ត្បូងឃ្មុំ៖ ស្នងការដ្ឋាននគរបាលខេត្តត្បូងឃ្មុំ បានឲ្យដឹងថា មានករណីប្រើអំពើហិង្សាក្នុងគ្រួសារមួយកើតឡើង កូនប្រុសទំនើងម្នាក់ ហ៊ានលើកដៃវាយឪពុកបង្កើតខ្លួនឯង ។ សមត្ថកិច្ចបានបញ្ជាក់ថាមូលហេតុបង្កឲ្យមានករណីកើតឡើង ដោយសារឥទ្ធិពលគ្រឿងញៀន ខណៈជនរូបនោះជាមនុស្សញៀនថ្នាំ ខឹងឪពុកយកខ្លួន ទៅដាក់នៅមណ្ឌលកែប្រែទើបធ្វើសកម្មភាពនេះ។
បើតាមរបាយការណ៍របស់ស្នងការដ្ឋាននគរបាលខេត្តត្បូងឃ្មុំ បានបញ្ជាក់ថ កាលពីថ្ងៃចន្ទ ទី៥ ខែតុលា ឆ្នាំ២០២០ វេលាម៉ោង ១៥:៣០រសៀល នៅចំណុចចម្ការកៅស៊ូរបស់ឈ្មោះ ជ័យ ស៊ីថា ភេទប្រុស ស្ថិតនៅភូមិខ្ជាយ ឃុំជាំក្រវៀន ស្រុកមេមត់ ខេត្តត្បូងឃ្មុំ មានករណីប្រើអំពើហិង្សាក្នុងគ្រួសារមួយកើតឡើង ដែលបង្កដោយជនសង្ស័យឈ្មោះ សយ សុខ ភេទប្រុស អាយុ ៣១ ឆ្នាំ ជាតិខ្មែរ រស់នៅភូមិខ្ជាយ ឃុំជាំគ្រវៀន ស្រុកមេមត់ ខេត្តត្បូងឃ្មុំ (ជាកូនបង្កើត) បានធ្វើសកម្មភាពយកព្រនង់មែកកៅស៊ូមួយកំណាត់ វាយទៅលើជនរងគ្រោះឈ្មោះ ជ័យ ស៊ីថា ភេទប្រុស អាយុ ៥៨ ឆ្នាំ រស់នៅភូមិខ្ជាយ ឃុំជាំគ្រវៀន ស្រុកមេមត់ ខេត្តត្បូងឃ្មុំ (ជាឪពុកបង្កើត) បណ្ដាលឲ្យរងរបួសលើកញ្ចឹងកផ្នែកខាងឆ្វេងមួយកន្លែង សន្លប់បាត់ស្មារតី ត្រូវបានក្រុមគ្រួសារបញ្ជូនទៅសង្គ្រោះនៅមន្ទីរពេទ្យបង្អែកស្រុកមេមត់ ចំណែកជនសង្ស័យរត់គេចខ្លួន។
ក្រោយពេលកើតហេតុ កម្លាំងប៉ុស្តិ៍នគរបាលជាំគ្រវៀន បានចុះទៅដល់កន្លែងកើតហេតុការស្រាវជ្រាវ និងចុះកិច្ចប្រតិបត្តិការ ជាបន្តបន្ទាប់ ចាប់ខ្លួនជនសង្ស័យឈ្មោះ សយ សុខ រស់នៅភូមិខ្ជាយ ឃុំជាំគ្រវៀន និងបានបញ្ជូនទៅ អធិការដ្ឋាននគរបាលស្រុកមេមត់ ដើម្បីចាត់ការតាមនីតិវិធី។
នគរបាលមូលដ្ឋាន បានបញ្ជាក់ថា មូលហេតុជនសង្ស័យឈ្មោះ សយ សុខ ជាមនុស្សញៀនថ្នាំ ខឹងឪពុកយកខ្លួនទៅដាក់នៅមណ្ឌលកែប្រែទើបធ្វើសកម្មភាពនេះតែម្តង៕ដោយ៖កូឡាប
