចំពោះអាជ្ញាធរខេត្ត ក្រុងស្រុកដែលបានសហការគ្នាល្អ ក្នុងកិច្ចអភិវឌ្ឍន៍ ដើម្បីធ្វើឱ្យជីវភាពសេដ្ឋកិច្ចគ្រួសារប្រជាពលរដ្ឋ មានលក្ខណៈកាន់តែល្អប្រសើរឡើង បើទោះបីស្ថិតក្នុងស្ថានភាពវិបត្តិជំងឺកូវីដ១៩ក្ដី ក៏ខេត្តកំពត នៅតែទទួលបាននូវភ្ញៀវទេសចរជាតិ អន្តរជាតិមានការកើនឡើងជាលំដាប់។
ឯកឧត្តមទេសរដ្ឋមន្ត្រីប្រធានក្រុមការងារបានថ្លែងការកោតសរសើរ ដល់ក្រុមការងារគ្រប់លំដាប់ថ្នាក់អំពីការខិតខំប្រឹងប្រែង យកអស់កម្លាំងកាយចិត្ត និងថវិកា សម្ភារ ទើបសម្រេចបានលទ្ធផលគួរជាទីមោទនៈ ក្នុងត្រីមាសទី៣នេះ និងដាក់ចេញនូវទិសដៅដល់ក្រុមការងារខិតខំជំរុញអនុវត្តកម្មវិធីនយោបាយរបស់រាជរដ្ឋាភិបាល ឲ្យបានល្អប្រសើរថែមទៀត ក្នុងនោះសូមឲក្រុមការងារបន្តការចុះអប់រំផ្សព្វផ្សាយការប្រយុទ្ធប្រឆាំងជំងឺកូវីដ១៩ ជំរុញតាមដានការងារអត្តសញ្ញាណកម្មគ្រួសារក្រីក្រ ការងារចុះឈ្មោះបោះឆ្នោត ការងារអត្តសញ្ញាណប័ណ្ណគំរូថ្មី ការពិនិត្យធ្វើចំណាត់ថ្នាក់តាមប្រភេទនូវបញ្ហាប្រឈមដើម្បីឆ្លើយតប នឹងដោះស្រាយជូនប្រជាពលរដ្ឋ ទៅតាមយន្តការនានារបស់ក្រុមការងារ៕ដោយ៖កូឡាប
