បន្ទាយមានជ័យ ៖ លោកឧត្តមសេនីយ៍ត្រី សិទ្ធិ ឡោះ ស្នងការនគរបាលខេត្តបន្ទាយមានជ័យ បានណែនាំដល់កងកម្លាំងនគរបាលអន្តរាគមន៍ ត្រូវគ្រប់គ្រងនិងថែរក្សាអាវុធឲ្យបានគង់វង្សមិនត្រូវបាត់បង់ ក្នុងនោះក៏មិនត្រូវយកចេញដោយគ្មានបទបញ្ជានោះដែរ ការថ្លែងនេះ ក្នុងខណៈពេលដែលលោកស្នងការបានបំពាក់អាវុធ ដល់កងកម្លាំងនគរបាលអន្តរាគមន៍ចំនួន២០នាក់ នៅថ្ងៃទី៥ ខែតុលា ឆ្នាំ២០២០ ដែលមានការចូលរួមពី លោក លោកស្រីឧត្តមសេនីយ៍ វរសេនីយ៍ អនុសេនីយ៍ ជាស្នងការរង នាយ នាយរងការិយាល័យ នាយ នាយផ្នែក សរុបចំនួន២៦២នាក់ ។
លោកឧត្តមសេនីយ៍ស្នងការបានបញ្ជាក់ថា ៖ អាវុធនេះ ឯកឧត្តមនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ បានប្រគល់ជូន ស្នងការដ្ឋាននគរបាលខេត្តបន្ទាយមានជ័យ ដើម្បីបំពាក់ដល់កងកម្លាំងនគរបាលអន្តរាគមន៍ សំដៅរក្សាការពារសន្តិសុខ សណ្តាប់ធ្នាប់ជូនប្រជាពលរដ្ឋ និងការពារឥស្សរជនថ្នាក់ដឹកនាំរាជរដ្ឋាភិបាល ។
នាឱកាសនោះដែរ លោកឧត្តមសេនីយ៍ត្រី សិទ្ធិ ឡោះ ស្នងការនគរបាលខេត្ត ក៏បានជម្រុញដល់ថ្នាក់ដឹកនាំការិយាល័យជំនាញចំណុះស្នងការដ្ឋាន ត្រូវណែនាំដល់មន្ត្រីនគរបាលក្រោមឱវាទ ត្រូវចូលរួមសន្សំសំចៃក្នុងការប្រើប្រាស់ថាមពលអគ្គិសនី នៅពេលចេញទៅផ្ទះ គឺត្រូវបិទភ្លើងនិងម៉ាស៊ីនត្រជាក់ជៀសវាងការប្រើប្រាស់ខ្ជះខ្ជាយដោយមិនបានបិទ ពេលចេញពីកន្លែងធ្វើការ ក្នុងនោះក៏ត្រូវតែមានការប្រើប្រាស់ដោយសន្សំសំចៃទឹកផងដែរ កុំបើកឲ្យហៀរចោល ដែលនាំឲ្យមានការខាតបង់នូវថវិកា។
ទាក់ទងនឹងបរិស្ថាននិងសុខភាពនោះ លោកឧត្តមសេនីយ៍ស្នងការក៏បានជម្រុញឲ្យគ្រប់ការិយា ល័យទាំងអស់ ត្រូវតែធ្វើការអនាម័យសម្អាតឲ្យបានស្អាតជានិច្ច ដើម្បីឲ្យកន្លែងធ្វើការមានសោភ័ណភាព ពិសេសគឺនាំគ្នាបំផ្លាញជម្រកមូសខ្លា ចំពោះឧបករដែលអាចដក់ទឹកនៅរាយប៉ាយ ក្នុងបរិវេណស្នងការដ្ឋានត្រូវប្រមូលទុកដាក់និងដុតចោល ព្រោះបច្ចុប្បន្នទន្ទឹមនឹងកើតមានជំងឺកូវីដ-១៩ នោះ ក៏កើតមាន នូវជំងឺគ្រុនឈាម គ្រុនឈិកផងដែរ ដែលកន្លងមកថ្មីៗនេះខេត្តបន្ទាយមានជ័យយើងបានផ្ទុះឡើងនូវជំងឺគ្រុនឈិក ដូច្នេះដើម្បីសុខភាពរឹងមាំជៀសវាងជំងឺតម្កាត់ផ្សេងៗ គឺត្រូវផ្តើមចេញពីយើងទាំងអស់គ្នា ត្រូវមានអនាម័យខ្ពស់បន្ទាប់មកលោកឧត្តមសេនីយ៍ស្នងការក៏បានប្រគល់កុំព្យូទ័រដល់ការិយាល័យរដ្ឋបាលសរុប ការិយាល័យសរុបនិងវិភាគ និងការិយាល័យគ្រប់គ្រងសន្តិសុខឯកជន ដើម្បីធ្វើជំនាញ៕ដោយ៖កូឡាប
