ភ្នំពេញ៖ក្រោយជាប់គាំងនៅក្នុងទឹកដីនៃប្រទេសអូស្ត្រាលី ដោយសាការរីករាលដាលនៃជំងឺកូវីដ១៩ កញ្ញា ហង្ស សុរិយាន់ ដែលជាតារាបង្ហាញម៉ូតផងនិងតារាសម្តែងផង បានបង្ហាញពីការរស់នៅយ៉ាងស៊ីវីល័យនៅទីនោះ។
ដូចដឹងស្រាប់ហើយក្រោយពីផ្ទុះនូវជំងឺដ៏កាចសាហាវកូវីដ១៩ ប្រទេសទាំងអស់នៅលើពិភពលោកបានរិតត្បិតការធ្វើដំណើរ ជាពិសេសតាមជើងហោះហើរអាកាស ដោយបើកឲ្យធ្វើដំណើរចំពោះតែករណីចាំបាច់តែប៉ុណ្ណោះ ដើម្បីការពារនូវការឆ្លងរីករាលដាលដ៏អាក្រក់នៃជំងឺនេះ។ ការបិទនេះបានធ្វើឲ្យប្រជាជននៅលើពិភពលោក ដែលបានធ្វើដំណើរកម្សាន្តទៅកាន់ប្រទេសទី២ ឬអ្នកដែលមានភារកិច្ចក្រៅប្រទេសបានជាប់គាំង ដោយមិនអាចវិលត្រឡប់ទៅកាន់ប្រទេសខ្លួនវិញ បានរហូតដល់ពិភពលោកអាចរកវ៉ាក់សាំងការពារ ព្យាបាលជំងឺនេះបាន។ ក្នុងនោះកញ្ញា ហង្ស សុរិយាន់ ក៏មិនខុសពីអ្នកឯទៀតដែរ នាងត្រូវបានជាប់គាំងនៅក្នុងទឹកដីនៃប្រទេសអូស្ត្រាលី ខណៈបំពេញការងារនៅទីនោះ នេះបើតាមការឲ្យដឹងរបស់នាងតាមរយៈវីដេអូខ្លីមួយ ឆ្លើយតបទៅនិងសំណួររបស់អ្នកគាំទ្រនៅក្នុងបណ្តាញសង្គមហ្វេសប៊ុក។ ខណៈជាប់គាំងនៅទីនោះនាងក៏តែងតែបង្ហោះរូបភាពស្រស់ស្អាត រួមជាមួយនឹងទិដ្ឋភាពញាំអាហារនៅក្នុងភោជនីយដ្ឋានផ្សេងៗ ដែលមើលទៅពិតជាស្រស់ស្អាតនិងស៊ីវីល័យតាមបែបសង្គមសម័យទំនើប។
ទោះជាយ៉ាងនេះក្តីក្រោយពីជាប់នៅទីនោះអស់រយៈពេលរាប់ខែ បានធ្វើឲ្យនាងនឹករលឹកដល់ម្ហូបខ្មែរ និងមាតុភូមិយ៉ាងក្រៃលែង តែមិនអាចមកបាន មានតែបន្តរង់ចាំរហូតដល់ពិភពលោកមានដំណោះស្រាយ ក្នុងការកំចាត់ជំងឺដ៏អាក្រក់នេះបាត់ពីផែនដី៕ ដោយ៖ កូលាប ក្រហម
