ត្បូងឃ្មុំ ៖ យុវជនទំនើងម្នាក់ជាខ្មែរឥស្លាម បានធ្វើសកម្មភាពយកដុំថ្មគុបកញ្ចក់ចង្អួចព្រះវិហារឥស្លាម បណ្តាលឲ្យបែកខ្ទេច និងបានកាន់ដាវជាប់នៅដៃដើររករឿងប្រជាពលរដ្ឋក្នុងភូមិ នគរបាលប៉ុស្តិ៍រដ្ឋបាលសេដា ចាប់ខ្លួនបញ្ជូនមកកាន់អធិការដ្ឋាននគរបាលស្រុកតំបែរ ដើម្បីបំពេញសំណុំរឿង
ស្នងការដ្ឋាននគរបាលខេត្តត្បូងឃ្មុំ បានឲ្យដឹងថា នៅថ្ងៃអង្គារ ទី៦ ខែតុលា ឆ្នាំ២០២០ វេលាម៉ោង១៥និង០០នាទី នគរបាលប៉ុស្តិ៍រដ្ឋបាលសេដា បានទទួលព័ត៌មានពី មេភូមិខ្នាចជុំ ឃុំសេដា ស្រុកតំបែរ បានឲ្យដឹងថា នៅវេលាម៉ោង៧.២០នាទី មានឈ្មោះ យូ រ៉ហ្វីន ភេទប្រុស អាយុ៣៦ឆ្នាំ ជនជាតិឥស្លាម នៅភូមិខ្នាចជុំ ឃុំសេដា ស្រុកតំបែរ បានធ្វើសកម្មភាពយកដុំថ្មគុបកញ្ចក់ចង្អួចព្រះវិហារឥស្លាម នៅចំណុចភូមិខាងលើ បែកអស់មួយផ្ទាំង ហើយបច្ចុប្បន្នជនខាងលើកំពុងធ្វើសកម្មភាព ប្រដាបដោយដាវ កាន់ជាប់នៅដៃ និងរករឿងប្រជាពលរដ្ឋក្នុងភូមិ ។
ទទួលបានព័ត៌មានខាងលើភ្លាម កម្លាំងប៉ុស្តិ៍ និងកម្លាំងជំនាញ បានចុះទៅដល់ចំណុចកើតហេតុ និងបានឃាត់ខ្លួនជនសង្ស័យខាងលើ បញ្ជូនមកកាន់អធិការដ្ឋាននគរបាលស្រុកតំបែរ ដើម្បីបំពេញសំណុំរឿងតាមនីតិវិធីបញ្ជូន៕ដោយ : កូឡាប