ភ្នំពេញ៖ ក្រោយពួកគេទទួលបានដំណោះស្រាយសមស្របពីសាលារាជធានីភ្នំពេញ បុគ្គលិកនិងកម្មករក្រុមហ៊ុន ស៉ិនទ្រី នឹងប្រមូលសំរាមវិញ នៅរសៀលថ្ងៃទី៧ ខែតុលា ឆ្នាំ២០២០នេះឡើងវិញ ។ ការឯកភាព និងបញ្ឈប់នូវរាល់ការធ្វើបាតុកម្មខាងលើនេះ បានធ្វើឡើង ខណៈដែល ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ អញ្ជើញចុះទៅដោះស្រាយផ្ទាល់ដល់ទីតាំងកើតហេតុ កាលពីព្រឹកថ្ងៃទី៧តុលា ដោយស្នើសុំឲ្យបងប្អូនកម្មករទាំងអស់ ចូលបម្រើការងារវិញ នារសៀល ថ្ងៃទី៧តុលានេះ។
បើយោងតាមកំណត់ហេតុ ការសម្របសម្រួលដោះស្រាយកលើកូដកម្មរបស់កម្មកក្រុមហ៊ុន ស៊ីន ទ្រី (ខេមបូឌា)នៅព្រឹកថ្ងៃទី៧ ខែតុលា ឆ្នាំ២០២០ ក្រោមអធិបតីភាព ឯកឧត្តម យួង ស្រេង អភិបាលរាជធានីភ្នំពេញ ឯកឧត្តម ទេស រុក្ខាផល អគ្គលេធិការ នៃអគ្គលេខាធិការដ្ឋាន គ.ក.ប .ប លោក ឌី គឺដែរ តំណាងក្រសួងបរិស្ថាន បានចុះធ្វើការសម្របសម្រួល និងដោះស្រាយ ករណីកូដកម្ម បាតុកម្ម នៅក្រុមហ៊ុន ស៊ីន ទ្រី (ខេមបូឌា) មានទីតាំងស្ថិតនៅភូមិម័ល សង្កាត់ដង្កោ ខណ្ឌដង្កោ រាជធាវីភ្នំពេញ។ ម្ចាស់សហគ្រាសឈ្មោះ ខេម ស៊ីឌី គ្រុប តំណាងដោយ លោក សុខ ហូត។ មានបងប្អូនកម្មករនិយោជិតសរុបចំនួនប្រមាណ ២.១៥០នាក់ បានចាប់ផ្តើមធ្វើកូដកម្មចាប់ពីល្ងាច ថ្ងៃទី២ ខែតុលា ឆ្នាំ២០២០ រហូតដល់បច្ចុប្បន្ន។ មានសហជីពដែលមាន បញ្ជិកាចំនួន១ គឺសហជីពកម្មករនិយោជិតវិស័យទេសចរណ៍ នៃក្រុមហ៊ុន ស៊ីន (ខេមបូឌា)។
បើតាមរបាយការណ៍ដដែលបានបញ្ជាក់ថា សកម្មភាពកូដកម្ម បាតុកម្ម មានបងប្អូនកម្មករនិយោជិតបានប្រមូលផ្តុំគ្នាធ្វើកូដកម្មមុខទីតាំងយាន្តដ្ឋានក្រុមហ៊ុនស៊ីន ចាប់ពីល្ងាច នៅថ្ងៃទី២ ខែតុលា ឆ្នាំ២០២០ រហូតដល់បច្ចុប្បន្នដើម្បីទាមទារឲ្យអាជ្ញាធរចូលរួមដោះស្រាយនូវលក្ខខណ្ឌមួយចំនួនពាក់ព័ន្ធប្រាក់បំណាច់ឆ្នាំ និងប្រាក់អត្ថប្រយោជន៍ការងារ។
បន្ទាប់ពីបានសម្របសម្រួល និងដោះស្រាយរួចមក អង្គប្រជុំទទួលបានលទ្ធផល ចំពោះសំណើរបស់បងប្អូនកម្មករនិយោជិតទាមទារឱ្យក្រុមហ៊ុនដោះស្រាយពេលបញ្ចប់កិច្ចសន្យា ដោះស្រាយតាមច្បាប់ស្តីពីការងារ ហើយរដ្ឋបាលរាជធានីភ្នំពេញ ជាអ្នកធានាខុសត្រូវ។ ចំពោះការងាររបស់បងប្អូនកម្មករនិយោជិតទៅថ្ងៃខាងមុខ រដ្ឋបាលរាជធានីភ្នំពេញធានាមិនបាត់បង់ឡើយ ទោះបីក្រុមហ៊ុនស៊ីនទ្រីដេញថ្លៃជាប់ ឬមិនជាប់ក៏ដោយ។ សូមឲ្យបងប្អូនកម្មករនិយោជិតទាំងអស់គ្នាចូលធ្វើការងារធម្មតាវិញ ចាប់ពីរសៀលថ្ងៃទី៧ ខែតុលា ឆ្នាំ២០២០នេះតទៅ។
ប៉ុន្ដែទោះជាយ៉ាងណា ក្នុងអន្ដរកាលនេះ អភិបាលរាជធានីភ្នំពេញ បានណែនាំ និងដាក់ផែនការឲ្យអភិបាលខណ្ឌទាំង១៤ រួមទាំងមន្ដ្រីពាក់ព័ន្ធ ចុះប្រមូលសំរាមជាបណ្ដោះអាសន្ន ក្នុងពេលនេះផងដែរ។
ការទទួលយកដំណោះស្រាយ និងព្រមព្រៀងចូលធ្វើការវិញរបស់កម្មករ ក្រុមហ៊ុន ស៉ិនទ្រី ធ្វើឡើងក្រោយបញ្ចប់កិច្ចចរចារបស់លោក ឃួង ស្រេង អភិបាលរាជធានីភ្នំពេញ រវាងម្ចាស់ក្រុមហ៊ុន ស៉ិនទ្រី និងកម្មករ និយោជិត នៅសាលារាជធានីភ្នំពេញ។
បន្ទាប់ពីបញ្ចប់កិច្ចប្រជុំនេះ ឯកឧត្តម ឃួង ស្រេង អភិបាលរាជធានីភ្នំពេញ បានដឹកនាំក្រុមការងារ ចុះទៅជួបសំណេះសំណាលដោយផ្ទាល់ជាមួយកម្មករ ក្រុមហ៊ុន ស៉ិនទ្រី ខណ្ឌដង្កោ ដើម្បីប្រាប់អំពីដំណោះស្រាយ និងការសន្យារបស់រដ្ឋបាលរាជធានីភ្នំពេញ។
ក្នុងឱកាសនោះដែរ លោក ឃួង ស្រេង បានផ្ដល់នូវអង្ករចំនួន២៥គីឡូក្រាម ក្នុងម្នាក់ៗ។ ដែលអង្ករនេះ ជាអំណោយដ៏ថ្លៃថ្លារបស់ សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា៕ដោយ៖កូឡាប