ភ្នំពេញ៖ នារសៀលថ្ងៃពុធទី៧ ខែតុលា ឆ្នាំ២០២០ ឯកឧត្ដម នាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍ បានអញ្ជើញជាអធិបតី ក្នុងពិធីបិទវគ្គបណ្តុះបណ្តាល និងចែកវិញ្ញាបនបត្របញ្ចប់ការសិក្សា ស្តីពីជំនាញកោសល្យ វិច័យឯកសារ នៅអគ្គនាយកដ្ឋានអន្តោប្រវេសន៍។
ថ្លែងនៅក្នុងពិធីបិទវគ្គបណ្តុះបណ្តាល និងចែកវិញ្ញាបនបត្រ ឯកឧត្តម នាយឧត្តមសេនីយ៍ គៀត ច័ន្ទថារិទ្ធ បានលើកឡើងថា មន្ត្រីនគរបាលដែលជាអ្នកផ្តល់ទិដ្ឋាការ ដល់ភ្ញៀវបរទេសសម្រាប់ចេញចូលក្នុងស្រុក គឺជាមន្ត្រីដែលមានអាទិភាពមុនគេ ក្នុងការត្រួតពិនិត្យនូវលិខិតឆ្លងដែន របស់ភ្ញៀវ ហើយក្នុងការត្រួតពិនិត្យនោះ ត្រូវតែស្វែងយល់អំពីមនុស្សអាក្រក់ និងល្អ ដើម្បីធ្វើយ៉ាងណា កុំឲ្យមានភាពអសកម្មណាមួយ កើតឡើងក្នុងប្រទេសយើង ដោយសារតែការមិនជំនាញក្នុងការធ្វើកោសល្យវិច្ច័យ នូវឯកសារទាំងនោះ។
នាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍ បានអំពាវនាវដល់ នគរបាលអន្តោប្រវេសន៍ទាំងអស់ត្រូវតែមានជំនាញ ធ្វើកោសល្យវិច្ច័យនូវឯកសារ ឬលិខិតឆ្លងដែន និងជំនាញសង្កេតមនុស្ស ខណៈនគរបាលអន្តោប្រវេសន៍នេះ គឺជាសន្តិសុខជូរមុខ សម្រាប់ទប់ស្កាត់មនុស្សអាក្រក់ពីខាងក្រៅ ដែលចង់មកធ្វើការយាយីសុខសន្តិភាពប្រទេសជាតិយើងនោះ។
នាយឧត្តមសេនីយ៍ គៀត ច័ន្ទថារិទ្ធ បានបញ្ជាក់ថា «ក្នុងនាមយើងជានគរបាលអន្តោប្រវេសន៍ ឬ អ្នកផ្តល់ទិដ្ឋាការគ្រប់ច្រកចេញចូលទាំងអស់ ត្រូវតែយល់ភារកិច្ចរបស់ខ្លួន ក្នុងការថែរក្សាសន្តិសុខសុវត្ថិភាពជូនប្រទេស បើយើងគ្មានជំនាញណាមួយ ក្នុងការសង្កេតមនុស្ស ឬចេះសម្ភាសន៍មនុស្សទេ ប្រសិនបើប៉ះចំមនុស្សអាក្រក់ (ពួកភេរវកម្ម) ចង់មកបង្កអសន្តិសុខប្រទេសយើង វានឹងធ្វើឲ្យយើងលំបាក ទៅថ្ងៃក្រោយ ហើយកាលណាពួកទាំងនោះ ចូលមកអុកឡុកប្រទេសយើងហើយ ភាពរីកចម្រើន និងសន្តិសុខនាពេលបច្ចុប្បន្ន ក៏វាមិនស្ថិតស្ថេរដែរ»។
ឯកឧត្តម នាយឧត្តមសេនីយ៍ គៀត ច័ន្ទថារិទ្ធ ក៏បានអំពាវនាវដល់នគរបាលអន្តោប្រវេសន៍ទាំងអស់ ត្រូវតែខិតខំរៀនសូត្រ នូវជំនាញធ្វើកោសល្យវិច័យឯកសារ លិខិតឆ្លងដែន និងត្រូវចេះសង្កេតមនុស្ស សម្ភាសន៍មនុស្សនេះឲ្យបានគ្រប់ៗរូប ដើម្បីធ្វើយ៉ាងណាទប់ស្កាត់នូវមនុស្សអាក្រក់ទាំងនោះកុំឲ្យចូលមកប្រទេសកម្ពុជាយើង ក្នុងគោលបំណងមិនល្អ ពោលគឺធ្វើភេរវកម្ម និងធ្វើសកម្មភាពអាក្រក់ផ្សេងៗជាដើមនោះ៕
ដោយ៖កូឡាប
