ភ្នំពេញ ៖ អង្គភាពប្រឆាំងអំពើពុករលួយ បានស្រាវជ្រាវរកឃើញថាមេបញ្ជាការ ផ្នែកសឹករងភ្នំស្រុក តំបន់ប្រតិបត្តិការសឹករងបន្ទាយមានជ័យបើកប្រាក់ខែ២កន្លែង ហើយត្រូវបានលុបឈ្មោះមួយកន្លែង
ចេញពីកងយោធពលខេមរភូមិន្ទ។
អង្គភាពប្រឆាំងអំពើពុករលួយ បានឲ្យដឹងថា តាមពាក្យប្តឹងដែលអង្គភាពប្រឆាំងអំពើពុករលួយ បានបញ្ជូនដល់ ឯកឧត្តម នាយឧត្តមសេនីយ៍ សំ វណ្ណថន អគ្គលេខាធិការ ក្រសួងការពារជាតិ និងជាប្រធានក្រុមជនបង្គោលប្រឆាំងអំពើពុករលួយ ក្រសួងការពារជាតិ ធ្វើការស្រាវជ្រាវ និងមានវិធានការ នៅថ្ងៃទី២២ ខែកញ្ញា ឆ្នាំ២០២០ នេះ អង្គភាពប្រឆាំងអំពើពុករលួយ បានទទួលលទ្ធផលមកវិញ គួរឲ្យកោតសរសើរក្រុមជនបង្គោលប្រឆាំងអំពើពុករលួយ ក្រសួងការពារជាតិ។
អង្គភាពប្រឆាំងអំពើពុករលួយ បានបញ្ជាក់ថា ឈ្មោះ យី គន្ធៈ ឬ យីន គន្ធា ពិតជាមនុស្សតែម្នាក់ ហើយបានបើកប្រាក់បៀវត្សរ៍ ២កន្លែង ប្រាកដមែន ហើយក្រសួងការពារជាតិ បានសម្រេចលុបឈ្មោះ យីន គន្ធា ឋានន្តរស័ក្តិ វរសេនីយ៍ទោ អត្តលេខ ០១៦៣៤០ ជាមេបញ្ជាការ ផ្នែកសឹករងភ្នំស្រុក តំបន់ប្រតិបត្តិការសឹករងបន្ទាយមានជ័យ យោធពលភូមិភាគទី៥ ចេញពីក្របខ័ណ្ឌកងយោធពលខេមរភូមិន្ទ៕ដោយ៖កូឡាប