ខេត្តស្វាយរៀង៖លោក ម៉ែន វិបុល ប្រធានគណៈកម្មាធិការ សាខាកាកបាទក្រហមកម្ពុជាខេត្តស្វាយរៀងព្រមទាំង លោក លោកស្រី ជាសមាជិក សមាជិការ នៃគណៈកម្មាធិការ សាខានៅព្រឹកថ្ងៃ ៦ ខែ តុលា ឆ្នាំ ២០២០ នេះ បានទទួលអំណោយមនុស្សធម៌ ពីព្រះសុមេធវង្សបណ្ឌិត សុខ ប៊ុនធឿន អនុប្រធានកិត្តិយសសាខា ជាព្រះចៅអធិការវត្តនន្ទមុន្នី ព្រះប្រធានផ្នែកពុទ្ធិកឧត្តមសិក្សា នៃក្រសួងធម្មការ និងសាសនា សមាជិកក្រុមប្រឹក្សាជាតិភាសាខ្មែរនៃរាជបណ្ឌិត្យសភាកម្ពុជា នូវអង្ករចំនួន ១.០០០ គីឡូក្រាម និងមី ៣៩ កេស ថវិកា ២.០០០.០០០ រៀល ដល់សាខាសម្រាប់ត្រៀមបម្រុងឆ្លើយតបនៅពេលមានគ្រោះមហន្តរាយកើតឡើង ដែលពិធីនេះបានរៀបចំឡើងនៅទីស្នាក់ការសាខាកាកបាទក្រហមកម្ពុជាខេត្តស្វាយរៀង ។
ក្នុងឱកាសនោះ លោក ម៉ែន វិបុល បាននាំមកនូវប្រសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើសួរសុខទុក្ខ និងថ្លែងអំណរព្រះគុណដ៏ជ្រាលជ្រៅបំផុតចំពោះទឹកព្រះទ័យដ៏ថ្លៃថ្លារបស់ ព្រះអង្គ ដែលនេះជាការលើកទឹកចិត្តយ៉ាងធំធេងចំពោះកាកបាទក្រហមកម្ពុជា សម្រាប់ការនាំយកអំណោយទាំងនេះ ទៅចាត់ចែងប្រគល់ជូនប្រជាពលរដ្ឋងាយរងគ្រោះបំផុត កំពុងជួបការលំបាក និងត្រូវការ ជំនួយជាចាំបាច់ ។
យោងតាមរបាយការណ៍ពីអនុសាខាក្រុង ស្រុកទាំង ៨ ឃើញថា ព្រះអនុគណ និង មន្ត្រីសង្ឃនៅតាមវត្តក្នុងក្រុង ស្រុក និមួយៗតែងតែបានយកទេយ្យទានជាស្បៀង សម្ភារ និងថវិកា យកទៅ ប្រគល់ជូនដល់អនុសាខា ដើម្បីដោះស្រាយឆ្លើយតបដល់ប្រជាពលរដ្ឋនៅតាមសហគមន៍បានទទួលលទ្ធផលល្អ ប្រសើរក្នុងចលនាកាកបាទក្រហមកម្ពុជា ។
ក្នុងនាមគណៈកម្មាធិការសាខាកាកបាទក្រហមកម្ពុជាខេត្ត ឯកឧត្តម សូមសំណូមពរដល់ព្រះតេជគុណ ព្រះមន្ត្រីសង្ឃនៅតាមវត្ត បន្តជួយឧបត្ថម្ភនូវស្បៀង សម្ភារ ថវិកា ដល់សាខា អនុសាខាបន្តទៀត ដើម្បីចែកជូនប្រជាពលរដ្ឋយើងដែលជួបការលំបាក ខ្វះខាតនៅតាមសហគមន៍ ឲ្យបានទាន់ពេលវេលា ។
លោក ម៉ែន វិបុល ព្រមទាំងថ្នាក់ដឹកនាំ និងសហការី នៃសាខាកាកបាទក្រហមកម្ពុជាខេត្តស្វាយរៀង សូមបួងសួងប្រគេនថ្វាយព្រះពរ ព្រះសង្ឃគ្រប់ ព្រះអង្គ សូមមានព្រះសុខភាពល្អ ព្រះជន្មាយុយឺនយូរ ដើម្បីបន្តទ្រទ្រង់វិស័យព្រះពុទ្ធសាសនាឱ្យបានគង់វង្ស រីកចម្រើនតរៀងទៅ ។ ហើយលោក
បានសន្យាថាអំណោយទាំងអស់នេះ សាខានឹងធ្វើការបែងចែកជូនដល់ដៃប្រជាពលរដ្ឋដែលរងគ្រោះគ្រប់ៗគ្នាឲ្យបានទាន់ ពេលវេលាឲ្យសមស្របទៅនឹងព្រះទ័យរបស់ព្រះអង្គជាម្ចាស់ទេយ្យទាន ។
តាមរយៈអំណាចនៃទានដែលបានធ្វើនៅថ្ងៃនេះ ព្រះសុមេធវង្សបណ្ឌិត សុខ ប៊ុនធឿន បានមានថេរដេការថា អំណោយទាំងនេះ នឹងរួមចំណែកដល់ការងារមនុស្សធម៌របស់កាកបាទក្រហមកម្ពុជា ដើម្បីបង្ការ និងកាត់បន្ថយភាពខ្វះខាតរបស់ប្រជាពុទ្ធបរិស័ទ ដើម្បីអព្យាក្រឹតភាព ជំនឿ សាសនា ពូជសាសន៍ និងដើម្បីផលប្រយោជន៍រួម គឺភារកិច្ចមនុស្សធម៌ ៕ដោយ៖ វ៉ៃកូ
